¹ Muye Yesu uamuene mbunga, uayile ku mukinya. Muye mua tumamene hantci, na vandonge vendi vedhile kuli yikeye. ² Ua shamene kanua kendi na ku valeka vakevo, ua handekele nguendi, ³ ''Vavedhuka vaye vana hutua mu mpundhi, muomu vyavo vili mu vumuene vua muilu. ⁴ Vavedhuka vaye voshe valila, muomu vaka vaholuetha. ⁵ Vavedhuka vaye vaka kuli kehetha, muomu vaka hinga vya hantci. ⁶ Vavedhuka voshe vaye vali nanjala na lihuila lya vungulu, muomu vaka shula. ⁷ Vavedhuka voshe vaye vali na ngodhi yakama, muomu vaka tambula ngodhi. ⁸ Vavedhuka vaka vimbunge vya ku toka, muomu vaka mona Kalunga. ⁹ Vavedhuka vaye vaka kupanga chivovo, muomu vaka va tumbula vana vaKalunga. ¹⁰ Vadhuka vaye voshe vova yandetha muomu lya vipanga vya vungulu, muomu vumuene vuavo vuli muilu. ¹¹ ''Vaku vedhuka yeni muye vantu vaka mituka na ku miyandetha na ku handeka vyuma vyoshe vya ku vihya muomu lya vipanga vyange. ¹² Yoleleni na ku shangala, muomu ku uana kueni kua kama kuli muilu. Muomu mungila eyi vantu vayandethele kapolofeto ua kele kulutue lyeni. ¹³ ''Yeni mukele ua hano hantci. vuno nga kutovala kuna tundu mo mukele, vati uka panga linga uka tovale lalo? Ko uka kala lalo ua chili kuvanga vaka umbila kuti keho vantu vaka ulyatangela na myanja. ¹⁴ Muna kala mutangeko ua hantci. Limbo lyakama liye li vana haka kumukinya keti koli katha kushueketha. ¹⁵ Ndi vantu veku tangeka lambi na ku yihaka muinthi lya chihele, vuno uyihake helu lya tafula, keho linga yitangeke ku nkala uoshe ali munjivo. ¹⁶ Linga lambi yitangeke kumesho a vantu mu ngila yiye ngechiye vamone vipanga vyove vya chili na ku shangala Yishe ueni uye ua muilu. ¹⁷ ''Keti muthinganyeke ngechiye nje dhile mu ku viyitha mashiko ndi vya vupolofeto. Ko njedhile ku viyitha vikevyo, vuno ku puitha mo akeuo. ¹⁸ Muomu vungulu nji handeka kuli yeni ngechiye noho melu na hantci vina hiti, ku majui amandende ndi ku majui alishiko koku ka tundu kandaka kandende, nambe vyuma vyoshe vika heta mo. ¹⁹ Ngocho vene nkala uoshe apokola limo lya majui a lishiko eli na ku longetha vakuavo kupanga ngocho, va ka mutumbula ua mundende mu vumuene vua muilu. Vuno vaye uoshe vaka ashuama na ku vilongetha vakevo va ka va tumbula vakama mu vumuene vua muilu. ²⁰ Muomu nji na handeka kuli yeni ngechiye nguange mpano vungulu vueni vuka tuvakane vungulu vua va ka kuthona na va Faliseo, na hamo hahi muka kovela mu vumuene ua muilu. ²¹ ''Munovuile ngechiye va chi handekele kuli vakevo kuntcimbu ya vashukulu vetu nguavo, 'Keti uka tcihye,' keho, 'Nkala uoshe atcihya vaka muhaka ku chipangulo.'' ²² Vuno nji handeka neni ngechiye nkala voshe uye ali na vukalu na munayina ua lyala vaka muhaka ku chipangulo; keho uye uoshe a handeka kuli muna yina ua lyala nguendi, 'Muntu ua kuvihya!' vaka muhana ku mbunga; na uye uoshe a handeka nguendi, 'Ove litha!' vaka mumbila mu tuhya. ²³ Ngocho vene nga uka likombeleya vuana vuove ku muyombo, keho haye vene ngechiye thinganyeka munanoko ua lyala uye ua kuviyithile yove, ²⁴ ethela vuana kuye kulutue lya muyombo, keho na kuya mungila yove. Ha kulivanga kalihambe na munanoko ua lyala, keho yinja na ku hana vuana vuove. ²⁵ Lichele na muka chidhindo chove ntcimbu u chili nendi mungila, ndi ku teua muka cbidhindo chove aka kutuala kuli vaka kupangula, keho muka kupangula aka kuhana kuli muka kunyunga, keho aka kumbila mu kamenga. ²⁶ Vungulu nji handeka kuli yeni nguange, ko muka tuhuka mo muye noho muna fuete vimbongo vyove vua ku manethela. ²⁷ Mu novu ngechiye va handekele nguavo, ' Keti uka pange vukuidhi.' ²⁸ Vuno nji handeka kuli yeni nguange ngechiye nkala umo uye atala mukentu na lishungu kunima yendi na panga laya vukuidhi hamolika nendi mu mbunge yendi. ²⁹ Nga lisho lyove lya chilyo li ku yandetha, litundithe mo. Muomu china ku vuahela linga chimo cha mbaluvuila yove linga yika dhimbale ngechiye muvila uove uoshe vaka umbile mutuhya. ³⁰ Nga livoko lyove lya chilyo liku yandetha, livatule ko na ku lyumbila. Muomu china ku vuahela ngechiye chimo cha mbaluvuila yamuvila uove linga chidhimbale ngechiye muvila uove uoshe uka ya mu tuhya. ³¹ Va handekele lalo nguavo, 'Uye uoshe avyana mukentu uendi, yikeye amu hane mukanda ua ku tcihya vulo.' ³² Vuno njina handeka kuli yeni ngechiye nguange nkala uoshe avyana mukentu uendi, kuvanga omo vukuidhi, amu pangetha chikuidhi. Uye uoshe aka muambata mukentu ou kunima yo va na muvyana na panga vukuidhi. ³³ Mu novu lalo, ngechiye va handekele ku ntcimbu ya vashukulu vetu, 'Keti uli thinge vishaki, vuno uka panga kumesho a Muene evi vyuna pangethele. ³⁴ Vuno nji handeka kuli yeni nguange, keti muka lithinge, nambe vya muilu, muomu vukevuo vumuene vua Kalunga; ³⁵ ndi vya hantci, muomu vikevyo vilyatelo vya myanja yendi; ndi vya Yelusalema, likelyo limbo lyakama lya Muene. ³⁶ Nambe ulithinge na mutue uove, muomu ko katha kutoketha ndi kulavetha lunkambu lumo. ³⁷ Vuno vihandeka vyeni vikale ngechiye 'mukemuo, mukemuo,' ndi 'Kuahi, kuahi.' Muomu vyoshe vituvakana evi vitunda ku milonga. ³⁸ ''Munovu ngechiye va handekele nguavo, 'Lisho na lisho, keho lidho na lidho.' ³⁹ Vuno nji handeka kuli yeni nguange, keti muka vyane umo uye ali na milonga. Vuno uoshe aku pupa kuchimbange lya chilyo, mutenguluile lalo aku pupe kuchimbange chikuavo. ⁴⁰ Nga umo ayongola ku handeka nove aku akulombe chikoveyo chove, ngechiye muntu uye muhane lalo chiveyo chikuavo. ⁴¹ Uye uoshe aku thindikiya kuvulahe vua chimo kaye nendi mu vulahe vua vivali. ⁴² Hana ku nkala umo uye akulomba, keho keti uka mutalekethe nima kuli uye uoshe ayongola ku lomba. ⁴³ ''Muo vuile ngechiye va handekele nguavo, 'Una pande kuyongola muka lihata lyove na kudhinda muka chidhindo chove.' ⁴⁴ Vuno nji handeka kulyeni nguange, yongola vaka chidhindo chove na kulomba kuli vaye vaku yandetha, ⁴⁵ Ngechiye muka kala vana va Yisho uye ua muilu. Muomu yikeye ue kutuhuitha litangua lyendi ku vaka ku vihya na vaka kuvuaha, na ku noketha nyondhi ku li vaka kuvuaha na va ka ku vihya. ⁴⁶ Muomu nga uyongola vaye va kuyongola yove, vika uka uana mo? Nambe vaka lithimu mukemuo veku panga vyuma vimo ndi? ⁴⁷ Nga umeneka vamuna noko, vika uka panga kuli vaye vakuavo cho? Keti nambe vaka Vifuti vapanga vyuma vimo ndi? ⁴⁸ Ngocho vene muna pande kukala vaku vuaha, ngue Yisho ueni ua muilu ua vungulu.