¹ Ngocho vene vakuetu mumpundhi, vaye vathanene muilu. Thinga nyekeni Yesu, uye kapostolu na sasendote uakama ua kutcelela kuetu. ² Ua kele ua kutcelela kuli Kalunga uye ua muhanguile, ngue Mosesa uakele lalo ua kutcelela munjivo ya Kalunga yoshe. ³ Muomu Yesu ka kutunga njivo vamuthingimika na vuana vua kutuvakana njivo, mu chifua chiye vene Yesu na tuvakana kathingimiko ka Mosesa. ⁴ Muomu nkala njivo umo nayitungu, vuno muka kutunga vyuma vyoshe yikeye Kalunga. ⁵ Muomu Mosesa ua kele muka vuchili munjivo yendi yoshe ngue ndungo ua kuambulula vyuma viye viva kahandeka kulutue. ⁶ Vuno Kilistu ngue munendi muka kushuama na njivo yendi, njivo yendi ndi yetu vene. Nga tukakateya kuthimpa na kulishangala kuetu naha kumanethula. ⁷ Ngocho vene, ngue muanahandeka Mpundhi Yakuyela yihandeka nguayo: ''lelo, nga muvua lijui lya Kalunga. ⁸ keti mukaluuithe vimbunge vyeni, haye hova mushangumuine, ngue kulitangua liye lyamu muthenge mova muethekele. ⁹ Haye hova njethekele vakuku yeni muku njihakela vyetheko , Keho vamuene vipanga vyange makumi auana amyaka: ¹⁰ Ngocho vushoko vuye vua njikoshele; Keho nguange, vashevuka ntcimbu yoshe mu vimbunge vyavo. Vuno vaka dhivukile vingila vyange ¹¹ Ngue munja lithingile lalo muvukalu vuange. nguange, kuva kakovelamo muchifuti chinja yonguele kuvahana linga vaka huiminemo. ¹² Dhangameni, vamuna-nana, hamo na mukuavo hakati keni hali nambunge yakuvihya ya vimpata na mukushevuka kuli Kalunga muka muono. ¹³ Vuno linanguleni umo na mukuavo kuli tangua kuli tangua. muva chitumbula nguavo, "lelo," Kuteue umo hakati keni akaluua mukukuitha kua mulonga. ¹⁴ Muomu tuna tambula kilistu, nga tukakateya kutcelela kuetu kua kulivanga na kukolethako noho hakumanethela. ¹⁵ Mova vihandeka evi nguavo, ''Lelo, nga muvua lijui lya Kalunga keti mukaluuithe vimbunge vyeni, ngue haye homua mushangumuine. ¹⁶ Vaye vamu shangumuine mova vyuvuile, veya kuma? Keti vaye voshe vatundile ku Yingito kumo na Mosesa? ¹⁷ Kalunga ua kele navukalu naveya myaka makumi auana? Yikeye ua kele navukalu na vantu vaye vapangele mulonga, vivimbi vyavo vya lundumukile kumikinya? ¹⁸ Kuli veya vaye vathingile kuva ka kovelamo mukuhuima kuendi, nga keti vaye vaka lithino ndi? ¹⁹ Keho tuna mono ngechiye vakevo kuvathele ku kovelamo muomu lya vimpata.