¹ Ngocho mukutha vilongetha viye vya vyuma vya kulivanga vya kilisitu tushueneni kukutantuluka, keti tushangumuke lalo naku tenguluka mbunge yitunde kuvipanga vyakutca, naku tcelela kalunga. ² Navilongetha vya kumbuitika nolu lua kushituka kuavatci nevi vya chipangulo cha myaka yoshe. ³ Netu lalo tu kapanga nga Kalunga atava. ⁴ Muomu vaye vakele nacheke laya, vaye vamakelele vuana vuye vua muilu, vaye vatambuile Mpundhi yakuyela, ⁵ keho vamakelele lijui lya kuvuaha lya Kalunga, nandhili yantcimbu yiye yikenjako. ⁶ Keho vatangukile, kachitava kuva hiluitha lalo linga vavuluke. Vakevo vali na kukuliika Muna Kalunga lalo na kumu shaula kumesho ambunga. ⁷ Muomu livu liye lye kunua mema aKalunga aye ekuno kelaho, keho lyekushoketha mbuto ya vuahelela vaye valilima. Lyeku tambula vivedhikitho kuli Kalunga. ⁸ Vuno nga lithoketha manja na vithoka vya mongu, kuli vuaha, lishuena kuchithingo, kuhua chalyo ku uema. ⁹ Vuno vavuthamba vange tuna tcelela tua kumone vyavyo kulyeni, viye vina hata ku kuovoka, nambe tuna handeka ngachiye. ¹⁰ Muomu Kalunga keti mukaku henga evale vipanga vyendi na chidhango chimuna muetha ku lidhina lyendi. Muomu yeni muakuathele vaka kuyela, nolo vene muchiva kuatha. ¹¹ Netu tuyongola ngachiye yeni voshe mumone kutambula ngachiye linga mupuithemo mukutalela, naha kumanuthula. ¹² Keti mupange na vulua. Vuno tambuluitheni vaye vakashuama kulyuvuathana mukutcelela nalukatela. ¹³ Muomu Kalunga ua lyuvuathanene na Avilahama, omo kathele kuli thinga hali muka kumutuvakana, ua lithingile hali vavenya. ¹⁴ Nguendi, chili vene mu ku vedhuka, njika kuvedhukitha vene, na mukuilanetha njika kuilanetha vene. ¹⁵ Keho omu ua kakatele mua kama ua tambuile viye vya muishikile. ¹⁶ Muomu vantu veku lithinga hali uye ua vatuvakana, mova lithinga kutumbula vuchili. vimpata vyavo voshe vyavyathi. ¹⁷ Mukemuo Kalunga ua yonguele kuleketha na vuana vua kuli vaka kuhinga lyuvathano liye. Ngachiye lijui lyendi kalyatha kutenguluka mueka, ua vanda kaneneko kulithinga linga omo vyuma vivali viye kavitava kuvitengulula. ¹⁸ Mukemuo Kalunga katha kuhandeka vishaki. Endi ua pangele evi linga vaye vavali vaka kuyeneka kutengulula vyuma- na viye kutuatha muomu Kalunga keku tukuitha, uye kuli koletha etu tuvaka kuteuelako linga tuovoke mukukuata mukutalela chiye chivana tuhakela kulutue; ¹⁹ Chikecho tuli nacho na kutcelela muomu ngundhi yamuono uetu, yikeyo yachili.chakola.chikovela muchiye chakala munima yantanga. ²⁰ Muye Yesu, uye ua kele ntuamalutue na kukovelamo omo yikeye sasendote ua kama ua kumyaka yoshe kuchifua cha Melekizendeke.