¹ Keho Yesu ua kuanyene na mbunga na vandonge vendi. ² Ua kuanyene nguendi, "Vaka mathona na vaFaliseu vana tumama ha chitumamo cha Mosesa. ³ Keho vyoshe vi va mi tuma vi pangeni, keho vishuameni. Vuno keti mu ka temuinine vipanga vyavo, muomu ve ku tumbula vyuma vuno ku ve ku vi panga. ⁴ Chili, ve ku kuta vutengi vua kulema vua vukalu kuambata, keho va vu tuika ha vitcili vya vantu. Vuno avo vavenya ku va kuatako minye yavo. ⁵ Ve ku panga vipanga vyavo vyoshe linga va li lekethe ku vantu. Va li pangela mikanda ya ku li kutila ha maluholo avo. Muomu va na panga vilombelo vyavo vyakama na ku hametha mi kunduilo ya vidhala vyavo. ⁶ Va li yonguela mihela ya vukama ku vilika na vi tumamo vya vumuene mu vithinangonga, ⁷ na ku va va meneka mua mungulu mu mihela ya ku landethela, na ku va thana valongishi ku vantu. ⁸ Vuno keti va mi thane 'Valongishi,' muomu mulongishi ueni umo lika, keho eni muvavoshe vantu na va munayina yavo. ⁹ Keti mu thane na umo uahi, muomu Yishe yeni umo lika, na yikeye a li muilu. ¹⁰ Nambe keti va mi thane nguavo 'valongishi,' muomu mulongishi umo lika, yikeye Kilistu. ¹¹ Vuno uye a li haka vukama mu kati keni yikeye a ka kala ndungo. ¹² Muomu uye a li haka vavenya ku vukama va ka mu kehetha, na uye a li kehetha vavenya va ka mu kametha. ¹³ Vuno chikele cheni, eni va ka mathona , na vafaliseu, na vingungu! Mua shokela vantu chikolo cha vumuene vua muilu. Muomu ku mu kovelamo yeni vavenya, nambe ku tavethela vaye va thetela ku kovela va vi pange ngocho. ^{14 15} Chikele cheni, vaka mathona, va faliseo na vingungu! muomu mue ku hita mu vi kalunga ndonga na ha vintunda na ku tengulula muntu umo, na muye mu na mu tengulula, mu na mu puitha mu ka ngehena luvali ku mi tuvakana yeni. ¹⁶ "Chikele cheni, va ka ku tuamena tu puputua, eni vaye mukuanya ngueni, 'Nkala uoshe a li thinga mu tembele, navimo vyahi. Vuno Uoshe a li thinga na livue lya vunchele lya tembele, na pande ku vi panga.' ¹⁷ Eni tupuputua va kuheva! vika vya tuvakana, livue lya vunchele ndi tembele yiye ye ku lingitha livue linga li kale lya kuyela? ¹⁸ Keho lalo, ' Uye uoshe a li thinga na muyombo, navimo vyahi. Vuno uye uoshe a li thinga na vuana vuye vua kala ho, na pande ku panga vya na li thingi.' ¹⁹ Eni tupuputua va kuheva! Vika vya tuvakana, kuhana kua muyombo uye ue ku lingitha kuhana kua kuyela? ²⁰ Ngocho vene, uye a li thinga na muyombo yikeye a li thinga navuo na vyoshe vya kala ho. ²¹ Uye a li thinga na tembele a li thinga na uye ua tumama mo. ²² Na uye a lithinga na lilu a li thinga na chitumamo cha vumuene vua Kalunga na uye na tumama ho. ²³ "Chikele cheni, vaka mathona, va faliseu, na vingungu! Muomu mu ka hana chimo kulikumi cha ku vimbuto vya olitela, na endelu na kuminyu, vuno muna thi vipanga vya vingulu vya majui a lishiko_ vungulu na ngodhi na lutcelelo. Vuno evi vikevyo vi mu na pande ku panga keho keti ku tha ko vi kuavo. ²⁴ Eni tupuputua va ka ku tuamena vakueni, mue ku thembulula kathitu ka kandende vuno mu mina ngamelu! ²⁵ "Chikele cheni, vaka mathona, va Faliseu, na vaka vishaki! Muomu mue ku toketha helu lya nganja na lilonga, vuno muintci lyavyo muashula na vishaki na mashungu. ²⁶ Eni va Faliseu va tupuputua! vangeni ku kusha muinthi lya nganja na lilonga, linga na helu lyacho ha vuahe. ²⁷ "Chikele cheni, eni vaka mathona, na vaFaliseu, na vaka vishaki! Muomu muna kala ngue mbumbo yi va na toketha, helu lyayo hahangulu, vuno muintci muna shulu vi tcihya vya vantu va ku tca na madhilo oshe. ²⁸ Mungila yiye vene, neni lalo mue ku moneka vuino hanja ku vantu, vuno mu vimbunge vyeni muna shulu vishaki na madhilo. ²⁹ "Chikele cheni, vaka mathona, na vaFaliseu, na vaka vishaki! Muomu mue ku tunga vi mbumbo vya vapolofeto na ku vuahetha vi mbumbo vya vantu va vangulu. ³⁰ Mue ku kuanya ngueni, 'Nga tua kele ko ku matangua a va yishe vetu, nga ku tua li vandakanene navo mu maninga a vapolofeto.' ³¹ Ngocho vene mue ku lyambuluila yeni vavenya ngueni mu vana va vaye va tcihile vapolofeto. ³² Neni lalo shulitheni vi va viyithile va yishe veni. ³³ Eni manoka, eni vana va mambuambua, vati mu ka teua chipangulo cha ngehena? ³⁴ Ngocho vene, taleni, nji mi tumina vapolofeto na vaka mana na vaka mathona. Vamo vavo mu ka va tcihya na ku va kulika, vamo mu ka va komba mu vithinangonganga vyeni na ku va sheka mu membo na membo. ³⁵ Keho vikenja ko mu ka kala na mulonga ua maninga a vana va mbala, ku tunda ku maninga a Ambele, na ku maninga a Zakaliya muna mbalakiya, vaye va mua tcihile hakati ka tembele na muyombo. ³⁶ Vungulu nji handeka kulyeni nguange, vyuma vyoshe evi vikenja ha mushovo ou. ³⁷ "Yelusalema, Yelusalema, ove ua tcihya vapolofeto na kuasha mavue vantu va va mi tuminine! Lungahi nja tha ku kunguiya vana veni kumo, ngue mua ka kunguiya kathumbi tuana tutiyo mu vimbava vyendi, vuno eni ku mua yonguele! ³⁸ Taleni, va mi thila njivo mu pulungua. ³⁹ Muomu nji mi leka nguange, ku mu ka nji mono ku tunda hano noho mu ka kuanya ngueni, 'Ua vedhika uye enja mu lidhina lya Muene."'