1 Kuntcimbu yiye, nguvulu Helonde uo vuile lutcimo lua Yesu. 2 Ua handekele ku vandonge vendi nguendi, ''Ou Youano muka ku mbuitika; na shituka ku kutca. Ngocho vene vipanga evi vya ndhili yili muli yikeye.'' 3 Muomu Helonde ua kuatele Youano, ua mu kutile, na ku muhaka mu kamenga muomu mulonga ua Helondiya mukentu ua Filipu munayina. 4 Muomu Youano ua handekele kuli vakevo. ''Ku chitava ove ku kala nendi ku kala mukentu uove.'' 5 Helonde ua yonguele ku mutcihya yikeye, vuno ua kele na lyova lya vantu, Muomu va muhakele ngue ka polofeto. 6 Vuno muye litangua lya kupuitha myaka ya Helonde lya hetele, na muna ua mukentu ua Helondiya ua kinine na kuvota kumesho avo, keho ua shangalele Helonde. 7 Umba ua mulekele na ku lithinga mu ku muhana nkala evi vyaka muihula. 8 Kunima vayina vamuishikile, ua handekele nguendi, ''Nji nehele kuno, ha lilonga, mutue ua Youano muka kumbuitika.'' 9 Na Muene ua vavalele ku mbunge, vuno muomu yikeye ua lithingile muomu voshe vaye hamo lika na yikeye ha vya kulya vya chinguedhi, ua veshikile linga vaka vipange. 10 Ua tumine na ku teta mutu ua Youano mu kamenga. 11 Keho mutue uendi va unehele halipanda na ku hana muna mukentu ua utualele kuli vayina. 12 Vandonge vendi vedhile na ku tambula muvila, keho vaka ushitikile. Kunima yevi, vayile na ku leka Yesu. 13 Vuno muye Yesu uo vuile evi, ua yile kumuhela ua limbalanda ua kuyeneka mema. Muye mbunga yovuile evi, ya mushuamene yikeye na kuenda kumembo akama. 14 Keho Yesu uedhile kumesho avo keho ua muene mbunga yakama. Ua vovuililile ngodhi vakevo na ku kanguitha vaka mavedhi. 15 Muye chinguedhi cha hetele vandonge vendi vedhile kuli yikeye na ku handeka nguavo, ''Ou muhela ua limbalanda, na litangua li li na ku hita. Shandola mbunga, ngechiye linga vaye ku membo na ku kalanda vya kulya vyavo vavenya.'' 16 Vuno Yesu ua handekele kuli vakevo nguendi, ''Keti vaye. Va haneni vimo linga valye.'' 17 Va handekele kuli yikeye nguavo, ''Tuli na vimbolo vitanu na vintci vivali.'' 18 Yesu ua handekele nguendi, ''Vi neheni kulyange.'' 19 Keho ua lekele mbunga yi tumame ha muila. Ua tambuile vimbolo vitanu na vintci vivavi. Ua talele mesho endi muilu, ua vedhukithile keho ua vatuile vimbolo na ku vahana vandonge, na vandonge vahanene kumbunga. 20 Na voshe valile na kuikuta. Keho va tambuile vyatheleleho viye vya kulya - vya shulithile vihele likumi na vivali. 21 Voshe vaye valile vakele makulukadhi atanu a vamala, keho vakentu na vanike lalo. 22 Haye vene ua thinduiyile vandonge vendi va kovele muvuato na ku tuama kulutue lya sinya liye, ntcimbu achi shandola mbunga. 23 Kunima na shandola mbunga, uayile kumukinya kua lika lyendi mu ku lombela. Muye chinguedhi cha hetele, ua kele lika lyendi. 24 Vuno na vuato ua kele hakati kamema mu ku heta kuntunda, na mankimba a vetele mu vuato, muomu mpundhi ya pupile kuli vakevo. 25 Ku ntcimbu ya mu chiuana ya vutciki Yesu ua va yombolokelele vakevo, uendele helu lya Kalunga ndonga. 26 Muye vandonge va muene yikeye enda helu lya Kalunga ndonga, va kele na lyova keho va handekele nguavo, ''Chithithimba ocho.'' Keho vakele na lyova. 27 Vuno Yesu ua handekele kuli vakevo nguendi, ''Yimaneni! Yange vene! Keti mukale na lyova.'' 28 Petulu ua mukuanyene yikeye na ku handeka nguendi, ''Muene, nga yove vene, njileke yange linga njinje kulyove mukuenda helu lya mema.'' 29 Yesu ua handekele nguendi, ''Yinja.'' Ngocho Petulu ua shulukile mu vuato uendele helu lya mema na kuya kuli Yesu. 30 Vuno muye Petulu ua muene mpundhi ua kele na lyova. Ngue ua shangumukile ku dhivilila, ua tambakanene na ku handeka nguendi, ''Muene, njovole!'' 31 Yesu vuathi vuathi vene uoluele livoko lyendi, ua kuatele Petulu, na ku handeka kuli yikeye nguendi, ''Ove muka kutcelela kua kundende, vika vyuna kalela na vimpata?'' 32 Keho Yesu na Petulu vayile mu vuato, na mpundhi ya holokele kulu. 33 Keho na vandonge vakele mu vuato va mu lemethele Yesu na ku handeka nguavo, ''Muachili ove u Muna Kalunga.'' 34 Muye vana yavukile, vedhile ku chifuti cha Ngenezaleta. 35 Muye vavenya chifuti va vovuile Yesu, va tumine ku chifuti chiye choshe na ku neha vaka mavedhi ku li yikeye. 36 Keho vamu lambele linga va thaleke mavoko avo kuchongo ya vidhala vyendi, ngue vavengi ngue va kuatele ko va kangukile.