¹ Vya kele ngechiye muye Yesu mua manethele kuhandeka, ua kuanyene na vandonge vendi nguendi, ² "Muna vi dhivuka ngechiye munima ya matangua avali litangua lya Pasovala li kenja, Muna Muntu va ka mu hana linga va ka mu kulike." ³ Keho mukuluntu ua vasasendote na va kuluntu va vantu va li kunguluile hamo lika ku muhela ua sasendote ua kama, uye yu va tumbula nguavo Kayafase. ⁴ Va lyuvuile kumo linga va kuate Yesu mu vushueke va mu tcihye. ⁵ Muomu va kuanyene nguavo, "Ku va vi pangela mu chilika, ku teuetha muyoyo u ka katuka mukati ka vantu." ⁶ Ntcimbu Yesu a chili mu Mbetaniya ku njivo ya Simoni muka vikeka, ⁷ ua tumamene ku tafula, mukentu uedhile kulyendi na ntadhi ya livue ya madhi a mangulu, keho ua a mbalumuine ku mutue uendi. ⁸ Vuno mu va vimuene vandonge vendi, va kele na ku handeka nguavo, "Muomu vika a viyithila ngechi? ⁹ Evi nga kua landetha ha ndando yakama linga viye ku vihutu." ¹⁰ Vuno Yesu, mua vyuvuile, ua vehuile nguendi, "Vika mu hanena vishoti kulyou mukentu? Muomu na nji pangela vyuma vya vingulu. ¹¹ Ntcimbu yoshe mue ku kala na vihutu, vuno ange ku mu ka kala nange lalo. ¹² Ngocho mua netila madhi ha muvila uange, na vi pangela ku shitika kuange. ¹³ Vuchili nji mi leka, kuoshe kuye ku vambulula vimpande vya chili mu chifuti choshe, evi vya na panga ouy mukentu va ka vi kuanya mu ku mu vulukila ho." ¹⁴ Keho umo hakati ka vandonge likumi na vavali, u va tumbula nguavo Yundasa Sakalyota, ua yile ku vakuluntu va vasasendote ¹⁵ na ku ku handeka nguendi, "Vika mu yongola ku nji hana linga nji mi hane ye?'' Keho va muethekelele makumi atatu a vimbongo vya livue lya kuvuaha. ¹⁶ Kutunda haye ua uanene ntcimbu ya ku mu hana kuli vakevo. ¹⁷ Ngocho litangua lya ku livanga lya mbolo ya kuyeneka hingo vandonge vedhile kuli Yesu na ku muihula nguavo, "Muhela uka u yongola linga tu ka ku vuayethele vyakulya vya Pasovala?" ¹⁸ Ua va lekele nguendi, " Yeni muimbo lyakama kuli umo lyala na ku handeka yikeye ngueni, 'Mulongishi na handeka nguendi, "Ntcimbu yange yi na pu mo. Nja ku pangela Pasovala yange ku njivo yove na Vandonge vange."" ¹⁹ Vandonge va pangele ngue mua va lekele Yesu, keho va ka vuayethele vyakulya vya Pasovala. ²⁰ Muye mu cha hetele chinguedhi, ua tumamene mu ku lya hamo lkika na vandonge vendi likumi na vavali. ²¹ Ngue mu va kele na ku lya, ua handekele nguendi, "Vuchili nji mi leka nguange umo ha kati keni a ka njenda vungungu. ²² "Vakevo vovuile vuthiua, keho nkala umo ua shangumukile ku muihula nguendi, "Chili keti yange vene, Muene?" ²³ Ua va tavele nguendi, "Uye uoshe a mbuitika munye uendi kumo lika nange ha lilonga yikeye vene a ka njenda vungungu. ²⁴ Muna Muntu a ka ya, ngue mu va na thono. Vuno chikele chendi uye uoshe a kenda Muna Muntu vungungu! Chi na vuaha nga yikeye ku va mu themene." ²⁵ Yundasa, uye a ka muenda vungungu ua muihule nguendi, "Yange vene Mulongishi?" Ua mu tavele nguendi, " Omuo mu na vi handeka yove vavenya." ²⁶ Muye mu va lile, Yesu ua tambuile mbolo, ua yi vedhikithile, keho ua yi tavuile. Ua yi hanene ku vandonge vendi na ku handeka nguendi, "Tambuleni, lyeni. U