¹ Keho chakele ngechiye muye Yesu ua manethele majui ano, ua tundile ku Ngalileya keho ua yile kuimbo lya Yundeya kulutue lya Ndonga ya Yolondau. ² Mbunga yakama ya mushuamene yikeye, na yikeye ua va kanguithile vakevo kuye. ³ Va Faliseu vedhile kuli yikeye, va muethekele yikeye, va handekele kuli yikeye nguavo, ''Chi tava muntu kuechela mukentu uendi ku milonga yoshe ndi?'' ⁴ Yesu ua va kuanyene na ku handeka nguendi, ''Ko mua tandele ngechiye uye uva pangele ha kulivanga lyala na mukentu ndi? ⁵ Ua handekele navo lalo nguendi, ''Muomu evi vikevyo lyala akatha va yishe na naye keho aka livandakana na mukentu uendi keho ava voshe vavali vaka kala muvila umo lika.' ⁶ Ngocho ko va kele vavali lalo, vuno muvila umo lika. Ngocho vene Kalunga aka va vandakana kumo lika, linga naumo uahi aka va tepetha.'' ⁷ Keho va handekele kuli yikeye nguavo, ''Vika Mosesa ua hanene mukanda ua ku tcihya vulo, keho ko mu kondola? ⁸ Yikeye ua valekele, nguendi, Mosesa omo ku-kaluua cha mbunge yendi ua mu tavele kukondola vakentu veni: vuno kutunda ha kutameka ko cha kele ngachiye. ⁹ Nji handeka kuli yeni nguange, uye uoshe aka vyana mukentu uendi, kuvanga na panga vukuidhi, keho ambata mukuavo, napanga vukuidhi.'' ¹⁰ Vandonge va handekele kuli Yesu nguavo, ''Nga chi na kala ngechiye ku muntu na mukentu uendi, ko cha vuahele kua mbata.'' ¹¹ Vuno Yesu ua handekele kuli vakevo nguendi, ''Keti nkala umo aka tambula vihandeka evi, vuno kulya vaye vo vana hana. ¹² Muomu ku vali vamo va ka kuyeneka kuambata kutunda mumemo avayina yavo, keho vaye va ka kuyeneka kuambata va vapangele kuli va ka kuyeneka kuambata, keho vaye va ka kuyeneka kuambata vali pangethele vavenya vakuyeneka kuambata muomu lya chidhango cha vumuene vua muilu. Uye atha ku tambula vilongetha, muetheleni yikeye atambule vene.'' ¹³ Keho vamu nehelele vanike va vandende linga ava kambeke mavoko yikeye ngechiye ua va kambekele mavoko endi hali vakevo na ku valombela, vuno vandonge vendi ua va vindikile vakevo. ¹⁴ Vuno Yesu ua handekele nguendi, ''Etheleni vanike va vandende, keho keti muva vindike vakevo kuinja kulyange, muomu vumuene vua muilu uakala kuli vakevo.'' ¹⁵ Keho ua kambekele mavoko endi kuli vanike, na yikeye ua tundile ko kuye. ¹⁶ Taleni, lyala umo uedhile kuli Yesu na ku handeka nguendi, ''Mulongithi, vika vimo vya vingulu nji ka panga linga nji ka uane muono ko ue kulenga ua yaye?'' ¹⁷ Yesu ua handekele kuli yikeye nguendi, ''Vika unji huila ange echi cha vungulu? Kuli umo lika ua ku vuaha, vuno nga uyongola ku kovela mu muono, shuama majui alishiko. ¹⁸ Lyala ua handekele kuli yikeye nguendi, ''Mashiko aku vati?'' Yesu ua handekele nguendi, ''Keti uka tcihye, keti uka pange vukuidhi, keti uka puanje, keti uva vangeye, ¹⁹ thingimika yisho na noko, keho yongola voua lihata nove ngue yove vavenya.'' ²⁰ Na muna mukuenje ua handekele kuli yikeye nguendi, ''Vyuma vyoshe evi nji na vyononoka. Vika lalo nji kapanga?'' ²¹ Yesu ua handekele kuli yikeye nguendi, ''Nga una yongola kukala ua ku vuaha, kaye, kalandethe vufuko vuove, na ku hana kuvihutu, keho uka kala na vufuko muilu; keho yakenje, unji shuame yange.'' ²² Vuno muye muna mukuenje muo vuile vya handeka Yesu ngechiye ua yile na vuthiua, muomu ua kele na vufuko vuavuingi. ²³ Yesu ua handekele na vandonge vendi nguendi, ''Mua vungulu nji handeka kulyeni nguange, chika kala mua mukalu muka kufuka ku kovela mu vumuene vua muilu. ²⁴ Nji handeka kulyeni lalo nguange, Ku kala kua kuathi ngamelu ku kovela mulisho lya nguya keho muomu mua mukalu muntu muka kufuka ku kovela mu vumuene vua Kalunga.'' ²⁵ Muye vandonge mu vovuile evi, va komokele na ku handeka nguavo, ''Yiya uye akovoka?'' ²⁶ Yesu ua va talele vakevo na ku handeka nguendi, ''Ku vantu ku vitava, vuno vyuma vyoshe kuli Kalunga vya vyathi.'' ²⁷ keho Petulu ua mukuanyene na ku handeka kuli yikeye nguendi , ''Taleni, tunethela vyoshe na ku kushuama yove. Vika tuka tambula?'' ²⁸ Yesu ua handekele kuli yikeye nguendi, ''Mua vungulu nji handeka kuli yeni nguange, mualolo muye Muna Muntu aka tumama ku chitumamo cha vungulu vuendi, eni muna shuamene yange lalo vaka tumama likumi na vivali vya vitumamo, na kupangula mishovo likumi na vivali yava Yisaleli. ²⁹ Nkala umo uye na thile njivo, vamunana va vamala, vamunana va vakentu, va tata, vanana, vanike, ndi mehya muomu mu lidhina lyange vaka tambula chihita chimo cha chuma chimo cha nathile keho muka hinga muono ko ue kulenga ua yaye. ³⁰ Vuno vavengi vaye valivangele va ka kotokela, keho vaka kukotokela vaka livanga.