¹ Vumuene vua muilu vu na kala ngue vana vakentu vaye likumi va yile na mitangeko yavo linga va ka sheshe muka vulo. ² Vatanu va kele viheve na vatanu va ku dhangama. ³ Vaye vatanu va kuheva mu va nonene mitangeko yavo, ku vambatele madhi. ⁴ Vuno vaye vaku dhangama vambatele mitangeko yavo na madhi. ⁵ Vuno muye va venya vulo ua kele ko ntcimbu, voshe vanengukile, vakothele tulo. ⁶ Vuno mu kati ka vutciki kua kele mudhimbu, nguavo, Taleni, vavenya vulo! Tuhukeni muka mu sheshe. ⁷ Keho vana va vakentu vaye voshe va hindukile, va ua yethele mitangeko vyavo. ⁸ Ngocho vene viheve va handekele na va ka kudhangama, nguavo, Tu haneniko madhi eni ; muomu mitangeko yetu yi yongola kudhima. ⁹ Ngocho vaka kudhangama va handekele ko, nguavo, kuahi, kuteua ka ka pumo hakati keni netu, vuno yeni kuli va kakulandetha linga mukali landele yeni vavenya.' ¹⁰ Ntcimbu va yile na kulanda, venya vulo uedhile, na vaye va li vuayethele kumo mu ku kovela hamo lika nendi mu chiuano cha kulya cha vulo, na chikolo va chishokele. ¹¹ ''Ku nima, ya vaye va kuavo vana vavakenu lalo vedhile na ku handeka nguavo, 'Muene, muene, tu shokolole ko. ¹² Vuno yikeye ua va kuanyene na kuhandeka nguendi, 'Mua vuchili nji mi leka, nguange, ko nji midhivuka eni. ¹³ Ngocho vene litakametheni, muomu ko mudhivuka litangua ndi ntcimbu. ¹⁴ ''Muomu vi na kala ngue muye muntu a ya ku chifuti cheka, a thana vaka vipanga vendi, a tha vufuko vuendi ku li vakevo. ¹⁵ Kuli umo uavo ua mu hanene vinchako vitanu, ku li mukuavo endi vivali, na uye ua hanene nchako yimo lika. Nkala umo ua tambuile ku vimbongo shuama ku chiyongola chendi vavenya, keho ua yile mu vungedhi vuendi. ¹⁶ Na uye ua tambuile vinchako vitanu ua yile ntcimbu yiye vene na ku kapanga navyo keho ua ka uanene mo vinchako vitanu. ¹⁷ Mungila yiye vene, uye umo ua tambuile vinchako vivali ua pangele ngechiye, ua ua nenemo vimo vivali. ¹⁸ Vuno ndungo uye ua tambuile nchako yimo lika ua yile, na ku shueka vimbongo vya muene uendi. ¹⁹ Vuno muye ntcimbu ya kama ya hitile, muene ua ngamba vaye ue dhile na ku tanda navo vimbongo vyendi. ²⁰ Keho uye ua tambuile vinchako vitanu ue dhile, keho ua nehele vinchako vikuavo vitanu. Ua handekele nguendi, 'Muene, ua nji thililile vinchako vitanu. Tala, nji na uana mo vinchako vitanu lalo. ²¹ ''Muene uendi ua mu lekele, nguendi, 'U na panga mua chili, u ngamba ua ku tcelela! U nakala ua kutcelela ha vyuma vya vindende. Nji ka kuhaka ku tumina vyuma vya vingi. Kovela mu ku yolela kua muene uove.' ²² ''Na ngamba uye ua tambuile vinchako vivali ue dhile, ua handekele, nguendi, Muene, ua nji thililile vinchako vivali. Tala, njina vue dhelelako vinchako vikuavo vivali. ²³ Muene uendi ua handekele kuli yikeye nguendi, 'U na panga mua chili, u ngamba ua ku tcelela! U na kala ua ku tcelela ha vyuma vya vindende. Nji ka ku haka mu ku tumina ha vyuma vya vingi. Kovela mu ku yolela kua muene uove. ²⁴ ''Keho uye ua tambuile nchako yimo lika ue dhile, na ku handeka nguendi, 'Muene, nji na dhivuka ngechiye u muntu ua mukalu. Ue ku tya viye ku ua kunine, ue ku kunguiya viye keti vi ua yenekele ku shanduola. ²⁵ Nja kele na lyova, ngocho nja yile na