¹ ''Keti muka pangule, keho nove lalo va ka kupangula. ² Muomu na chipangulo chiye mu pangula nacho, va ka mi pangula nacho, keho na chetheko chiye muetheka nacho, vaka chetheka kulyeni. ³ Vika umona ka chishuakuta kali halisho lya munanoko ua lyala, vuno mukambo uli mulisho lyove ko uka thinganyeka ndi? ⁴ Umba uka handeka kuli vamunanoko nguove, 'Yimana ngocho nji tambule kachishualukuta mulisho lyove,' keho tala muuli mukambo mulisho lyove? ⁵ Eni vaka kulihaka vyo! Ha kulivanga tambula kamukambo kali mulisho lyove, keho uka mone muachili kutunditha kachishulukuta kali mu lisho lya munanoko. ⁶ Chiye cha ku yela keti mu chihane ku tutali, keho vimbaluvila vyeni keti mu vyumbile ku vingulu. kuteua vaka vi lyate na vilyate namyanja yavo, keho ku tenguluka na ku mi thanyona. ⁷ ''Lombeni, keho vaka mihana vyo. Theteleni, keho muka uana. Ngongoleni, keho vaka mishokoluela. ⁸ Muomu nkala uoshe uye a lomba, aka tambula; nkala uoshe athetela, aka uana; keho kuli muntu uye angongola, vaka kushokoluela. ⁹ Ndi yiya umo ueni, nga munendi ua lyala amu lomba mbolo, linga amu hane livue ndi? ¹⁰ Ndi nga amulomba yintci, linga aka muhane linoka ndi? ¹¹ Ngocho vene, nga eni mu vaka milonga muna dhivuka ku hana ngocho vya chili ku vana veni, Yisho yeni ua muilu ka katuvakana muakama ku mihana vyuma vya chili kuli voshe vaye vamulomba ndi? ¹² Ngocho vene, vyuma vyoshe mu yongola vantu vami pangelevyo, muna pande lalo ku vipanga kuli vakevo, muomu akeo mashiko na vupolofeto. ¹³ Koveleni mu chikolo cha chindende. Muomu chikolo chakama na ngila yakuhama yikeyo ngila ya ku tuala ku kutca, keho vantu vavengi vaka kovela mo. ¹⁴ Vuno na chikolo chachindende na yikeyo ngila ya kukola ngechiye yituala ku muono, keho kuye va vandende vaka yiuana. ¹⁵ ''Dhangameni kuli vapolofeto va vishaki, vaye vakenja kuli yeni mu vidhala vya vinjui vuno mukati vana kala vinkuidhi vaka ku kuata. ¹⁶ Uka vamuena ku vushuka vuavo. Vantu ve kuhela vushuka ua vinyu ku vimbimbo ndi vushuka ua mukuyu ku chiti cha mungu ndi? ¹⁷ Ngechiye vene chiti choshe cha chili chima vushuka ua chili, vuno chiti chaku vihya chima vushuka ua ku vihya. ¹⁸ Chiti cha chili ko chatha kuima vushuka ua ku vihya, ndi chiti cha ku vihya chima vushuka ua chili. ¹⁹ Nkala chiti chiye ko che kuima vushuka ua chili va ka chiteta na ku chumbila mu tuhya. ²⁰ Ngocho vene, uka vamuena ku vushuka uavo. ²¹ Keti nkala umo uye a handeka kuli yange nguendi, 'Muene, Muene,' Aka kovela mu vumuene ua muilu, vuno kuli vaye vapanga chidhango cha Tata uye ali muilu. ²² Vantu vavengi vaka handeka kuli yange ku litangua liye nguavo, 'Muene, Muene, ko tua tua polofetelele mu lidhina lyove, mu lidhina lyove ku tua tundithile vimpundhi vya kuvihya, na mu lidhina lyove tua pangele vikomoketho vya vingi?' ²³ Keho nji ka kuanya kuli vakevo nguange, 'Ko nji mudhivuka eni! Tundeni kuli yange, eni vaka kupanga vya kuvihya!' ²⁴ ''Ngocho vene, nkala uoshe uye ovua majui ange na ku a thingimika aka kala ngue muntu uye ua ku dhangama uye atunga njivo yendi ha livue. ²⁵ Keho nyondhi yedhile, na livadhi lyedhile, keho na mpundhi yedhile na kupupa ha njivo yiye, vuno koya lundumukile hantci, muomu luvula luayo lua kele ha livue. ²⁶ Vuno nkala uoshe uye ovua majui ange keho endi ka shuama aka kala ngue lyala ua ku heva uye ua tungile njivo yendi ha musheke. ²⁷ Na nyondhi ya nokele, na livadhi lyedhile na mpundhi ya pupile vya lundumukile keho ya mbndukile hantci, na ku mbanduka kuayo ya vihile muakama. ²⁸ Keho vya kele ngechiye muye Yesu ua manethele kuhandeka majui aa, na mbunga ya komokele ku vilongetha vyendi, ²⁹ Muomu ua va lekele ngue umo uye ua kele na ndhili keho keti ngue vaka kuthona vavo.