¹ Yesu ua tuhukile mu tembele mu kuya na ngila yendi. Vandonge vendi vedhile na ku mu leketha vi vumbe vya vitembele. ² Vuno yikeye ua va lekele nguendi, "Ku mua muene vyuma vyoshe evi ndi? Vungulu nji mi leka nguange,na limo livue lyahi li ka thala helu lya likuavo liye ha ku ka lyumbila hantci." ³ Mua tumamene ha mukinya ua Oliveta, vandonge vendi vedhile kua ku muihula mu vushueke nguavo, "Tuleke, ntcimbu yika vyuma evi vi ka yomboloka? Chileketho chika tu ka mona cha kuinja kuove na ku lenga kua chifuti?" ⁴ Yesu ua kuanyene nguendi, "Dhangameni kuteua va ka mi dhimbaletha. ⁵ Muomu vavengi va kenja mu lidhina lyange. Va ka kuanya nguavo, 'Yange Kilistu,' keho va ka dhimbaletha vantu vavengi. ⁶ Mu kovua vi ndhita na vihandeka vya vi ndhita. Taleni ngechiye keti mu kale na vishoti, muomu vyuma evi vi na pande ku yomboloka; vuno ku lenga kua chifuti nolo kanda kuhete. ⁷ Muomu vifuti na vifuti vi ka li katukila, vimyene na vimyene vi ka li katukila. Ku ka kala njala na ma ndunduma a livu ku mihela yeka na yeka. ⁸ Vuno vyuma evi vi ka kala lika kushangumuka kua kayando. ⁹ Keho va ka mi tuala ku kayando, va ka mi tcihye: mishovo yoshe va ka midhinda muomu lidhina lyange. ¹⁰ Keho va vengi vakatanguka, na ku lipaya umo na mukuavo, keho va ka lidhinda umo na mukuavo. ¹¹ Vapolofeto va vengi vavishaki va ka katuka na ku tanganetha va vengi. ¹² Muomu lya va ka lilanetha, chidhango chava vengi chika tontola. ¹³ Vuno uye a koletha noho ha kumanethela a ka uana muono. ¹⁴ Mudhimbu ua chili ua vumuene va ka ua mbulula kuvifuti vyoshe ngue vumbangi ku mishovo yoshe. Keho kumanethela kukenja. ¹⁵ ''Ngocho vene, muye mu ka mona mulonga uye ua ku neha vungocho, viye vya handekele kuli kapolofeto Ndaniyele nguendi, Unemana ku njivo yiye ya kuyela ''(Linga vaka kutanda vatolilileko), ¹⁶ ''Nga voshe vaye va li mu Yundeya va teuelele ku mukinya: ¹⁷ Uye a li kuilu lya njivo keti a shuluke na kuambata vyuma viye vili mu njivo yendi: ¹⁸ Na uye ali mu lihya keti aka hiluke akuambate vidhala vyendi. ¹⁹ Vuno chikele kuli vaye va li namemo na vaye va li na ku nyamueka ku matangua aye! ²⁰ Keho lombeni keti muka teue ha ntcimbu ya mathika ndi ha litangua lya thapalalo. ²¹ Muomu ku ka kala matangua a kayando ka kama ngue ku vya kele ko ha kulivanga kua chifuti na ku lelo, kuahi, ndi ko vi kakala ko lalo. ²² Mpano matangua aye vaka tepulula na ntcitu yikovoka. Vuno muomu lya chidhango cha vaye matangua vana tepulula. ²³ Keho nga umo uavo a handeka kulyove nguendi, ' Tala, Kilistu ya uno! Ndi 'Kilistu kuali kuye!' Keti mu ka vi tcelelele. ²⁴ Muomu va Kilistu va vishaki, na va polofeto va vishaki vaka katuka na ku leketha vikomoketho vya kama, ngocho vene ngue ku tuala ku ku viyitha, nga kuatha, nambe kushovola. ²⁵ Taleni, nja milekele kulutue lya ntcimbu. ²⁶ Ngocho vene, nga vaka handeka neni, Taleni, a li mu limbalanda,' Keti mu ye mo mu limbalanda lya ngocho. Ndi, 'Taleni, ali mukati ka njivo, ' Keti