ku kashueka nchako yove muintci lya livu. Tala, njili na viye vya kala kulyove.' ²⁶ Vuno muene uendi ua mu kuanyene, na ku handeka kuli yikeye nguendi, 'Ove u ngamba ua ku vihya na vulenda, u na dhivuka ngechiye nje kutya kuye ku nja kunine na ku kunguiya viye ku nja ku nja shanduile. ²⁷ Ngocho vene nga ua hanene vimbongo vyange ku li vaka ku pungula, na ha kuinja kuange nga nji na tambula vimbongo vyange vavenya hamo lika na vi uanamo. ²⁸ Ngocho vene tambuleni vimbongo vyange na ku vi hana ku va ngamba vakuavo vaye vali na vimbongo likumi. ²⁹ Muomu ku li umo uye ua fuka vya vingi va ka muhana, na yikeye aka kala navyo ku tuvakanena. Vuno ku li umo uye ua kuyeneka kufuka, nambe viye vya kala navyo va ka munyanga vyo. ³⁰ Ngamba uye ua ngocho mu mbilenei hanja lya muthithi, kuye ku ka kala ku lila na ku lishumanga ku madho.' ³¹ ''Muye mua kenja Muna Muntu mu vungulu vuendi na tungelo voshe hamo lika nendi, a ka tumama ku chitumamo cha vungulu vuendi : ³² Keho va ka kunguiya mishovo yoshe ku mesho endi, keho a ka tepetha umo ku mukuavo, ngue kanyungi ue ku tepatha vinjui ku vimpembe ; ³³ Keho a ka haka vinjui ku livoko lyendi lya chilyo, vuno vimpembe ku chimoshue. ³⁴ Keho Muene a ka handeka na vaye va li ku livoko lya chilyo, nguendi, 'Yinjeni, va na vedhukitha Tata, hingeni vumuene vuye vu va mi vuayethele kutunda ha kupanga kua chifuti. ³⁵ Muomu nja kele na njala, keho mua nji hanene vya kulya; nja kele na lihuila, keho mua nji hanene vya kunua; nja kele ngendhi, keho mua nji tambuile; ³⁶ Nja kele mushenga shenga, keho mua nji dhalekele; nja kele na ku vavala, keho mua nji kanguithile ; nja kele mu kamenga , keho mue dhile kulyange.' ³⁷ ''Keho vaka vungulu va ka kuanya, na kuhandeka nguavo, 'Muene, ntcimbu yika tua ku muene na njala, keho tua ku lithile? Ndi na lihuila, keho tua ku nuithile? ³⁸ Ntcimbu yika ua kele u ngendhi keho tua ku tambuile? Ndi mishenga shenga keho tua ku dhalekele? ³⁹ Ntcimbu yika tua ku muene u vavala, ndi mu kamenga, keho tue dhile tua ku ku tale? ⁴⁰ ''Keho Muene a ka va tava na ku handeka nguendi, 'Vuchili nji mi leka, nguange, viye mua pangele kuli umo uava vavandende vamunanana, mua vi pangele kulyange.' ⁴¹ Keho a ka handeka na vaye va ku livoko lya chimoshue, nguendi, 'Tundeni kulyange, eni vaka chithingo, yeni ku tuhya tuye tua ku yeneka ku dhima, tu va pangelele Satana na tungelu vendi, ⁴² Muomu nja kele na njala, ku mua nji hanene vya kulya; nja kele na lihuila, ku mua nji hanene vya kunua; ⁴³ Nja kele ngendhi, ku mua nji tambuile; nja kele mishenga shenga ku mua nji dhalekele; nja vavalele na ku nji haka mu kamenga, vuno ku mua nji hakelele chishoti. ⁴⁴ Keho va ka tava ko na ku handeka, nguavo, 'Muene, ntcimbu yika tua ku muene mu njala, ndi mu lihuila, ndi u ngendhi, ndi mishenga shenga, ndi mu ku vavala, nambe mu kamenga, keho ku tua ku pangelele?' ⁴⁵ Keho a ka va kuanyene na ku handeka nguendi, 'Vuchili nji mi leka, nguange, viye vi mua yenekele ku panga ku umo ua vaye va vandende, ku mua vi pangele kulyange lalo.' ⁴⁶ Ava vakevo va ka kovela mu kayando ku ke ku lenga, vuno vaka ku panga vya vingulu va ka kovela mu muono ku ue ku lenga."