¹ Kunima yesu na themukile mu Mbetelehema mu Yundeya mu matangua a Helonde Muene, taleni vaka mana vatundile kuvukilo vua litangua na ku heta mu Yelusalema na ku handeka nguavo, ² ''Kuiko ali uye yi vana theme Muene ua va Yundeya? Muomu tuna mono ntanga ntanga yendi yitunda kuvu kilo ua litangua keho tunenja linga tua ku mulemethe yikeye.'' ³ Muye Muene Helonde ua vyu vuile evi, endi ua dheyele , na vaka Yelusalema voshe vakele hamo lika na yikeye. ⁴ Keho Helonde ua thanene voshe hamo lika na vakuluntu va va sasendote na vaka kuthona ha kati ka vantu vaye, keho endi ua vehuile vakevo nguendi, ''Kuiko aka thema Kilistu?'' ⁵ Va handekele kuli yikeye nguavo, ''Mu Mbetelehema mu Yundeya, muomu ngechiye vana thono hali kapolofeto nguendi, ⁶ 'Vuno eni, va Mbetelehema, mu chifuti cha Yundeya, keti ua mundende hakati kava ka kushika mu Yundeya, muomu kuli yove kukenja umo uye aka shika, uye aka kala kutakametha vantu vange va Yisaleli.''' ⁷ Keho Helonde ua vathanene vaka mana vaye muvu shueke ua va konkele nguendi ntcimbu yika ntanga ntanga yiye yina yombolokele. ⁸ Keho ua va tumine ku Mbetelema, na kuhandeka nguendi, ''Kayeni na ku thetela muachili ka mbututu uye. Muye mo mu kamu uana mua ku nji leke ko nange lalo linga nja kuye na ku mulemetha yikeye.'' ⁹ Kunima omo vovuile lijui lya Muene, va yile mungila yavo, taleni ntanga - ntanga yiye va yi muene kuvukilo vua litangua ya va tuamenene kulutue lyavo noho yedhile na kuimana haye ha kele ka mbututu. ¹⁰ Muye muva muene ntanga ntanga, va yolelele na ku yolela kua kama. ¹¹ Keho va kovelele munjivo va muene kambututu nava yina Maliya. Va tcikamene na ku mulemetha yikeye. Va dhituile vitenga vyavo na ku muhana vuana vuavo yikeye livue lya vunchele na vihemba vya ku tcimika na nevi vya ku vuava. ¹² Kalunga ua va nanguile vakevo munjodhi keti va hiluke ku li Helonde, ngocho va yile ku chifuti chavo mungila yeka. ¹³ Kunima omo vana yile, na kangelu ua Muene ua yombokelele kuli Yosefe mu njodhi na ku handeka nguendi, ''Katuka, tambula ka mbututu na va yina, na ku teuela ku Yingito. Tumama kuye noho nji ka kuleka, muomu Helonde aka thetela kambututu ku mu tcihya yikeye.'' ¹⁴ Vutciki vuye Yosefe ua katukile na ku tambula kambututu na va yina na ku ya ku Yingito. ¹⁵ Endi ua ka kele kuye noho ha kutca kua Helonde. Linga vikale ngechiye vika viye vya na handekele Muene ku hitila muli vapolofeto na handekele nguendi, ''Munange nja muthanene ku Yingito.'' ¹⁶ Keho Helonde, muye mua muene ngechiye vaka mana vana mukuithi, ua kele na vukalu. Endi ua tumine na kutcihya tumbututu tua tumala tuye tuakele mu Mbetelema na ku membo a mandende vaye vakele na myaka yivali na ku sheleletha, kushuama ku ntcimbu yiye endi ua va konkele vaka mana. ¹⁷ Keho ua vi puithilemo viye vya na handendekele kapolofeto Yelemiya, na handeka nguendi, ¹⁸ ''Vovuile lijui lya mu Lama, kulila na ku linyenyenga kua kama, Lakele alilila vana vendi, keho endi ketavele va mu holuethe, muomu vahiko.'' ¹⁹ Muye Helonde ua tcile, taleni, na kangelu ua Muene ua yombolokele mu njodhi ku li Yosefe mu Yingito na ku handeka nguendi, ²⁰ ''Katuka na ku tambula ka mbututu na va yina na ku ya ku chifuti cha Yisaleli, muomu vaye vathetelele muono ua kambututu va na tci.'' ²¹ Yosefe ua katukile, ua tambuile kambututu na va yina , keho vayile ku chifuti cha Yisaleli. ²² Vuno muye uo vuile nguavo Alekelau na hingi ku Yundeya mu muhela ua yishe Helonde, endi uo vuile lyova lya kuya kuye. Kunima Kalunga ua nanguile ku njodhi, endi ua hilukile kuimbo lya Ngalileya ²³ keho uedhile na ku kala muimbo lyakama lya ku tumbula Nazaleta. Linga chi kale ngechiye chiva handekele hali kapolofeto, ngechiye endi vaka mutumbula muka Nazaleta.