¹ Keho mu cha hetele chimene, vakuluntu voshe va vasasendote na va kuluntu va vantu va lyuvuile kuenda Yesu linga va mu tcihye. ² Va mu kutile, va mu tuala, na ku mu hana kuli nguvulu Pilatu. ³ Keho Yundasa, uye ua muendele vungungu, mua muene nguendi Yesu vana mu shaula, ua tengulukile keho ua hiluithile vimbongo makumi a tatu ku vakuluntu va vasasendote na va kuluntu va vantu, ⁴ na ku kuanya nguendi, "Njina viyitha kuenda maninga a kalamba ka mbala." Vuno vakevo va mu kuanyene nguavo, "Etu cho vika? Ovyo vyove vavenya." ⁵ Keho uombilile vimbongo hantci mu tembele, keho ua tundile mo, na ku ya hanja na ku li kuta yendi vavenya. ⁶ Va kuluntu va va sasendote va tambuile vimbongo na ku handeka nguavo, " Keti vyuma vya chili vya ku haka evi vimbongo mu chiketha muomu vina kala ndando ya maninga." ⁷ Va li yonguele kumo lika, va vi landa lihya lya vindeho lya ku shitikila vangendhi. ⁸ Muomu va li tumbuile lihya liye nguavo, ''Lihya lya maninga" na lelo lino. ⁹ Ngocho viye vya kuanyene ka polofeto Yelemiya vya hetele mo, nguendi, "Va tambuile vimbongo likumi na vitatu, ndando yi va hakelele vana va Yisaleli, ¹⁰ na ku yi hana ku lihya lya vindeho, Ngue mua na nji lekethele Muene." ¹¹ Ngocho Yesu uemanene kulutue lya nguvulu, na nguvulu ua muihuile nguendi, Yove Muene ua vaYundeya ndi?" Yesu ua mu tavele nguendi, "Mu u na handeka." ¹² Vuno mu va mu vangeyele va kuluntu va vasasendote na va kuluntu va vantu, ka tavele ko. ¹³ Keho Pilatu ua muihuile nguendi, "Ku uovuile ku vyuma vyavingi vi va kuvangeya ndi?" ¹⁴ Vuno ka tavele ko nambe nguli yimo lika,ngocho vya komokethele nguvulu. ¹⁵ Keho ha chiuano vya kele chilika cha nguvulu mu ku vutula umo ua va ka kamenga u ya shovuele mbunga. ¹⁶ Ha ntcimbu yiye va kele na muka kamenga u va tumbuile nguavo Mbalanambasa. ¹⁷ Keho mu va liuanene hamo, Pilatu ua vehuile nguendi, "Yiya mu thetela nji mu vutule? Mbalanambasa, ndi Yesu u va tumbula nguavo Kilistu?" ¹⁸ Ua vi dhivukile ngechiye Yesu va na mu hana mu livoko lyendi muomu lya chipululu. ¹⁹ Mua tumamene ha chitumamo cha ku panguila, mukentu uendi ua mu tuminine lijui nguendi, "Keti u pange vyuma kuli kalamba kambala. Muomu nji na yanda mua kama lelo ku chilota chendi." ²⁰ Keho vasasendote va kama na vakuluntu va shongangeyele vantu nguavo linga vovole Mbalambasa keho va tcihye Yesu. ²¹ Nguvulu ua vehuile nguendi, Yiya ha kati kava vantu vavali u nji vutula ho?" Vakevo nguavo "Mbalambasa." ²² Pilatu ua vehuile nguendi, "Vika vi nji panga Yesu ua ku tumbula Kilistu?" Voshe va tavele ko nguavo, "Mu ku likeni." ²³ Keho ua kuanyene nguendi, "Muomu vika, na viyitha?" Vuno va tambakanene muakama nguavo, "Mu ku likeni." ²⁴ Ngocho muye Pilatu mua vi muene nguendi vyahi a uana ho, vuno muyoyo lika ua shangumukile, ua tambuile mema ua tana ku mavoko kumesho a mbunga, na ku kuanya nguendi, "Ange ku nja kuatele ko kumaninga ou lyala. Ovyo vyeni vavenya." ²⁵ Vantu voshe va kuanyene nguavo, "Maninga endi a kale halyetu na vana vetu." ²⁶ Keho mukemo mua vutuile Mbalambasa, ua kuata Yesu na ku mu hana linga va mu kulike. ²⁷ Keho va kandhita va nguvulu va kovelethele Yesu mu njivo ya vunguvulu na ku kunguiya mbunga ya va kandhita. ²⁸ Va mu shuluile vidhala vyendi na ku mu dhaleka vidhala vya ku venguluka. ²⁹ Va mu pangelele nkata ya manja na ku mu dhaleka ku mutue uendi, na ku mu haka mulamu mu livoko lyendi lya chilyo. va mu tcekele kemesho endi na ku mu shaula, nguavo, "Hinduka, Muene ua vaYundeya!" ³⁰ Va mu yekuilile mate, keho va tambuile mulamu na ku mu pupa uo mu mutue kushua kumo. ³¹ Mu va mu shauile, va mu shuluile vidhala na ku mu dhaleka vidhala vyendi vavenya, na ku mu tuala linga va ka mu kulike. ³² Mu va tuhukile mo, va uanene lyala ua ku Silene ua ku luka Simone, u va kakateyele kuya nendi vutciki vuye linga a mbate chiti cha ku lindakana. ³³ Vedhile ku muhela u va tumbula Ngolongota, yina languluka nguavo "Muhela