¹ Kunima ya matangua a thapalalo, ngue haye litangua lya kulivanga lya muchivike, Maliya Mandalena na Maliya mukuavo vedhile kutala mbumbo. ² Taleni, kuye kua kele kungangama kuakama hantci, muomu kangelu ua Muene ua shulukile muilu, uedhile keho ua thindumuine ko livue, keho va tumamene ho. ³ Chihanga chendi cha kele ngue muhyato, na vudhalo vuendi ngue mema aku konda. ⁴ Vaka ku takametha mbumbo va kele na lyova na ku kala ngue vantu va ka ku tca. ⁵ Kangelu ua kuanyene ua lekele vakentu na ku handeka kuli vakevo nguendi, ''Keti mukale na lyova, muomu nji na dhivuka ngechiye muli na kuthetela Yesu, uye yiva kulikile. ⁶ Endi ua hiko kuno, vuno na shituka, ngue mua milekele. Yinjeni taleni ha muhela haye Muene ha kothele. ⁷ Kayeni vuathi na ku leka vandonge vendi ngueni, 'Endi na shituka ku vatci. Taleni, endi aya kulutue lyeni ku Ngalileya. Kuye muka mumona yikeye.' Taleni, nji na mileke yeni.'' ⁸ Vakentu va tundile vuathi ku mbumbo na lyova na ku yolela kua kama, keho va shatukile ku kaleka vandonge vendi. ⁹ Taleni, Yesu ua li uanene navo na ku handeka nguendi, ''Chihindu!'' Na vakentu vedhile, na ku kuata vilyato vyendi na ku mulemetha yikeye. ¹⁰ Keho Yesu ua handekele kuli vakevo nguendi, ''Keti mukale nalyova. Kayeni muka leke vamunana vaye ku Ngalileya. Kuye ku kekuo vaka nji muena.'' ¹¹ Vuno muye vakentu vakele na kuya, taleni, vamo vaka kutakametha vayile kuimbo lyakama na ku leka mukuluntu ua va sasendote vyuma vyoshe viye vya yombolokele. ¹² Muye vasasendote muva liuanene na vakuluntu na kuli handeketha vavenya, va hanene vimbongo vya vingi kuli vaka ndhita ¹³ na ku valeka vakevo nguavo, ''Valeke va kuavo nguavo, 'Vandonge va Yesu vedhile matciki na ku puanja mo muvila uendi ntcimbu tuna kothele.' ¹⁴ Nga echi chi kaheta ku li nguvulu, keho tuka mudhika tu muo hyela.'' ¹⁵ Ngocho vakandhita va tambuile vimbongo na ku panga ngue muye va va lekele. Keho nguavo evi vya shanduile hakati kava Yundeya na ku litangua lya lelo. ¹⁶ Vuno vandonge likumi na limo vayile ku Ngalileya, ku mukinya uye ua veshikile Yesu vakevo. ¹⁷ Muye mu va mumuene, va mu lemethele yikeye, vuno vamo vakele na vimpata. ¹⁸ Yesu uedhile kuli vakevo keho ua va lekele vakevo na ku handeka nguendi, ''Ndhili yoshe vana yi hana kulyange muilu na hano hantci. ¹⁹ Kayeni ngocho vene na ku panga vandonge ku vifuti vyoshe. Va mbuitikeni vakevo mu lidhina lya Tata, ne li Mona, na Mpundhi Yakuyela. ²⁰ Valongetheni ku takametha vyuma vyoshe viye nji na mi lekele yeni. Taleni, nji li neni ntcimbu yoshe, nambe ku myaka ko ye kulenga ya yaye.''