¹ Keho va Faliseo na vaka kuthona vedhile kuli Yesu va tundile ku Yelusalema. Va handekele nguavo, ² ''Vika vandonge veku viyithila vingila vya vakuluntu? Muomu ko ve kutana ku mavoko avo muye mu valya mbolo.'' ³ Ua vakuanyene na ku handeka nguendi, ''Keho eni vika mue ku vihithila lijui lya lishiko lya Kalunga muomu vingila vyeni? ⁴ Muomu Kalunga na handeka nguendi, 'Thingimika yisho nava noko,' keho ue kuhandeka vya kuvihya kuli yishe ndi vayina vuchili aka tca.' ⁵ Vuno mu kahandeka ngueni, 'Uye uoshe aka handeka kuli yishe ndi naye, ' Evi vi njathele ku kuatha navyo, njina vihana kuli Kalunga ,'' ⁶ ngechiye muntu keti aka lemethe yishe.' Mua vungulu vene lijui lya Kalunga muomu vidhila vyeni. ⁷ Eni vaka vishaki! Mua vuchili vene lijui olyo lyana mitumbuilile kapolofeto Yisaya nguendi, ⁸ 'Vantu vana njithingimika na vimbunge vyavo, vuno vimbunge vyavo hale nange. ⁹ Vali naku njilemetha ngocho muomu va longetha ngue mashiko a vingila vya vantu.''' ¹⁰ Keho ua thanene mbunga kuli yendi vavenya na ku handeka kuli vakevo nguendi,''Njitolilileni na ku vua - ¹¹ Evi vye ku kovela mukanua ka muntu ku vye ku mu viyitha muntu. Vuno evi vituhuka mukanua, evi vikevyo vi viyitha muntu.'' ¹² Keho vandonge vedhile na ku handeka kuli Yesu nguavo, ''Una dhivuka ngechiye va Faliseo vana dhivalele vimbunge muye vovuile mudhimbu ou?'' ¹³ Yesu ua kuanyene na ku handeka nguendi, ''Nkala chiti chiye chana yenekele kutombeka Tata ua muilu vaka chishitula mo. ¹⁴ Vetheleni ngano, vana kala vantuama lutue va tupuputua. Nga muntu ua kapuputua akala ntuama lutue ya muntu uaka puputua mukuavo voshe vaka uila muchina.'' ¹⁵ Petulu ua kuanyene na ku handeka kuli Yesu nguendi, ''Tuleke chithimo echi.'' ¹⁶ Yesu ua handekele nguendi, ''Neni lalo ku mua vyuvuile ndi? ¹⁷ Ko mudhivuka ngechiye vyoshe viye vikovela mukanua vika kovela mulidhimo keho vika tuhuka na ku vyumbila kumuthenge? ¹⁸ Vuno vyuma viye vye kutunda mukanua vye ku tunda kumbunge. Vikevyo vyuma viye vye ku vihitha muntu. ¹⁹ Muomu ku mbunge kue kutunda vithinganyeka vya kuvihya, kutcihya, ku kotha na mukentu ua mbala, vu kuidhi, ku puanja, mukaleho ua vishaki, na ku shaula. ²⁰ Evi vikevyo vyuma viye vye ku viyitha muntu. Vuno kulya na mavoko amadhilo ku vye ku vihitha muntu.'' ²¹ Keho Yesu ua tundile kuye ua shondolokele ku mutamba ua limbo lyakama lya Tile na Sindone. ²² Taleni, mukentu ua ku Kanana ua tundile kuimbo lya lindende. Ua tambakanene na ku handeka nguendi, ''Nji vuile ko ngodhi, Muene, Muna Ndaviti! Munange ua mukentu ali na ku yanda na mpundhi ya ku vihya.'' ²³ Vuno Yesu ua mukuanyene lijui na limo lyahi. Vandonge vendi vedhile na ku mu kandelela yikeye, va handekele nguavo, ''Musheke ko, muomu ali na ku tambeka kunima yendi.'' ²⁴ Vuno Yesu ua kuanyene na ku handeka nguendi, ''Ko vanji tumine kuvanga ku vinjui vya ku dhimbala ku njivo ya va Yisaleli.'' ²⁵ Vuno uedhile na kuntcikama kumesho, ua handekele nguendi, ''Muene, nji kuathe.'' ²⁶ Ua kuanyene na ku handeka, ''Kuvya vuahele ku tambula mbolo ya vanike na ku yumbila ku tutali tua tundende.'' ²⁷ Yikeye ua handekele nguendi, ''Mukemuo, Muene, vuno nambe tutali tua tundende vilakuimuina vimo vye kuua ku chitafula cha shukulu yendi.'' ²⁸ Keho Yesu ua kuanyene na kuhandeka kuli yikeye nguendi, ''Mukentu, kutcelela kuove kua kama; linga va chipange kulyove ngue mu una chiyonguela.'' Na munendi ua mukentu va mu kangukithile ku ntcimbu yiye vene. ²⁹ Yesu ua tundile kuye ku muhela keho ua yile ku muyehi na Kalunga ndonga ya ku Ngalileya. Keho ua kandukile ku mukinya na ku ka tumama kuye. ³⁰ Mbunga yakama yedhile kuli yikeye. Navo va mu hanene vaka kuvenduka, tupuputua, vaka kuyeneka kuhandeka, na vilema, na veka va vengi vaye vakele na mavedhi. ³¹ Ngocho mbunga ya komokele muye vamuene vaka kuyeneka kuhandeka va handeka, vilema vakanguka, vaka kuvenduka venda, keho tupuputua vamona, Va shangalele Kalunga ua va Yisaleli. ³² Yesu ua thanene vandonge vendi venje kuli yikeye keho ua valekele nguendi, ''Njili na ngodhi ku mbunga muomu vana kala nange matangua atatu na vya ku lya ko va kele navyo. Ko nja yonguele ku va shandula ngocho na kuyeneka kulya, ndi kuatha va kaue mungila yavo.'' ³³ Vandonge va handekele kuli yikeye nguavo, ''Kuiko tuka uana vimbolo vya ku puamo ngechiye kuno ku limbalanda lya ngocho linga tuikutithe mbunga yino?'' ³⁴ Yesu ua handekele kuli vakevo, ''Vimbolo vingahi muli navyo?'' Keho va handekele nguavo, ''Vitanu na vivali, na vintci vya vindende.'' ³⁵ Keho Yesu ua lekele mbunga ku tumama hantci. ³⁶ Keho ua nonene vimbolo vitanu na vivali na vintci, keho mua manethele kuhana kushangala, ua yi pamuine mbolo na ku yihana kuli vandonge vendi. Na vandonge va hanene ku mbunga. ³⁷ Na vantu voshe valile na kui kuta. Keho va kunguiyilile vihele vitanu navivali vya ku shula vya vi mbalavula viye vya lihonene ho. ³⁸ Vaye voshe valile vakele makulukadhi auana ya vamala, vakentu na vanike. ³⁹ Keho Yesu ua shanduile mbunga keho ua kovelele mu vuato na kuya kumembo aMangandana.