mu ka vitave. ²⁷ Muomu ngue muhyato u tuhuka ku vu ku vukilo vua litangua na ku tangeka ku vutokelo vua litangua, ngocho mu chi kala kuinja cha Muna Muntu. ²⁸ Nkala kuoshe kuli kathitu ua ku tca, kuye ku keko ku ka likunguluila makuvi. ²⁹ ''Vuno ntcimbu yiye vene ku nima ya kayando ka matangua aye, litangua lika kala mu muthithi, na ngonde ko yika hana myedhi, na vintanga ntanga vi ka ua kutunda muilu, na ndhili ya muilu yika ngangama. ³⁰ Keho ngocho chidhivukitho cha Muna Muntu chi ka lileketha muilu, keho mishovo yoshe ya hantci yi ka lila. Va ka mona Muna Muntu yo uenja ha mashelua a muilu na ndhili na vungulu vua kama. ³¹ A ka tuma tungelo tuendi na lijui lya kama lya lumbendo, keho va ka likungulula kumo lika vaye va na shovuele ku mihela yi uana, ku tunda ku ku manethela kua lilu na ku heta ku likuavo. ³² ''Lilongetheni mana ku chiti cha mukuyu. Muye mu chi tuikilila vimaho ku mintango ya cho, mu na dhivuka laya ngueni ntondue yili hamuyehi. ³³ Keho lalo, mu mu mona vyoshe evi, dhivukeni ngueni ali hamuyehi, ku vikolo. ³⁴ Vuchili nji mi leka nguange, limo eli kuli ka tci noho vyuma vyoshe vina yomboloka. ³⁵ Lilu na chifuti vi ka tca, vuno majui ange ka a ka tci. ³⁶ Vuno na umo uahi a dhivuka litangua nambe ntcimbu,nambe tungelu va muilu, ndi Mona, vuno kuvanga Yishe lika vavenya. ³⁷ Ngue mua kele matangua a Noua, Na Muna Muntu vene ngocho a kenja. ³⁸ Muomu ngue mu matangua aye kulutue lua luhanjo vantu va lile va nuine, va lyambatele na ku li hangela vakentu noho litangua liye lya kovelele Noua mu vuato, ³⁹ na vimo vyahi vi va dhivukile ko noho luhanjo lua ku va tambuile ho - ngocho na Muna Muntu vene mukemo mua kenja. ⁴⁰ Keho vantu vavali va ka kala mu lihya_umo va ka mu tambula ho, mu kuavo aka thala. ⁴¹ Vakentu vavali va ka tua vunga kumo lika - umo va ka mu tambula ho, mukuavo a ka thala. ⁴² Ngocho vene litakametheni, muomu ku mu dhivuka litangua lya kenja Muene ueni. ⁴³ Vuno vi dhivukeni ngueni, unga vavenya njivo ua dhivukile ntcimbu ya vutciki ya kuinja mu ka ku puanja, yikeye na pande ku litakametha keho nga ka ta vetha njivo yendi linga va yi pokole. ⁴⁴ Ngocho vene muna pande ku li vuayethela lalo, muomu Muna Muntu a kenja ha ntcimbu yiye yi mu na yenekela ku tatelela. ⁴⁵ "Keho yiya ndungo ua vuchili mu ka mana uye ua na haka vavenya njivo mu njivo yendi linga a va hane vyakulya ha ntcimbu ya ku vuaha? ⁴⁶ Ua ku vedhuka ndungo uye muene uendi aka uana a panga muye mua kenja. ⁴⁷ Vuchili nji mi leka ngechiye nguange muene a ka mu haka helu lya vufuko vuendi vuoshe. ⁴⁸ Vuno nga ndungo ua kuvihya a handeka mu mbunge yendi nguendi, 'Muene uange na kala ko ntcimbu,' ⁴⁹ keho a shangumuka ku pupa va ndungo vakuavo, na kulya na kunua hamo lika na va ka ku penda, ⁵⁰ keho muene ua ndungo uye a kenja ha litangua lya na yeneka ku dhivuka. ⁵¹ Muene uendi a ka mu tetanga mu vimpindi hamo lika na va ka vishaki, kuye ku ka kala kulila na ku li shumanga kumadho.