¹ Ngocho vene, tukaleni nalyova kuteua mpano, omo kunathala ku lyuvuathana chimo yinja ku kovela mu kuhuima kuendi, umo ua hakati keni aka hona. ² Muomu chili vana tuleke vinkanda vyachili, ngue kuli vakevo lalo. Vuno lijui liye livo vuile kulya vathile, muomu ka valitambuile mu kutcelela kumo na vaye va vyuvuile. ³ Muomu yetu vaye vaka kutcelela tuka kovela mukuhuima chiye, ngue muanahandeka nguendi, ''Ngue munja lithingile lalo muvukalu vuange, nguange, kava ka kovela muomu kuhuima change, nambe vipanga vya huile kutunda ha kupanga chifuti. ⁴ Muomu nahandeka kumo vya litangua lyamu chitanu_na avali ngechiye: ''Na Kalunga ua huimine mu litangua lya muchitanu na avali ku vipanga vyendi vyoshe. ⁵ Keho mukemuo lalo mulithona nahandeka nguendi, ''Kava kakovela mo muomu kuhuima kuange.'' ⁶ Ngocho vene, kuna lihono vamo va ka kovela mo, muomu vaye vo vambuluile vinkanda vya chili laya vahonene kukovela mo, muomu lidhina lyavo. ⁷ Tutumbula lalo litangua limo lelo, ngue hali Ndaviti ku ntcimbu ya yingi kulutue, ngue mutuna handeka laya, ''Lelo nga muvua lijui lyendi, keti mu kaluuithe vimbunge vyeni.'' ⁸ Muomu nga Yehoshua ua huimithile vantu, nga Kalunga kemikile lalo litangua likuavo kulutue. ⁹ Ngocho kuna lihono vantu vaKalunga kuhuima chimo cha litangua lya thapalalo. ¹⁰ Ngocho vene nakovela mukuhuima kuendi, yikeye vavenya ua huimine kuvipanga vyendi vyoshe, ngue Kalunga ua huimine kuvipanga vyendi. ¹¹ Ngocho vene tuli takametheni linga tuka kovele mo mukuhuima kuye, kuteua umo aua muchimuetho chiye chalithino. ¹² Muomu lijui lya Kalunga lili na muono, lya takama lya vambuka ku tuvakana mpoko ya vutuethi vuvali. Nambe lituva na kutepetha muono na muthithimba, na manunga navoshe lyavambuka kuyongola vithinganyeka na vidhango vya mbunge. ¹³ Chuma na chimo chahi chakushueka kuli Kalunga, vuno vyuma vyoshe viye vivapangele kukua kele vyuma vya kufuika, vyoshe vili hamutanya kumesho endi kuli yikeye tuva voshe tuka lyambulula yetu vavenya. ¹⁴ Ngocho vene motuli nendi sasendote uakama uye yikeye na tuvakana lilu, Yesu Muna Kalunga, tukuateni nandhili kukutava kuetu. ¹⁵ Muomu kotuakele na sasendote uakama uye atha kututetela kukuhona kuetu vuno tuli nendi, uye namono vyetheko vyoshe, ngue yetu vene, vuno yikeye kakele na mulonga. ¹⁶ Ngocho tushueneni na kuthimpa kuchitumamo cha kavumbi linga tuka tambule ngodhi, keho tu uane kavumbi kakutu kuatha hantcimbu ka tu kayeneka.