¹ Keho omo matangua atanu na limo Yesu ua yile na Petulu, Tiango, na Youano munayina, keho ua va tualele ku mukinya ua laha kua likalyavo. ² Ua tengulukile ku mesho avo. Na chihanga chendi cha vya dhimine ngue litangua, na vidhala vyendi vya tokele ngue muedhi. ³ Taleni, kua yombolokele kuye vakevo va Mosesa na Eliya va handekele nendi. ⁴ Petulu ua kuanyene na ku handeka kuli Yesu nguendi, ''Muene, kua chili ku kala kuno. Nga muyongola, nji ka tunge vinjivo vitatu kuno - yimo yove, na yimo ya Mosesa na yimo ya Eliya.'' ⁵ Ntcimbu ua kele na kuhandeka, taleni, lishelua lya va fuikile vakevo, keho taleni, kuye kua tuhukile lijui mu lishelua, na ku handeka ngualyo, ''Ou yikeye Munange yinja yongola, ua nji ya ku mbunge. Mu tolilileni yikeye.'' ⁶ Muye vandonge va vyuvuile, va uile vihanga vyavo keho vakele nalyova. ⁷ Keho Yesu uedhile na ku vakuata keho ua handekele nguendi, ''Katukeni keti mukale na lyova.'' ⁸ Keho va talele kuilu vuno uahi vamuene kuvanga Yesu lika. ⁹ Ngue va shelelele kutunda ku mukinya, Yesu ua veshikile vakevo, na ku handeka nguendi, ''Keti mu vya mbulule vimona evi kuli umo noho Muna Muntu aka shituka ku kutca.'' ¹⁰ Vandonge vendi va muihuile yikeye, na kuhandeka nguavo, ''Vati vaka kuthona veku handeka ngechiye ha kulivanga Eliya na pande kuinja?'' ¹¹ Yesu ua kuanyene na ku handeka nguendi, ''Mua vungulu Eliya akenja na ku hiluitha vyuma vyoshe. ¹² Vuno nji mileka nguange, Eliya nenja laya, vuno ko va mu dhivukile yikeye. Nambe, keho va pangele nkala vyoshe va yonguele ku li vakevo. Muye vene, Muna Muntu nendi lalo akayanda ku mavoko avo.'' ¹³ Keho vandonge va dhivukile ngechiye ua handekele kuli vakevo vya Youano muka kumbuitika. ¹⁴ Muye va hetele kumbunga, muntu umo uedhile kuli yikeye, ua tcikamene kumesho endi, na ku handeka nguendi, ¹⁵ ''Muene, nju vuile munange ua lyala ngodhi,muomu ali na ku shinya na kuyanda muakama. Muomu ue ku uila mu tuhya ndi mumema vintcimbu vya vingi. ¹⁶ Keho nja mutualele ku vandonge vove, vuno ko vathele ku mukanguitha. ¹⁷ Yesu ua kuanyene na ku handeka nguendi, ''Eni mishovo ya vimpata, vintcimbu vingahi nji ka kala hamo lika neni? Ntcimbu vingahi nji ka miyandela? Mu neheni kulyange.'' ¹⁸ Yesu ua mu handekelele na vimpundhi vya kuvihya, vya tuhukile muli yikeye, na mukuenje ua kangukile ku ntcimbu yiye. ¹⁹ Keho vandonge vedhile kuli Yesu kua lika lyavo na ku handeka nguavo, ''Vika etu ko tuathele ku chumbila kuti?'' ²⁰ Yesu ua handekele kuli vakevo nguendi, ''Muomu lya ku tcelela kueni kua kundende. Muomu mua vungulu nji handeka kuli yeni nguange, nga muli na ku tcelela ngue kambuto ka chili mu ka handeka ku mukinya ngueni, 'Tunda kuno, na kuye,' keho ukenda, nga nachimo chahi chika mihona.'' ^{21 22} Keho omo vakele mu Ngalileya, Yesu ua handekele ku li vandonge vendi, ''Na Muna Muntu va ka muhana ku mavoko avantu, ²³ keho vaka mutcihya yikeye, na mu litangua lya muchitatu va ka mushitula.'' Vandonge vakele na vuthiua uakama. ²⁴ Muye va hetele ku Kapenama, vaka kutambula lithimu vedhile kuli Petulu na ku handeka nguavo, ''Mulongethi ueni ke ku fueta lithimu ndi?'' ²⁵ Ua handekele nguendi, ''Mukemuo.'' Muye Petulu ue dhile ku njivo, Yesu ua li vangele ku handeka kuli yikeye keho ua handekele nguendi, ''Vika uthinganyeka Simone? Vimyene vya hano hantci ve kutambula lithimu ndi? Kuli vana vavo vavamala ndi ku li vakuavo?'' ²⁶ ''Kuli vakuavo, '' Petulu ua kuanyene ko. ''Keho vana va vamala va na vutuka,'' Yesu ua handekele nguendi. ²⁷ Vuno kuteua ngechiye tu va shevuitha vaka kutambula lithimu, kaye ku Kalunga ndonga, lyumbile mu mbango, keho uka nona yintci uye ua ku livanga. Muye uka fukula kanua, uka uana mo vimbongo. Tambula keho hana kuli vaka kutambula lithimu muomu yange nove.