ua Vikola." ³⁴ Va mu hanene vinyu vya kushova shova na nyanga anue. Vuno mua makelele ko, ka nuine ko. ³⁵ Mu va mu kulikile, va lya vadhelele vidhala vyendi mu kueha, ³⁶ va tu mamene na ku mu takametha. ³⁷ Helu lya mutue uendi va thoneneho mulonga uendi, nguavo, "Ou yikeye Yesu, muene ua vaYundeya." ³⁸ Vaka ku puanja vavali va va ku likile kumo lika nendi, umo ku chilyo chendi na mukuavo ku chimoshue. ³⁹ Vaye voshe va hitile mu ngila va mu shauile, na ku lipuka ku mitue ⁴⁰ nguavo, "Ove ua yonguele ku viyitha tembele nguove u yi tunge mu matangua a tatu, lyohyele yove vavenya! Nga chili u Muna Kalunga, li shukule ko ku chiti cha kulindakana!" ⁴¹ Mungila yiye vene na vasasendote vakama mukemo mu va mu shauile ngocho, na va ka mathona na vakuluntu, na ku kuanya nguavo, ⁴² "Uo hyelele vakuavo, vuno katha ku lyohyela. Endi yikeye Muene ua va Yisaleli. A shuluke ku chiti, keho linga tu mu mone. ⁴³ Ua tcelela muli Kalunga, mualolo Kalunga a muohyele honi, nga Kalunga a yongola ku muohyela. Muomu ua kuanyene lalo nguendi, 'Ange nji Muna Kalunga."' ⁴⁴ Na vaye vo va mu kulikile kumo lika nendi va mu shauile lalo. ⁴⁵ Keho ku shangumuka ha ntcimbu ya mu chi tanu na yimo mithithi yedhile hantci hoshe noho ha ntcimbu ya mu chitanu na yiuana. ⁴⁶ Mu ya hetele ntcimbu ya mu chitanu na yiuana, Yesu ua tambakanene na lijui lya kama nguendi, Eli, Eli, lama sabachthani?" yina tumbulaa nguayo, "Kalunga kange, Kalunga kange, vika u na njechelela?" ⁴⁷ Mu va vyuvuile vaye va kele ho, va kuanyene nguavo, "Tolileni yo ua thana Eliya." ⁴⁸ Haye vene umo uavo ua shatukile ua ka tambula siponja, ua yi shulitha na viniu vya kushasha,, ua vi haka ku lihongo, na ku mu hana linga a nue. ⁴⁹ Voshe cho va kuanyene nguavo, "Muecheleni. Tu mu taleni nga Eliya enja a ku muohyele." ⁵⁰ Keho Yesu ua tambakanene lalo na lijui lya kama na ku li hana chithithimba chendi. ⁵¹ Taleni, ntanga ya mu tembele va na yi tete havali kushangumukila kuilu noho hantci, na livu lya li yemangele, na mavue a li tepele. ⁵² Vimbumbo vya fukukile, na mivila ya vantu va ndandele tulo tua kutca ya hindukile. ⁵³ Va tuhukile mu vimbumbo ha ku shituka kuendi, va kovelele mu limbo lya kuyela, keho va li yomboluele kuli vavengi. ⁵⁴ Mualolo mu kuluntu ua va kandhita na vaye va kele mu ku takametha Yesu va muene Ku li yemanga kua livu na vyoshe viye vya yombolokele, vovuile lyova na ku kuanya nguavo, "Vuchili kuma ou Muna Kalunga." ⁵⁵ Vakentu vavengi va shuamene Yesu kutunda ku Ngalileya va ku mu pangele vya yonguele va vi muenenene hale. ⁵⁶ Hakati kavo ha kele Malia Mandalena, Maliya vayina ya Tyango na Yosefe, na vayina ya vana va Sembendeu. ⁵⁷ Mu cha hetele chinguedhi, kuedhile muka kufuka umo ua ku Alimateya, lidhina lyendi yikeye Yosefe, uye ua kele umo ua vandonge va Yesu. ⁵⁸ Uedhile kuli Pilatu na ku mu lomba muvila ua Yesu. Pilatu ua tumine ku ka mu hana uo. ⁵⁹ Yosefe ua tambuile muvila, Ua u dhengeyele mu ntanga ya ku toka ya yi ngulu, ⁶⁰ na ku ka u haka mu mbumbo ya yiha yendi vavenya yiye ya hindile ku livue. Keho ua thindumuinine ko livue lya kama ku chikolo cha mbumbo keho ua tundile ko. ⁶¹ Maliya Mandalena na Maliya mukuavo hova kele, va tumamene thinya liye lya mbumbo. ⁶² Litangua litangua lya kushuama ko, lya kele litangua lya ku li vuayethela, va sasendote va kama na vaFaliseo va li kunguluile na Pilatu. ⁶³ Va kuanyene nguavo, "Muene, tu na vuluka nguetu uye mu ka vishaki mua kele na muono, ua kuanyene nguendi 'Munima ya matangua a tatu a ka shituka lalo.' ⁶⁴ Keho honi shika nguove mbumbo va yi nyunge noho litangua lya mu chitatu, nga ngocho vandonge vendi va ka mu puanjamo na ku ka kuanya nguavo, 'Na shituka ku kutca,' keho vishaki vi ka tuvakana ha ku livanga." ⁶⁵ Pilatu ua va lekele nguendi, "Tambuleni va kandhita. Yemu ka takamethe vuino ngue mu mu vi dhivukila." ⁶⁶ Keho va yile na ku ka takametha mbumbo, na ku fuika ko livue na ku haka ko va kandhita.