¹ Ngocho vene, lalo lishelua lya kama lya ngechiye lya vakaleho lya tudhengeleka, tuetheleni vyoshe vi tu honetha, na mulonga uye ue kutu thakatela ntcimbu yoshe, keho tushatukeni mu kukakatela ntcimbu yi va na tuhakela. ² Tutaleni kuli Yesu muka kuvuaha na ku tantulukitha kutcelela kuetu, yikeye kuyanguluka kuye ku va muhakele ua yandele ha chiti cha ku lindakana, ua yenguile shuama yacho, na ku tumama kuli voko lya chilyo lya chitumamo cha Kalunga cha vu Muene. ³ Thinganyekeni vaka ndolongo, ngue yeni navo muli, nava vayanda, ngue kumo vamiyandetha. ⁴ Nolo kanda mu vyana na ku maninga na kuluua na milonga. ⁵ Keho munevala kunangula chiye cha handekele netu ngue vana vendi, ''Munange, keti uthinganyeke kuononoka kulongetha kua Kalunga, nambe aku dhangametha mua kuhandekela. ⁶ Muomu uoshe ya yongola Muene amulongetha. Keho aveta makote munendi uoshe uye yayongola. ⁷ Kakateleni mutuyando ngue munendi atambula kudhangametha kua kutunda kuli yishe. Muomu mona uye yishe ke ku mulongetha. ⁸ Vuno nga yeni kova milongethele na voshe vamona ko. Keho eni muvana vavi kuidhi, keti muvana vavuchili. ⁹ Keho lalo, tuakele na vatata, vaye vahano hantci vaka ku tulongetha, katu tuvakana kuononoka kuli Yishe yamuthithimba, keho tukangangama. ¹⁰ Vatata vachithemua cha hano hantci vatungangametha kantcimbu kaka ndende lika, ngue mu kuna yomboloka vungulu kumesho avo. Vuno yikeye omo vuino vuetu, linga tuka tambule kuyela chendi. ¹¹ Kulongetha kuoshe ka kueku yoletha kuntcimbu ya mualolo. Vuno kueku vavaletha. Vuno kulutue kuima vushuka vua chivovo kulyava yova lilongethele nako vukevo vushuka vuachili. ¹² Ngocho yunduleni mavoko eni aye ana yechelela koletheni mavuli eni munahono. ¹³ Endeni muvingila vya kuvuaha, navilyato vyeni, linga chiye cheku vedhuka keti chitunde mungila vuno chikanguke vene. ¹⁴ Kaleni chivovo mukuvuayetha vantu voshe, na kuyela, muomu nga muntu na yeneka ka ka mono Muene. ¹⁵ Dhangameni kuteua umo aka hiluka munima ku kavumbi kaKalunga, kuteua mudhi umo ua ku kalumuka umishokela muku mitangula. Ngue muti ua ku kashasha uye ukula-na kuneha tuyando tua tuingi navushungu vuauo. ¹⁶ Dhangameni kuteua ku ka kala umo chikuidhi, muomu muntu kakele na mpundhi, ngue Esau, uye ua landethele vukuluntu vuendi kuli mukuenje uendi navya kulya vya vindende. ¹⁷ Munima yevi, mu nadhivuka yikeye ua yonguele kutambula chivedhukitho, kuli yishe. Vuno vamu vyanene, muomu ka uanene mbunge yaku tenguluka, nambe mualilile namishodhi kavi uanene. ¹⁸ Muomu yeni kamuedhile ngue vana va Yisaleli vetcile kumukinya ua sinya liye yashukumine na tuhya na kudhivala na muthithi, na mpundhi yakama. ¹⁹ Na kuimba luneta na ku lijui lya majui na lijui olyo vantu vaye va lyu vuile vakandelelele nguavo keti vahandeke lalo lijui na limo lyahi lyeka navo. ²⁰ Muomu kava yathele ku kolethako kuviye viva valekele nguavo, ''Nga nambe tuthitu vakuata mikinya, vana pande ku vasha mavue. ²¹ Nachifua chavo chaku teuetha na vuana vua ngechiye Mosesa ua handekele nguendi , njili na ku ngangama na lyova. ²² Vuno munenja kumukinya ua Siyono, na limbo lya Kalunga muka muono. Yelusalema ya muilu, na ku mbunga yatungelo vavengi. ²³ Na ku viuano vya voshe, na vya kuviuano vya vimbeli vaye vo vana thono muilu. Na kuli Kalunga ngodhi na voshe, na ku muthithimba ya vaka kuvuaha ava vovana tantuluitha. ²⁴ Eni munenja kuli Yesu, lihako lya likumiyo lya yisho na ku maninga aku myangela, aye ahandekele mu kutuvakana aAvele. ²⁵ Taleni ngechiye keti mu vyane ou ahandeka. Muomu ngavaye va vyanene uye uava nanguile hano hantci, nga etu tukovoka vati nga tutaleketha ko nima kulya uye aku tuleka vya muilu. ²⁶ Lijui lyendi vya ngangamethele mavu aye. Vuno mualolo nathika nguendi, lumo lika lalo, njika ngangametha keti mavu lika vuno na lilu. ²⁷ Keho lijui eli, ''Ntcimbu yimo lika lalo,'' litumbula kutunda kua viye vikangangama. Muomu vikevyo vyuma vya kupanga, linga viye kavya kangangamele vika lihone ho. ²⁸ Ngocho mutu tambula vumuene vuye kuvuatha kungangametha tukaleni kavumbi, linga tupange vipanga vya kuyongola Kalunga na ku mulemetha na ku mukomoka. ²⁹ Muomu Kalunga ketu yikeye tuhya vaku uemeka