¹ Muye Yesu ua shelelele ku mukinya, mbunga yakama ya mu shuamene yikeye. ² Taleni, muka vikeka ue dhile kuli yikeye keho ua tcikamene kumesho endi na ku handeka nguendi, ''Muene, nga una yongola, uka nji toketha.'' ³ Yesu uoluele livoko lyendi na ku mukuata yikeye, ua handekele nguendi, ''Nji na yongola . Kutoka vene. Haye vene ua tokele ku vikeka. ⁴ Yesu ua handekele kuli yikeye nguendi, ''Tala ngechiye keti uka vihandeke ku nkala muntu. Kaye mungila yove, kali lekehethe yove vavenya kuli va sasendote, muomu lya vumbangi kuli vakevo.'' ⁵ Muye ua kovelele mu Kapename, kuedhile mukandhita umo kuli yikeye, na ku mulomba yikeye ⁶ keho ua handekele nguendi, ''Muene, ngamba yange nakotha kuimbo ali na vuvedhi ua kalepa keho ali na ku yanda muakama.'' ⁷ Keho Yesu ua handekele kuli yikeye nguendi, ''Nji kenja na ku muthaka yikeye.'' ⁸ Na mukuluntu ua vakandhita ua mukuanyene na ku handeka nguendi, ''Muene, ange ko nji fuila linga ukovele munjivo yange ngechiye. Vuno handeka lika lijui keho ngamba yange aka kanguka. ⁹ Muomu ange lalo muntu uye ua kushuama ku vakuluntu, keho ange njili na vakandhita va kushuama kulyange. Nou nji handeka nendi umo, 'Kaye,' keho aya, kuli vamo vakuavo, 'Yinja,' keho enja, keho kuli ngamba yange, 'Panga evi,' keho ue ku vipanga evi.'' ¹⁰ Muye Yesu uovuile evi, ua komokele na ku handeka kuli voshe vaye va mushuamene yikeye nguendi, ''Vungulu nji handeka kuli yeni nguange, na kumo kunja uanene umo ua kutcelela ngechiye kuahi mu Yisaleli. ¹¹ Nji mileka yeni nguange, vavengi vakenja kuvutkilo ua litangua na ku vuye tangua, keho vaka tumama hamolika na Avilahama, Yisake na Yakomba, mu vumuene vua muilu. ¹² Vuno na vana va vumuene vaka vombila ku muthithi, kuye kuka kala kulila na ku litakinya kumadho.'' ¹³ Yesu ua handekele kuli mukluntu ua vakandhita nguendi, ''Kaye! Ngue mu una tcelela, ngocho linga va chipange muomu yove.'' Keho na ngamba ua kangukile ngechiye ntcimbu yiye vene. ¹⁴ Muye Yesu ua hetele kunjivo ya Petulu, uamuene vayina mueno va Petulu vana kotha na ku vavala mathikathika. ¹⁵ Yesu ua mukuatele ku livoko lyendi, keho na mathika thika amuthile yikeye. Keho ua katukile na ku mupangela yikeye. ¹⁶ Muye chinguedhi cha hetele, vantu va nehele kuli Yesu va vengi vaka vimpundhi vya kuvihya. Ua va tundithile vimpundhi na majui na ku kanguitha voshe vaye vakele na mavedhi. ¹⁷ Evi vya kele mu ku puitha viye viva handekele muli kapolofeto Yisaya, ua handekele nguendi, ''Yikeye ua tambuile kuvavala kuetu na kuambata mavedhi etu.'' ¹⁸ Muye Yesu uamuene mbunga yina mudhengeleka yikeye, ueshikile kuya mu sinya lya Kalunga ndonga ya Ngalileya. ¹⁹ Keho vaka kuthona vedhile kuli yikeye na ku handeka nguavo, ''Mulongithi, nji ka kushuama nkala kuoshe ku kaya.'' ²⁰ Yesu ua handekele kuli yikeye nguendi, ''Vambanje va li na vina, keho na tudhila va muilu vali na mashua, vuno Muna Muntu na yeneka ha kuthakatela mutue uendi.'' ²¹ Vamo va vandonge va handekele kuli yikeye nguavo, ''Muene, ha kulivanga nji tavethele kuya na ku shitika tata uange.'' ²² Vuno Yesu ua handekele kuli yikeye nguendi, ''Nji shuame, keho ethela vaka kutca linga vaka lishitike vavenya.'' ²³ Muye Yesu ua kovelele mu vuato, vandonge vendi va mu shuamene yikeye. ²⁴ Taleni, kuye kua shitukile mpundhi yakama mu Kalunga ndonga, ngechiye na vuato vua yonguele ku lifuikza na mankimba. Vuno Yesu ua kele mutulo. ²⁵ Na vandonge vendi vedhile kuli yikeye na ku muhindula yikeye, va handekele nguavo, ''Tuovole, Muene; tuli na kutca!'' ²⁶ Yesu ua handekele kuli vakevo nguendi, ''Vika muli nalyova, eni va ka kutcelela kua kundende?'' ²⁷ Keho ua hindukile ua holuethele mpundhi na Kalunga ndonga. Keho kuye kua kele kuholoka kua kama. Keho vantu vaye vakomokele na ku handeka nguavo, ''Muntu muka ou, ngechiye nambe mpundhi na Kalunga ndonga yimu shuame yikeye?'' ²⁸ Muye Yesu na kuhetele ku sinya liye keho ku chifuti cha Ngandala, vamala vavali vaye vuya yandethele mpundhi ya kuvihya va liuanene nendi. Va tundile ku vihilo keho vakele na vukalu, ngechiye na umo uahi uathele kuhita mungila yiye. ²⁹ Taleni, vatambakenene na ku handeka nguavo, ''Tuli na vika nove, ove Muna Kalunga? unenja na ku tuyandetha omo ntcimbu kanda yinje ndi? ³⁰ Mualolo hale navo kua kele vutanga vua vangulu vavengi, va kele na kulya. ³¹ Na mpundhi yakuvihya ya mu lombele nguayo, ''Nga utu tuhula, tu tume ngechiye mu vutanga vua vingulu.'' ³² Yesu ua handekele kuli vakevo nguendi, ''Kayeni!'' Na mpundhi ya kuvihya ya tuhukile na ku kovela mu vingulu; keho taleni, vingulu voshe va lupukile vuathi mu chingelengenya na muchishali cha Kalunga ndonga na kutca mu mema. ³³ Vaye vaka kutakametha va teuele va yile kuimbo lyakama na kuambulula vyoshe vi vamuene vaka vimpundhi vya kuvihya. ³⁴ Taleni, vaka membo oshe akama vedhile mu ku liuana na Yesu. Muye muva mumuene yikeye, va mulombele linga atuhuke muimbo lyavo lya lindende.