¹ ''Dhangameni ngechiye kuteua mu ka pange vungulu vueni kumesho a vantu linga va mi mone, ndi keti mu ka uane chidhangametho kuli Yisho yeni uye ali muilu. ² Ngocho vene muye uhana vimo, keti uli hametbe kumesho ove vavenya ngue mu ve kupanga vaka vishaki mu vi thinangonga na mu vingila, ngechiye linga va va shangale vantu. Vungulu nji handeka kulyeni nguange, vana tambula fueto yavo mu kushula. ³ Vuno muye mu hana vimo kuli Kalunga, livoko lyove lya chimoshue keti lidhivuke evi lipanga livoko lyove lya chilyo ⁴ Ngechiye kuhana kuove kukale mu vu shueke. Keho Yisho yikeye uye ue kumona mu vu shueke aka ku hana fueto yove. ⁵ ''Muye mulomba, keti mukale ngue vaka vishaki, muomu va yongola na kulomba mu vi thinangonga na mu vi mbango vya ngila ngechiye vantu va va mone. Mu vungulu nji ka handeka kulyeni nguange muna tambula vuana vuavo. ⁶ Vuno, muye mulomba , koveleni mu vinjivo vyeni. Shokeni vikolo na ku lomba kuli Yisho ueni, uye ali mu vu shueke. Keho Yisho yeni uye ue kumona mu vu shueke aka mivfueta. ⁷ Muye mu lomba, keti mu hilukile- hilukile mo ngue vaka vifuti ve ku panga, muomu va thinganyeka ngechiye va ka vovue omo majui avo amengi. ⁸ Ngocho vene, keti mukale ngue vakevo, muomu Yisho yeni na dhivuka vyuma vika muyongola kulomba kuli yikeye. ⁹ Ngocho vene lombeni ngechiye: 'Tata uetu uli muilu, linga lidhina lyove vali thingimike ngue ua Kuyela. ¹⁰ Vu Muene vuove vuinje. Linga chidhango chove va chipange hano hantci ngue chili muilu. ¹¹ Tu hane mbolo ya litangua lya lelo. ¹² Tuethele ku makongo etu ngue yetu lalo tu nethela va ka makongo etu. ¹³ Keti utu tuamene ku vyetheko, vuno tuovole kuli umo muka milonga.' ¹⁴ Muomu nga ue chela vantu ku milonga yavo, Yishe yeni ua muilu aka myechela yeni lalo. ¹⁵ Vuno nga ko mu kechela vaka milonga, nambe Yisho yeni ka ka myechela milonga yeni. ¹⁶ ''Muye mu likela kulya, keti mukale chihanga cha vuthiua ngue vaka vishaki vapanga, muomu vakevo va vihitha vihanga vyavo ngechiye vantu va va mone nguavo vana likela kulya mu vungulu nji handeka kuli yeni nguange, va na tambula laya chidhangametho chavo mu ku shula. ¹⁷ Vuno eni, muye mu likela kulya, kuita madhi ku mutue uove na ku tana ku mesho ove ¹⁸ ngechiye eni linga vantu va ku mone nguavo una likela kulya, vuno Yisho yeni lika uye ali mu vushueke; keho Yisho yeni uye a mona mu vushueke aka kufueta. ¹⁹ ''Keti muli lundikile yeni vavenya vufuko hantci, hano tuntembulu na nkalaue ve ku vulya, keho kuye vaka kupuanja va pokola na ku puanja. ²⁰ Vuno, lilundikile yeni vavenya vufuko vuli muilu, nambe nkalaue ko va ka vu vihitha, keho kuye va ka kupuanja ko va katha ku pokola na ku puanja. ²¹ Muomu kuye kua kala vufuko vueni, kuke ko lalo ku ka kala vimbunge vyeni. ²² Lisho likelyo mutangeko ua muvila. Ngocho vene, nga lisho lyove lya chili, na muvila uove uoshe una shulu na mutangeko. ²³ Vuno nga lisho lyove lya kuvihya, na muvila uove uoshe una shulu na muthithi. Ngocho vene, nga mutangeko uye uli mukati una kala muthithi, vati ku hama kua muthithi uye! ²⁴ Naumo uahi apangela vamyene va vali, muomu endi aka dhinda ho umo na ku yongola ho mukuavo, ndi aka yongola ho umo na ku dhinda mukuavo. Ko mu katha kupangela Kalunga na vufuko. ²⁵ Ngocho vene nji na handeka kuli yeni nguange, Keti mume vimbunge vyeni omo lya muono ueni, vika mu kalya ndi vika mu kanua; ndi vya ku mivila, vika mu kadhala. Muomu muono una tuvakana kulya, na muvila utuvakana vidhala ndi? ²⁶ Taleni tudhila va muilu. Ko ve ku kuna ndi kutya ndi ku kunguiya mu vishete, vuno Yisho yeni ua muilu ue ku va litha vakevo. Eni ko mua va tuvakanene vakevo ndi? ²⁷ Keho yiya hakati keni oma mbunge avuedhelela ku vu lahe vua muono uendi? ²⁸ Vika mumina vimbunge omo vidhala? thinganyekeni muila ua mu muthenge, na vika ue ku kula. Ko ue kupanga, keho ko ue ku lidhengela vintanga. ²⁹ Vuno nji na handeka neni nguange, nambe Solomone mu vungulu vuendi vuoshe ka dhalele ngue umo ua vino. ³⁰ Nga muila ua mu muthenge uli lelo lika keho yimene va umbila mu choto, nga Kalunga au dhaleka ngechiye, ka ka tuvakana ku mi dhaleka yeni ndi? Eni vaka lutcelelo lua lundende? ³¹ Ngocho vene keti mu kome vimbunge vyeni na ku handeka ngueni, 'Vika mukalya?' ndi 'Vika mu ka nua?' ndi 'Vidhala vitu kadhala?' ³² Muomu vyuma vyoshe vaka Vifuti veku viyongola, keho Yisho yeni ua muilu na dhivuka ngechiye vimu yongola vene. ³³ Vuno yongola vumuene na vungulu, keho vyuma vyoshe evi vaka mihana vyo. ³⁴ Ngocho vene, keti mume vimbunge ku litangua lya yimene, muomu litangua lya yimene li ko mina alyo vavenya. Kayando kana li puitha litangua lyalyo vavenya.