¹ Yesu uahandekele navo lalo muvithimo, uahandekele nguendi, ² "Na vumuene vua muilu vunakala ngue muene uye avuayetha chiuano chavulo cha munendi ua lyala. ³ Ua tumine vandungo vendi ku lyavaye vovathanene mukuinja kuchiuano chavulo, vuno kuve dhileko. ⁴ Mukemo lalo muene ua tumine vandungo vendi, uahandekele nguendi, "Lekeni vaye vo va nathana, "Taleni, njina vuayetha vya kulya vya chinguedhi. Na ngombe yange yakuhindala njina tcihi, na vyuma vyoshe njina vi vuayetha laya. Yinjeni ku chiuano chavulo." ⁵ Vuno kova mutolilile keho vayile ku ivngila vyavo, umo ku lihya lyendi, mukuavo ku vinganyo vyendi. ⁶ Vakuavo vakuatele vandungo vamuene, nakuva yandetha kumo na ku vatcihya. ⁷ Keha muene ua kele na vukalu, ua tumine vaka ndhita vendi na ku ka tcihya vaye vaka ku tcihya na ku tcimika limbo lyavo lyakama. ⁸ Keho uahandekele kuvandungo vendi, "chiuano chavulo chili muhyehi, vaye voshe vova thanene kuva kele nandhili. ⁹ Ngocho vene yeni ku vingila linga mukathane voshe vantu vahita mungila muvuingi vuavo. ¹⁰ Vandungo vayile kuvingila nakutonda vantu voshe vuva uanene, vachili nava vakuvihya. Keho chiuano chavulo chashulile vangendhi. ¹¹ Vuno muye muene mua kovelele mo muku tala vangendhi, ua muene lyala kadhalele vidhala vyaku chiuano chavulo. ¹² Muene ua handekele nendi nguendi, "Mukuetu vati mu una kovela mo uyeneke vidhala vya ha chiuano chavulo? vuno lyala kakele nevi vya ku kuanyako. ¹³ Keho muene uahandekele nava ndungo vendi nguendi, mukuteni mavoko na ku mahindi, keho mumbileni hanja lya muthithi, kuye ku kakala kulila na ku lishumanga kumadho.' ¹⁴ Muomu vantu vavengi vanathana vuno va vandende lika vovana shovola mo. ¹⁵ Keho vafaliseu vayile na ku thinganyeka vati va kuata Yesu muvihandeka vyendi vavenya. ¹⁶ keho vamutuminine vandonge vavo, kumo lika nava va Helonde. Va handekele Yesu nguavo, "Mulongithi, tuna dhivuka ngechiye ove umu ka vungulu, na viye ue kulongetha vya vungulu vua Kalunga. Muomu kuue kutambula vithinganyeka vya vamo, na kupanga ngodhi hakati ka vantu. ¹⁷ Ngocho tuleke, vika uthinganyeka ko? Lishiko lya lingulu kufueta lishimu kuli Sezale ndi kuahi?'' ¹⁸ Vuno Yesu ua dhivukile chipululu chavo na ku handeka nguendi, "Muomu vika mu njethekela, eni vingungu? ¹⁹ Njileketheni vimbongo vya lishimu." Keho va mu nehelele mbongo yimo. ²⁰ Yesu ua va vehuile nguendi, "Chihanga cheya na lidhina lyeya vili ho aha?" ²¹ Vakevo nguavo, "Sezale." Keho Yesu ua va lekele nguendi, "Haneni vya Sezale kuli Sezale, keho vya Kalunga kuli Kalunga vene." ²² Mu va vyuvuile, va komokele. Keho vamu thile haye vene na kuya kuavo. ²³ Ha litangua olyo vene, vaSanduseu, vaye va handekele nguavo kushituka kuahiko, vedhile kulyendi. va muihuile, ²⁴ va handekele nguavo, "Mulongishi, Mosesa ua ua handekele nguendi, 'Nga lyala a tca, na munendi uahi, munayina ua lyala a hinga mukentu uendi linga a mu hakeleho vana.' ²⁵ Kua kele vantu na vamunayina vatanu na vavali. Ua ku livanga uambatele keho ua tcile. Yikeye ka kele na mona, uathile mukentu uendi kuli munayina. ²⁶ Keho ua mu chivali nendi ngocho, ua mu chitatu nendi ngocho, kamane ua mu chitanu na vavali. ²⁷ Munima, mukentu nendi ua tcile. ²⁸ Keho ha kushituka, mukentu ueya a ka kala hakati kava vatanu na vavali? Muomu voshe va muambatele." ²⁹ Vuno Yesu ua kuanyene na ku handeka nguendi, "Muna shevuka muomu ku mu dhivuka majui a mathona na ndhili ya Kalunga. ³⁰ Muomu ku kushituka ku ku kala kuambata ndi ku ka hana mu kuambata. va ka kala ngue tungelu va muilu. ³¹ Vuno vya ku kushituka kua kutca, ku mua tandele viye vya kuanyene Kalunga kulyeni, ua handekele nguendi, ³² 'Yange Kalunga ua Avilahama, Kalunga ua Yisake, na Kalunga ua Yakomba'? Kalunga keti yikeye Kalunga ua kutca, vuno ua muono." ³³ Muye mbunga mu yovuile evi, ya komokele ku vilongetha vyendi. ³⁴ Vuno va Faliseu mu vo vuile ko nguavo Yesu ua holuethele va Sanduseu, va li kunguluile hamo. ³⁵ Umo uavo, mu ka ku dhivuka vuino mashiko, ua muihuile chihula cha kumuetheka, nguendi_ ³⁶ "Mulongishi, lishiko lika lya tuvakana ku majui a lishiko?" ³⁷ Yesu ua mu lekele nguendi, "'Yongola Kalunga Muene uove na mbunge yove yoshe, na muono uove uoshe,na mana ove oshe.' ³⁸ Eli likelyo lishiko lyakama lya kulivanga. ³⁹ Lishiko lya mu chivali nalyo ngue mukemo_'Yongola mukueni ngue yove vavenya.' ⁴⁰ Ha mashiko avali hakeho hana yendamena mashiko oshe na ku li vapolofeto." ⁴¹ Ntcimbu vaFaliseu va chili kungulula hamo, Yesu uehuile chihula. ⁴² Ua handekele nguendi, "Vati mue ku thinganyeka Kilistu? Yikeye muneya cho?" Va kuanyene ko nguavo, "Yikeye muna Ndaviti." ⁴³ Yesu ua handekele kuli vakevo nguendi, "Vati Ndaviti ua mu tumbuile Muene mu muthithimba, ua handekele nguendi, ⁴⁴ 'Muene ua kuanyene na Muene uange nguendi, "Tumama ku livoko lyange lya chilyo, noho nji ka panga vaka chidhindo vove vilyatelo vya myanja yove"'? ⁴⁵ Nga Ndaviti a tumbula Kilistu nguendi 'Muene,' Vati aka kala muna Ndaviti cho?'' ⁴⁶ Na umo uahi uathele ku tava ko nambe lijui limo, na umo uahi lalo uathele ku muihula ku tunda litangua liye.