¹ Ha ntcimbu yiye vandonge vedhile kuli Yesu na ku handeka nguavo, ''Yiya uakama muvumuene vua muilu?'' ² Yesu ua thanene kanike umo ua mundende enje kulyendi vavenya, ua mutumbikile hakati kavo, ³ keho ua handekele nguendi, ''Vungulu nji handeka kulyeni nguange, kuvanga muna tenguluka na kukala ngue munike ua mundende, ko muka kovela mo mu vumuene vua muilu. ⁴ Ngocho vene, uye uoshe ali kehetha ngue kanike ua mundende ou yikeye uakama mu vumuene vua muilu. ⁵ Uye uoshe aka tambula kanike ua mundende ou mulidhina lyange na tambula yange. ⁶ Vuno uye uoshe aka shevuitha umo ua kanike ua mundende umo uye ua tcelela mulyange, china mu vuahela ngechiye ku mu haka livue lyakama mu ntcingo yendi, keho ngechiye vaka mumbile mu Kalunga ndonga. ⁷ ''Chikele kuli vaka hantci muomu vya ku shevuitha! Muomu vukovelelo vua ku shevuitha vuna pande kuinja, vuno chikele kuli muntu uye hali yikeye unenja ukovelelo ua ku shevuitha! ⁸ Nga mavoko ndi vmyanja yeni vika mishevuitha, vi vatule ko na ku vyumbila kuti kulyove. China vuahela ku kovela mu muono chilema ndi muka kuvenduka chili munima ku kala na mavoko avali ndi na myanja, keho vakumbile mutuhya ko ve kudhima. ⁹ Nga lisho lyove li kushevukitha, li chakumune mo na ku lyumbila kuti kuli yove. China ku vuahela ku kovela mu muono na lisho limo lika chili munima ku kala na mesho avali keho va kumbile lutengo lua tuhya. ¹⁰ Taleni ngechiye keti mu yengule umo ua va vamo va vandende. Muomu nji na handeka kuli yeni ngechiye nguange tungelu tuavo muilu ntcimbu yoshe va li naku tala - tala ku chihanga cha Tata uye ua muilu. ^{11 12} Vati muna thinganyeka? Nga muntu umo ali na chihita cha vinjui, keho umo na dhimbala, keti ethela vaye makumi atanu na auana na atanu na vauana, keho aye ku mukinya athetele umo uye na dhimbala? ¹³ Nga na mu uana, mua vungulu nji handeka kulyeni nguange, aka yolela muakama kutuvakana vaye makumi atanu na uana na atanu navauana vaye vaku yeneka kudhimbala. ¹⁴ Mungila yiye vene, keti chiyongola cha Yishe yeni ua muilu ngechiye umo uava va vandende vaka dhimangana. ¹⁵ ''Nga muna noko ua lyala aku vihithila, kaye uka mulekethe mulonga uendi hakati keni lika. Nga aka kutolilila una muuana munanoko. ¹⁶ Vuno nga ka ku tolilile yove, tambula umo ndi vavali vakuavo hamo lika nove ngechiye mukanua ka vavali ndi vatatu vumbangi kunkala lijui lyoshe aka litave. ¹⁷ Keho nga aka vyana ku va tolilila kuli vakevo, lekeni kuli vaka mbunga. Nga lalo na vyana ku tolilila vaka mbunga, akale kumesho ove ngue muka vifuti na vaka lithimu. ¹⁸ Mua vungulu nji kumileka nguange, nkala vyoshe vyuma vimu ka kuta hano hantci vaka vikuta na muilu, na nkala vyoshe va ka vutula hano hantci na muilu vana vi vutula. ¹⁹ Mua vungulu nji mileka nguange, nga hakati keni muna lyuvuathana hano hantci chuma chimo lika ku chilombela, vaka vapangela cho vakevo kuli Tata uye ua muilu. ²⁰ Muomu kuye vana likunguluila vavali ndi vatatu mu lidhina lyange, nange nj ka kala mukati kavo.'' ²¹ Keho Petulu uedhile na ku handeka kuli Yesu nguendi, ''Muene, vintcimbu vingahi munana aka vihitha mulonga kulyange keho nji ka mutundithile ho? Noho vintcimbu vitanu na vivali ndi?'' ²² Yesu ua handekele kuli yikeye nguendi, ''Ko nja kulekele vintcimbu vitanu navivali,vuno noho makumi atanu na avali a vintcimbu. ²³ Ngocho vene vumuene vua muilu vuna pu ngue vumuene uye vua yonguele kutanda makongo vangamba vendi. ²⁴ Ngue ua shangumukile kutanda, umo ngamba ua nehele kuli yikeye uye ua mu kolotele yikeye likumi lya makulukadhi a vimbongo. ²⁵ Vuno ka kele nevi vya ku fueta, Muene uendi ua mu lekele yikeye linga alandethe, hamo lika na mu ka njivo yendi na vana vendi na vyoshe viye vya kele navyo, keho linga afuete makongo endi. ²⁶ Ngocho na ndungo ua tcikamene mavuli, na kulomba kumesho endi, na ku handeka nguendi, 'Muene, nju vuile ko ngodhi, keho nji kufueta vyoshe.' ²⁷ Ngocho muene ua ndungo uye , ntcimbu ua muvuililile ngodhi, keho ua muechelele yikeye na ku muechela ku makongo endi. ²⁸ Vuno ngamba uye ua tuhukile ua uanene ngamba mukuavo uye ua mu kolotele chihita cha vimbongo. Keho ua mukuatele yikeye, ua mukuatele muncingo yendi na ku handeka nguendi, 'Nji fuete evi ua nji tambula.' ²⁹ Vuno ngamba mukuavo ua tcikamene na ku kandelela kuli yikeye nguendi, ua handekele nguendi, 'Njuvuile ko ngodhi, njika ku fueta vyo. ³⁰ Vuno ndungo ua kulivanga ua vyanene, ua yile na ku mumbila yikeye mu kamenga noho nafuete yikeye makongo. ³¹ Muye ndungo mukuavo vamuene evi vya yombolokele, va kele na lyova lyakama. Vedhile na ku leka muene uavo vyoshe viye vya yombolokele. ³² ''Keho ua handekele nendi ua muthanene ndungo kuli yikeye vavenya na nguendi, 'Ove undungo ua ku vihya, nji na kuechela makongo ove muomu una lihana kulyange. ³³ Nove lalo china kuvuahela ku vuila ngodhi kuli vandungo vakueni, nambe ngue nji no vuila ngodhi kulyove ndi?' ³⁴ Muene uendi ua kele na vukalu na ku muhana kuli vaka kuyandetha noho na fuete viye vya mu kolotele. ³⁵ Ngocho lalo Tata uange ua muilu aka panga neni nga ka muechela vamuna noko kuvi mbunge vyeni.''