¹ Va Faliseo na vaSanduseu vedhile na ku muetheka yikeye mu ku muihula yikeye ku valeketha vakevo chidhivukitho cha muilu. ² Vuno ua kuanyene na ku handeka kuli vakevo nguendi, ''Muye chinguedhi chiheta, muka handeka ngueni, 'Lilu li kavenga, muomu muka mona mpundhi ya kuvuaha.' ³ Muye chimene chiheta muka handeka ngueni, 'Mu vilua na mpundhi, muomu lilu lina kala lya kuvenga na dhedhemuka.' Eni muatha ku dhivuka evi vili muilu, vuno komu ka vilangununa vidhivukitho vya ku yomboloka ku ntcimbu eyi. ⁴ Mushovo ua kuvihya na vukuidhi vathetela chidhivukitho, vuno chidhivukitho cheka vaka chihana ku chikecho kuvanga chidhivukitho cha Yona.'' Keho Yesu ua va thile vakevo na kuya. ⁵ Keho vandonge va hetele musinya liye, keho vevalele ku tambula mbolo. ⁶ Yesu ua handekele kuli vakevo nguendi, ''Dhangameni na ku litakamethe ku vaFaliseo na va Sanduseu.'' ⁷ Na vandonge vali handekethele umo na mukuavo nguavo, ''Muomu ko tua mbatele vimbolo.'' ⁸ Yesu ua vidhivukile evi keho ua handekele nguendi, ''Eni vaka kutcelela kua kundende, vika muli na ku li handekethela ngechiye muomu ko muambatele vimbolo ndi? ⁹ Ko mua vidhivukile ndi? Komua vivulukile vimbolo viye vitanu vya makulukadhi atanu avantu, na vihele vingahi mua kunguluile? ¹⁰ Ndi na vimbolo vitanu na vivali ha makulukadhi auana, na vihele vingahi mua nonene? ¹¹ Vati ko mudhivuka ngechiye ange ko nja handekele lya vimbolo? Dhangameni na ku litakametha ku va Faliseo na va Sanduseu.'' ¹² Keho va dhivukile ngechiye ka va lekele ku litakametha ku mbolo, vuno ku litakametha ku vi longetha vya va Faliseo na va Sanduseu. ¹³ Mualolo muye Yesu uedhile ku membo akala muyehi na Sesaliya ya Filipu, endi ue huile vandonge vendi keho va handekele nguavo, ''Yange yiya vantu vahandeka ngechiye Muna Muntu cho?'' ¹⁴ Vahandekele nguavo, ''Vamo va handeka nguavo Youano muka ku Mbuitika; vamo, Eliya; na vakuavo; Yelemiya, ndi umo ua vapolofeto.'' ¹⁵ Yikeye ua handekele kuli vakevo nguendi, ''Vuno eni mu njitumbula ngueni yange yiya?'' ¹⁶ Keho Simone Petulu ua handekele nguendi, ''Ove u Kilistu, Muna Kalunga ua muono.'' ¹⁷ Yesu ua kuanyene na ku handeka kuli yikeye nguendi, ''Una vedhuka, Simone muna Yona, muomu ntcitu na maninga ko va vi yomboluela evi kulyove, vuno Tata uange uye ali muilu. ¹⁸ Njina handeka lalo kulyove ngechiye nguange yove Petulu, keho ha livue lino nji ka tungila ho chiuaneno change. Na ndhili yoshe ya vukalo vua vaka kutca ko yikatha ku lituvakana. ¹⁹ Njika kuhana vipatululo vya vumuene vua muilu. Nkala vyoshe uka kuta hano hantci vana vikutu na muilu, keho nkala vyoshe vavutula hano hantci vana yi vutula na muilu.'' ²⁰ Keho Yesu ua veshikile vandonge keti va vileke ngechiye yikeye Kilistu. ²¹ Kutunda ntcimbu yiye Yesu ua shangumukile ku leka vandonge vendi ngechiye endi aka ya ku Yelusalema, aka yanda muakama ku mavoko ava kuluntu na va kuluntu va va sasendote na va ka kuthona, linga vaka mutcihye, keho aka shituka kumuono ha litangua lya muchitatu. ²² Keho Petulu ua mu tualele kua likalyavo ua shangumukile ku mu handekela nguendi, ''Kalunga aku vuile ngodhi Muene! Linga evi keti vika yomboloke kulyove!'' ²³ Vuno Yesu ua tengulukile na ku handeka kuli Petulu nguendi, Tunda ko kunima yange, Satana! Una kala chingoua cha ku nji njipundukitha yange, muomu koua thinganyekele vyuma vya Kalunga, vuno na vyuma vya vantu.'' ²⁴ Keho Yesu ua handekele kuli vandonge vendi nguendi, ''Nga umo ayongola ku nji shuama, endi aka livyana yendi vavenya, lituike chiti chaku lindakana, na ku njishuama. ²⁵ Muomu uye uoshe ayongola kuovola muono uendi aka udhimbaletha, keho uye uoshe aka dhimbaletha muono uendi muomu yange aka uuana. ²⁶ Muomu muntu cha mu vuahela vati nga afuka mavu oshe keho muono uendi aka udhimbaletha? Muntu aka hana vika mu kuovola muono uendi? ²⁷ Muomu na Muna Muntu akenja mu vungulu vua Yishe hamo lika na tungelu tuendi. Keho aka hana ku vantu voshe ku shuama ku vipanga vyavo. ²⁸ Vungulu nji handeka kulyeni nguange, Kuli vamo ava va ne mana kuno vaye ko va komono kutca noho na mono Muna Muntu omo akenja mu vumuene vuendi.''