keuo muvila uange." ²⁷ Ua tambuile nganja ua lombele, keho ua va hanene na ku handeka nguendi, "Nueni, mu va voshe. ²⁸ Muomu akeo maninga ange a lyuvathano liye loiva na mbalumuina vavengi mu ku vechela ku milonga yavo. ²⁹ Vuno nji mi leka nguange, ku nji ka nu lalo ku vushuka vua vinyu eyi, noho ha nji ka nuina neni mu vumuene vua Tata." ³⁰ Muvembile lidhina, va tuhukile na kuya ku Mukinya ua Oliveta. ³¹ Keho Yesu ua va lekele nguendi, "Mu va voshe mu ka nji vyana ku vutciki, muomu mukemo mu va na thono nguavo, 'Nji ka kuata mu ka ku takametha vutanga vua vinjui vu ka li shandoka.' ³² Vuno mu va ka nji shitula, nji ka ya ku lutue lyeni ku Ngalileya." ³³ Vuno Petulu ua kuanyene nendi nguendi, "Nambe voshe va ka ku vyana, ange ku nji ka ku vyana." ³⁴ Yesu ua mu kuanyene nguendi, "Vuchili nji ku leka, vutciki vuno vene, kulutue linga ndemba a tambeke, u ka nji vyana lutatu." ³⁵ Petulu nguendi, "Nambe nga nji tca kumo lika nove, ku nji ka ku vyana." Vandonge voshe navo mukemo mu va kuanyene. ³⁶ Keho Yesu ua yile navo ku muhela ua ku tumbula nguavo Ngetesemane na ku handeka ku li vandonge vendi nguendi, "Tumameni hano nji chiye mu kulomba." ³⁷ Ua hituile ko va petulu na vana va Sembendeu keho va shangumukile ku kala na vuthiua na vishoti. ³⁸ Keho ua va lekele nguendi, "Muono uange uli na vuthiua, vua ku tca. Kaleni hano mumesho kumo lika nange." ³⁹ Ua shuenene ko hale navo, ua tcikamene ku mavuli, na kulomba. Ua handekele nguendi, Tata, nga kuatha, linga nganja eyi yi nji tuvakane. Vuno, keti ngue chiyongola change, vuno ngue chove. ⁴⁰ Keho uedhile ku vandonge vendi ua ku va uanene va na ndanda, keho uehuile Petulu nguendi, "Vati, ko mua thele ku takametha hamo lika nange? ⁴¹ Takametheni na kulomba kuteua mu uila mu kuetheka. Chithithimba chiyongola, vuno muvila una hono." ⁴² Ua yile lalo lua mu chivali na ku ka lomba. Nguendi, "Tata, nga ku yi nji tuvakana mpano kuvanga nji yi nue, chiyongola chove va chi pange. ⁴³ Muedhile lalo ua ku va uanene va na ndanda, muomu mesho avo a lemene. ⁴⁴ Ua va thile lalo, ua yile na ku ka lomba lua mu chitatu, majui a ku lifua. ⁴⁵ Keho Yesu uedhile ku vandonge vendi na ku handeka navo nguendi, "Nolo munandanda mu huima ko ndi? Taleni, ntcimbu yi na hete, Muna Muntu va muenda vungungu na ku mu hana mu mavoko a vantu va ku vuhya. ⁴⁶ Hindukeni, tuyeni. Taleni mu ka ku njenda vungungu a li muyehi." ⁴⁷ Te nolo a chi kuanya, Yundasa, umo ua vandonge likumi na vavali, uedhile. Na mbunga yakama ya vakuluntu va vasasendote na va kuluntu va vantu. Vedhile na myele na milamu. ⁴⁸ Keho mu ka ku muenda vungungu ua va hanene chileketho, nguendi, "Uye u nji ka tcemba yikeye vene. Mukuateni." ⁴⁹ Haye vene uedhile kuli Yesu, "Njina ku meneka, Mulongishi!" keho ua mu tcembele. ⁵⁰ Yesu ua mu lekele nguendi, "Mukuetu, Panga vyunendela." Keho vedhile, va kambekele mavoko hali Yesu, na ku mu kuata. ⁵¹ Taleni, umo ua vaye va kele hamo lika na Yesu uoluele livoko lyendi, ua shomuene muele uendi, ua kuata ndungo ya mukuluntu ua vasasendote, na ku mu teta lituitui lyendi. ⁵² Keho Yesu ua mu