¹ Keho Mpundhi ya tualele Yesu mulimbalanda lya ngocho linga va ka muetheke kuli Satana. ³ Muye mua likelelele kulya matangua makumi auana na matciki makumi auana, ua kele na njala. ² Muka kuetheka uedhile na ku handeka kuli yikeye nguendi, ''Nga u Muna Kalunga, panga livue likale mbolo.'' ⁴ Vuno Yesu ua kuanyene na ku handeka kuli yikeye nguendi, ''Va na thono nguavo, 'Muntu ka kovoka ku mbolo lika, vuno ku nkala lijui liye litunda mu mukanua ka Kalunga.''' ⁵ Keho Satana ua mu tualele yikeye kunjivo Yakuyela kuimbo lyakama na ku muhaka kuilu lya ka nchongua ka tembele, ⁶ na ku handeka kuli yikeye nguendi, ''Nga u Muna Kalunga, lyumbile yove vavenya hantci, muomu vana thono nguavo, ' Endi aka leka tungelu tuendi mu ku kuovola yove,' Keho, 'Linga vaka kuambate ha mavoko avo, ngechiye keti uka punduke myanja yove halivue.''' ⁷ Yesu ua handekele kuli yikeye nguendi, ''Vana thono lalo nguavo, 'Keti uka muetheke Muene Kalunga kove.''' ⁸ Lalo, Satana ua mutualele kuilu lya mukinya na ku muleketha yikeye vu Muene vuoshe vua hantci hamo lika na vungulu uavo. ⁹ Endi ua handekele kuli yikeye nguendi, ''Vyuma vyoshe evi nji ka ku hana vyo, nga uka tcikama na ku nji lemetha.'' ¹⁰ Keho Yesu ua handekele kuli ykeye nguendi, ''Tunda kuno, Satana! Muomu vana thono nguavo, 'Uka lemetha Muene Kalunga kove, na ku pangela yikeye lika.''' ¹¹ Keho Satana ua muthile, keho taleni, tungelu vedhile na ku mu pangela yikeye. ¹² Muye Yesu uo vuile ngechiye Youano vana muhake mu kamenga, endi ua yile ku Ngalileya. ¹³ Ua tundile ku Nazaleta keho ua yile na ku ka tumama ku Kapename, kuye ku Kalunga ndonga ku Ngalileya kuimbo lya Zembulone na Nafutali. ¹⁴ Evi vina yombolokele ku puitha viye viva handekele kuli ka polofeto Yisaya nguendi, ¹⁵ ''Chifuti cha Zembulone na chifuti cha Nafutali, kulutue lya Kalunga ndonga, kuilu lya Yolondau, Ngalileya ya vaka Vifuti! ¹⁶ Vantu vaye va kele mu muthithi vamuene mutangeko ua kama, na kuli voshe vaye vakele ku membo amandende na muthithimba ua kutca, hali vakevo ha shitukile mutangeko.'' ¹⁷ Kuntcimbu yiye Yesu ua shangumukile kuambulula na ku handeka nguendi, ''Litengululeni, muomu vumuene vua muilu vuli muhyehi.'' ¹⁸ Ngue uendanganene kumukulo ua Kalunga ndonga ya Ngalileya, endi uamuene vamunayina vavali, Simone ua luka Petulu, na Anduleu munayina ua lyala, va kutile manda avo mu Kalunga ndonga, muomu vakele vaka kukuata vantci. ¹⁹ Yesu ua handekele kuli vakevo nguendi, ''Yinjeni, nji shuameni, keho nji ka mihaka vaka kukuata vantu.'' ²⁰ Hantcimbu yiye vene vathile manda avo na ku mushuama yikeye. ²¹ Ngue Yesu ua yile ngocho kuye uamuene vamunayina vavali vamo, Tyango vana vavamala va Zembende na Youano munayina ua lyala. Vakele muvuato hamo lika na Zembende yishe yavo mu ku vuayetha manda avo. Ua va thanene vakevo, ²² keho haye vene vathile vuato na yishe yavo na ku mushuama yikeye. ²³ Yesu uayile ku Ngalileya yoshe, ua longethele mu vi thinangonga vyavo, ua mbuluile mudhimbu ua chili ua vu Muene na ku kanguitha ku nkala mavedhi hakati ka vantu. ²⁴ Na mudhimbu uendi ua yile hanja ku chifuti cha Siliya yoshe, keho na vantu va mu nehelele kuli yikeye voshe vaye vayandele ku mavedhi na ku vavala, vaye yuva yandethele mpundhi yaku vihya, na vaka vikeka, na vaka tulepa. Yesu ua va kanguithile vakevo. ²⁵ Mbunga yakama ya mushuamene yikeye ku Ngalileya, na Ndekapolise, Yelusalema na ku Yundeya, na kulutue lya Yolondau.