¹ ''Muomu vumuene vua muilu vuna kala ngue muntu vavenya muhela ua yile chimene mene mu ku thetela vaka ku panga mu lihya lyendi. ² Kunima na lyuvu na vaka kupanga ku fueta vimbongo, ua va tumine ku lihya lyendi. ³ Endi ua yile lalo ha ntcimbu ya mu chitatu keho ua muene vaka kupanga va nemana ha muhela ua ku landethela. ⁴ Kuli vakevo na handeka lalo nguendi, 'Neni lalo, ka yeni ku lihya, keho nji ka mihana vika vya vungulu.' Ngocho vayile ku vipanga. ⁵ Endi ua yile lalo ha ntcimbu ya muchitanu nayimo keho lalo ha ntcimbu ya mu chitanu nayiuana, keho ua vipangele vene. ⁶ Na ntcimbu ya likumi na yimo ua yile ko na ku uana vakuavo va nemana. Ua handekele kuli vakevo nguendi, 'Vika vyo mu nemanena ngocho litangua lyoshe?' ⁷ ''Keho vahandekele kuli yikeye nguavo, 'Muomu na umo uahi na tu hana vipanga.' ''Ua handekele kuli vakevo nguendi, 'Neni lalo kayeni ku lihya.' ⁸ Muye mu cha hetele chinguedhi, lya venya lihya ua handekele kuli mukuluntu ua vipanga vyendi nguendi, 'Thana vaka kupanga na ku va fueta vimbongo vyavo, kushangumukila kuli uye ua ku manethela ku heta kulyauye ua ku livanga.' ⁹ ''Muye vaka vipanga vaye vali vangele kupanga ha ntcimbu ya mu likumi na yimo, nkala umo ua tanbuile vimbongo vimo. ¹⁰ Muye vaka kulivanga kupanga, va thinganyekele ngechiye vaka tambula vya vingi, vuno lalo vatambuile vimbongo yimo nkala umo. ¹¹ Muye vatambuile vimbongo vyavo, vakele na vu kalu kuli vavenya lihya. ¹² Keho vahandekele nguavo, 'Ava vaka kumanethela kupanga va na pangele ntcimbu yimo lika, vuno una puitha hamo lika netu, hali yetu tuna pangele litangua lyoshue na kuuema ku litanya.' ¹³ ''Vuno vavenya ua kuanyene ko na ku handeka kuli umo uavo nguendi, 'Vakuetu, ku nja pangele vya kuvihya. Keti muatavele hamo lika nange na vimbongo yimo ndi? ¹⁴ Tambula viye vina ku kundama na kuya kungila yeni. Njina shovola ku hana kuli ava vo njina manethela vaka kupanga ngue yeni vene. ¹⁵ Ko chitava ange kupanga vufuko vuange ngue yange vavenya nji na yongola? Ndi lisho lyove lya ku vihya muomu yange nji ua chili ndi?' ¹⁶ Ngocho vaku manethela vaka kala vaku livanga, keho va ku livanga vaka kotokela.'' ¹⁷ Ngue Yesu ua kandukile ku Yelusalema, ua tualele va ndonge vendi likumi na vavali kua lika lyavo, keho mungila yavo ua va lekele vakevo nguendi, ¹⁸ ''Taleni, tuli na kuya ku Yelusalema, keho Muna Muntu vaka muhana kuli vasasendote vakamana va ka kuthona. Keho vaka mukuata yikeye mu ku mutcihya ¹⁹ keho vaka muhana kuli vaka Vifuti vakevo vaka mutcopa, na ku muveta, na ku mukulika yikeye. Vuno ha litangua lya muchitatu aka shituka.'' ²⁰ Keho va yina ya vana vaZembendeu uedhile kuli Yesu hamo lika na munendi ua lyala. Ua tcikamene kumesho yikeye na kuihula vimo kuli yikeye. ²¹ Yesu ua handekele kuli mukentu nguendi, ''Eni muna dhivuka ngechiye evi vimue kulomba ndi?'' Mukentu ua handekele kuli yikeye nguendi, ''Leka ngechiye vana vange ava vavali va vamala linga vatumame, umo kulivoko lyove lya chilyo na mukuavo ku livoko lya chimoshue, mu vumuene vuove.'' ²² Vuno Yesu ua kuanyene na ku handeka nguendi, ''Eni ko mudhivuka vika muli na kulomba. Kuatha munue munganja yiye nji yongola kunuina ndi?'' Keho va handekele kuli yikeye nguavo, ''Etu kuatha.'' ²³ Ua handekele kuli vakevo nguendi, ''Mua vungulu eni muka nua munganja yange. Vuno ku tumama ku livoko lyange lya chilyo na ku livoko lyange lya chimoshue keti yange muka ku vihana, vuno vaka chihana kuli vaye voshe vana vuahethela Tata.'' ²⁴ Muye vandonge vakuavo likumi vovuile evi, vakele na vukalu hamo lika na va munayina vavali. ²⁵ Vuno Yesu ua va thanene vakevo kulyendi vavenya na ku handeka nguendi, ''Muna dhivuka ngechiye vimyene vaka Vifuti veku lihametha vakevo, na vantu va ka vukama vali na ndhili ya ku va shika. ²⁶ Vuno hakati keni. Nambe uye uoshe ayongola kukala ua kama hakati keni hakale ndungo yeni, ²⁷ keho uye uoshe akala ua ku livanga hakati akale ndungo yeni, ²⁸ ngue Muna Muntu kedhilile mu ku mupangela, vuno mu ku pangela, na ku hana muono uendi ua kushula kuli vavengi.'' ²⁹ Ngue mu vayile ku Yeliko, mbunga yakama ya mu shuamene yikeye. ³⁰ Kuye kua kele tupuputua vavali va tumamene ku ngila. Muye vovuile ngechiye Yesu ali na kuhita kuye, va tambakanene nguavo, ''Muene, Muna Ndaviti, tuvuile ko ngodhi.'' ³¹ Mbunga yava patakanene vakevo, kuvaleka linga vaholoke kulu, vuno vatambakanene muakama, ''Muene, Muna Ndaviti, tu vuile ko ngodhi.'' ³² Keho Yesu uemanene ua va thanene vakevo na ku handeka nguendi, ''Vika muyongola ange nji mi pangele vyo?'' ³³ Va mulekele yikeye nguavo, ''Muene, ngechiye mesho etu linga amone .'' ³⁴ Keho Yesu , ua vo vuililile ngodhi, ua kuatele mesho avo. Haye vene mesho avo amuene keho vamu shuamene yikeye.