lekele nguendi, "Hiluithila mo muele uove, muomu voshe va kuata muele va ka tca lalo ku muele. ⁵³ Mu u thinganyeka nguove nga ku nja lombele kuli Tata, linga a nji tumine vuingi vua ku tuvakana likumi na yivali ya tungelu ndi? ⁵⁴ Keho vati atha kuhetamo majui a mathona, linga vyuma evi viyomboloke?" ⁵⁵ Ha ntcimbu yiye vene Yesu ua handekele na mbunga nguendi, "Munenja na myele na milamu linga mua ku nji kuate ngue muka ku puanja? Nkala litangua nja tumamene mutembele, ku mua nji kuatele. ⁵⁶ Vuno vyoshe evi vi na yomboloka linga mathona a vapolofeto a hete mo." Keho vandonge vendi voshe a mu thile na ku teua. ⁵⁷ Vaye va kuatele Yesu va mu tualele kuli Kayafase kasasendote ua kama, kuye ku va kele va ka mathona na vakuluntu. ⁵⁸ Vuno Petulu ua shuamene ko hale na limbo lya kasasendote ua kama. Ua kovelele muintci ua ka tumama na misipayi linga a talele vya ku shuama ko. ⁵⁹ Keho vakuluntu va vasasendote na mbunga ya vakuluntu va thetelele vukaleho vua vishaki vua ku vangeya Yesu linga va mu tcihye. ⁶⁰ Kuva uanene nambe vumo vuahi, nambe mu va yombolokele va ka vukaleho va vishaki. Vuno kunima kua yombolokele vavali ⁶¹ na ku handeka nguavo, "Lyala ou ua handekele nguendi, 'Ange kuatha ku lundumuna tembele ya Kalunga keho nji yi tunga lalo mu matangua a tatu lika."' ⁶² Sasendote ua kama ua katukile na ku muihula nguendi, "Ku uatha ku kuanya ko ndi? Ku vyuma evi vi va ku vangeya?" ⁶³ Vuno Yesu ua holokele kulu. Sasendote ua kama ua mu lekele nguendi, "Nji ku shika hali Kalunga ua muono nguange, tuleke nga yove Kilistu, Muna Kalunga ndi." ⁶⁴ Yesu ua mu tavele nguendi, "Omuo vene mu na handeka yove vavenya. Vuno nji ku leka nguange, ku tunda hano u ka mona Muna Muntu na tu mama ku livoko lya chilyo lya Vukama, na kuinja ha mashelua a muilu." ⁶⁵ Keho sasendote ua kama ua tavuile vidhala vyendi na ku kuanya nguendi, "Na li hana vukama! Vika lalo vi tu thetelela vumbangi? Taleni, ngechi mu novu ku li shangaletha. ⁶⁶ Vati mu mu thinganyeka?" Va mu tavele nguavo, "Na vuayela ku tca." ⁶⁷ Keho va mu yekuilile mate kumesho endi na ku mu pupa vipakela, vamo va pupile ma lukuthi ⁶⁸ va handekele nguavo, "Tu polofete, ove Kilistu. Yiya na ku pupu?" ⁶⁹ Keho Petulu ua tumamene hanja lya muimbo, na ngamba ua mukentu uedhile kulyendi na ku handeka mguendi, "Nove kumo ua kele na Yesu ua ku Ngalileya." ⁷⁰ Vuno ua ua vyanene kumesho avo voshe, nguendi, "Ange ku nji dhivuka vyu li na ku kuanya." ⁷¹ Mua tuhukile ku chikolo, ngamba mukuavo ua mukentu ua mu muene keho ua leka vaye va kele ho nguendi, "Lyala ou nendi ua kele kumo lika na Yesu ua ku Nazaleta." ⁷² Keho ua vyanene lalo na ku li ku nkula nguendi, "Ange ku nji mu dhivuka ou lyala!" ⁷³ Munima ya kantcimbu vaye vemaneneho va kuanyene na Petulu nguendi, "Chili nove umo uavo, muomu kuanyetho yove yi kuambulula." ⁷⁴ Keho ua shangumukile ku kunkula na ku li ku nkula nguendi, "Lyala ou ku nji mu dhivuka," haye vene ndemba ua tambekele. ⁷⁵ Petulu ua vulukile majui a Yesu mua kuanyene nguendi, "Kulutue ndemba a ka tambeke u ka nji vyna lutatu." Keho ua tuhukile hanja na ku lila muakama.