¹ Mukanda ua ku themuka kua Yesu Kilistu, muna Ndaviti, muna Avilahama. ² Avilahama ua kele yishe ua Yisake, na Yisake ua kele yishe ua Yakomba, na Yakomba ua kele yishe ua Yunda na vamunayina, ³ na Yunda ua kele yishe ua Pelezi kuli Tamale, Pelezi yishe ua Hezelone, na Hezelone yishe ua Lama. ⁴ Lama ua kele yishe ua Aminandambe, Aminandambe yishe ua Nashone, na Nashone yishe ua Salmone. ⁵ Salmone ua kele yishe ua Mbouaze kuli Lahave, Mbouaze yishe ua Ombeti kuli Lute, Ombeti yishe ua Yese. ⁶ Yese ua kele yishe ua Muene Ndaviti. Ndaviti ua kele yishe ua Solomone kuli mukanjivo ua Uliya. ⁷ Solomone ua kele yishe ua Lehomboame, Lehomboame yishe ua Ambiya, Ambiya yishe ua Asa. ⁸ Asa ua kele yishe ua yehoshafate, Yehoshafate yishe ua Yolame, na Yolame yikeye ua ku mushovo ua Uziya. ⁹ Uziya ua kele yishe ua Yotame, Yotame yishe ua Ahaze, Ahaze yishe ua Hezekiya. ¹⁰ Hezekiya ua kele yishe ua Manase, Manase yishe ua Amone, na Amone yishe ua Yosiya. ¹¹ Yosiya ua kele ua ku mushovo ua Yekoniya na vamunayina ku ntcimbu ya ku va kuata ku Mbambilone. ¹² Kunima ya ku vakuata ku Mbambilone, Yekoniya ua kele yishe ua Sheyaletele, Sheyaletele ua kele ua ku mushovo ua Zelumbambele. ¹³ Zelumbambele ua kele yishe ua Ambiyute, Ambiyute yishe ua Eliyakimi, na Eliyakimi yishe ua Azole. ¹⁴ Azole ua kele yishe ua Zandoke, Zandoke yishe ua Akimi, na Akimi yishe ua Elyundu. ¹⁵ Elyundu ua kele yishe ua Eliyazale, Eliyazale yishe ua Mathane, na Mathane yishe ua Yakomba. ¹⁶ Yakomba ua kele yishe ua Yosefe lyala lya Maliya, ku lya uye Yesu ua themukilile, uye ua kutumbula Kilistu. ¹⁷ Ku mushovo uoshe ua kutunda kuli Avilahama na kuli Ndaviti kua kele likumi na yiuana lya mishovo, kutunda kuli Ndaviti na kuheta ku ku vakuata ku Mbambilone likumi na yiuana lya mishovo, na ku tunda ku ku vakuata ku Mbambilone na ku li Kilstu likumi na yiuana lya mishovo. ¹⁸ Kuthemuka kua Yesu Kilistu kua yombolokele mungila eyi. Vayina vendi, Maliya, va mulamenene kuambata Yosefe, vuno kulutue va ku kele kumolika, va ku mu uanene na ku kala na mivila yivali yaku Mpundhi Yakuyela. ¹⁹ Vuno Yosefe, lyala lyendi, ua kele lyala ua vungulu keho kayonguele voshe shaule mukentu uendi, ngocho endi ua yonguele ku muvyana mu vushueke. ²⁰ Ngue yendi ua thinganyekele ku vyuma evi, na kangelu ua Muene yombolokele kuli yikeye munjodhi, na ku handeka nguendi, ''Yoshefe muna Ndaviti, keti ukale na lyova ku tambula Maliya ngue muka njivo yove, muomu umo uye ali muimo yikeye ua kutunda ku Mpundhi Yakuyela. ²¹ Endi aka thema muna mukuenje, keho muka mutumbula lidhina lyendi Yesu, muomu endi akovola vantu vendi ku milonga yavo.'' ²² Mualolo vyoshe evi vya yombolokele linga chikale ngechiye chiye cha na handekele Muene hali kapolofeto, na ku handeka nguendi, ²³ ''Taleni, muna mukentu uye kanda ali mona na lyala, keho va ka muluka lidhina lyendi Yimanuele''' - nkumbu yalyo, ''Kalunga ali netu.'' ²⁴ Yosefe ua hindukile ku tulo na ku panga viye vya muishikile kangelu ua Muene, keho endi ua mutambuile ngue muka njivo yendi. ²⁵ Vuno endi ka mu muene noho na themene muna mu mala. Keho endi ua mulukile lidhina lyendi Yesu.