¹ Vuno kutcelela kuna kala vyuma viye vituna yeneka kumona. ² Muomu mukemuo vana mbulula vukaleho vuaku kakulu. ³ Haku tcelela tunadhivuka ngachiye vapangele mavu nalijui lya Kalunga. Ngocho viye vya kumona navaye vitua yeneka kumona vavipangele nevi vya yomboloka. ⁴ Ha kutcelela, Avele ua kombelelele kuli Kalunga chikombelo cha kutuvakana Kaini, mukemuo viye vyambuluile vukaleho vuendi ngachiye, yikeye ua kele muka vuchili na Kalunga ua handekele muachili vya kuli yikeye muomu chikombelo chendi, na muku tcelela Avele nolo ahandeka, nambe endi ua tca. ⁵ Ha kutcelela vambatele Enoke, linga keti amone kutca. ''Endi kavamu uanene, muomu Kalunga ua muambatele.'' Muomu va nambulula vukaleho vuendi ntcimbu kanda vamutuale ua muyile kumbunge Kalunga. ⁶ Vuovuno nga kutcelela kuahi kotuatha kumuya kumbunge, muomu uye enja kuli Kalunga napande kutcelela ngachiye yendi muka kufueta vaye vamu thetela. ⁷ Vya kele ha kutcelela chiye Noa, Kalunga ua munanguile viye vya yeneka kumona, na lyova kuli Kalunga uashongele vuato mukuohyela vakanjivo yendi. Mukemuo ua panguile vaka hantci na ku kala muka kuvua kushuama vuchili vuye vuakala mu kutcelela. ⁸ Vya kele hakutcelela chiye Avilahama vamuthanene, uononokele mukuya ku chifuti chiye chiva yonguele kumuhana ku kachihinga. Keho uayile kadhivukile kuayile. ⁹ Vya kele hakutcelela ua kele mukakulishuka muchifuti chiye cha likumiyo. Ngue kuchifuti keti chendi, uakele muvi mbalaka, ngue mua pangele Yisake naYakomba. Ava navakevo lalo vatambuile likumiyo lyachifua chimo lika kuli Kalunga. ¹⁰ Omo Avilahama ua vandamenene nganda yiye Kalunga ya muinikilile kumuntu ngila, nganda yiye ya luvula lua myaka yoshe. ¹¹ Chakele hakutcelela, nambe Sala vavenya ua kele ntcimbi, ua tambuile ndhili ya kuthema. Echi chayombolokele nambe muana kulu laya, nambe endi ua shuamene ngue kutcelela cha umo uye yiva hanene likumiyo. ¹² Ngocho vene, kuli umo lyala -nayikeye uakele ngue mutci, kuathemukile vavengi ngue musheke ua kumukulo ua Kalunga ndonga, kutha kuutanda. ¹³ Ava voshe vatcile na kutcelela kava uanene viye vya tumbuile Kalunga, vuno va vimuene hale, na ku va vitavele nguavo vaka vifuti na vyendangana vahano hantci. ¹⁴ Muomu vaye vahandeka vyuma evi vipange mu kuyombolola ngachiye vali na kuthetela chifuti chavo vavenya. ¹⁵ Nga mukemuo muvana vithinganyekele chifuti chiye kuva tundile, nga vana muene ntcimbu ya ku chi hilukila. ¹⁶ Vuno mualolo vayongola chifuti chatuvakana, chikecho chimo cha muilu. Ngocho vene Kalunga kakele na shuama muva mutumbula Kalunga kavo, ntcimbu nava vuayethela limbo lyakama. ¹⁷ Chakele hakutcelela chiye Avilahama, muye muva muethekele uakombelele Yisake. chili uye ua yolelele mukutambula likumiyo uakele na ku kombelela munendi umo lika. ¹⁸ Chakele ngachiye Avilahama kuli uye yiva handekele nguendi, ''Muli Yisake uye mbuto yove vaka yitumbula. ¹⁹ Avilahama ua thinganyekele Kalunga atha kushitula Yisake nambe kukutca vene, na ku handeka nguavo, na kukekuo ku chifua chacho uamutambuile lalo. ²⁰ Chakele lalo ha kutcelela cha vyuma vyedhile muye Yisake ua vedhukithile Yakomba na Esau, kuvyuma vikenja kulutue. ²¹ Ha kutcelela chiye Yakomba mua yonguele kutca, ua vedhukithile vana vaYosefe voshe. Yakomba ualemethele, na ku kulumana hamulamu uendi. ²² Chakele ha ku tcelela chiye Yosefe muakele muhyehi nakutca, ua handekele vya kutumbula cha vana vaYisaleli mu Yingito. Uahandekele vati vapanga vya kushama kuvitcihya vyendi. ²³ Chakele ngachiye ha kutcelela chiye Mosesa muye muva muthemene, vithemi vendi vamushuekele vingonde vitatu, muomu va mumuene yikeye ua kele kambututu ua ku vuaha. Keho kova teuele lishiko lya muene. ²⁴ Chakele ha kuthelela chiye Mosesa, kunima yikeye omo ua kulile, ua vyanene va mutumbule muna Falao. ²⁵ Ua hanguile ngue kutuvakana kuli pandakana kuma pakatho avantu va Kalunga kuvyu kilila yolela ya mulonga ntcimbu. ²⁶ Kushaula muli Kilistu endi ua talele nguendi vupite vuakama kutuvakana vupite vuoshe vua mu Yingito, muomu endi ua tumbuile fueto yakulutue. ²⁷ Cha kele ha kutcelela chiye Mosesa uatundile muYingito , kateuele vukalu vua muene, muomu ua likolelele mukumona uye umo yivayeneka kumona. ²⁸ Cha kele ha kutcelela ua nyungile mbolo yakuyeneka hingo na kumyangela maninga kuvikolo ngachiye uye kangelu muka kutcihya keti atcihye vana vavamala vambengelo. ²⁹ Cha kele ha kutcelela vahitile hakati kalishali lyakuvenga, ngue hantunda. Na vaka Yingito muku temuinina mo voshe vatcile . ³⁰ Cha kele ha kutcelela likuma lya Yeliko lya lundumukile hantci, omo vadhengeleke matangua atanu naavali. ³¹ Cha kele ha kutcelela uye chikuidhi Lahave, kava mutcihile hamo navaye vakaku yeneka kuononokla kuli Kalunga, na kutambula vangendhi na chivovo. ³² Keho vika njihandeka lalo? Muomu njika hana vya ntcimbu ya kuambulula cha Ngindiyone, Mbalake, Samusoni, Yafeta, Ndaviti NaSamuele navaPolopheto. ³³ Cha kele kuhitila ha kutcelela vatambuile vumuene, vapangele vya vuku vuaha na kutambula likumiyo. va dhikile tunua tua vindumba. ³⁴ Vadhimine ndhili ya tuhya, vovokele kuvutuethi vua mukuale, muku hona va kolele, vatuva kanene ndhili kundhita, va shekele vimbunga vya vakandhita va vangendhi. ³⁵ Mukentu uatambuile vakatca vamo muku shituka. Vakuavo vamuene tuyando tuakama. Ka va tavele kutambula kuovoka linga vatambule chishitukilo cha kutuvakana. Vakuavo vamuene kuyandangela ³⁶ Keho vakuavo vamuene tuyanda na kushaula na ku va pupa, chili vene, malyenge na tumenga lalo. ³⁷ Vavashele mavue. Vavatetangele navisaha. Vavatapele na mikuale. Vendanganene navilambu vya vimpembe. Vayandele na vuhutu, tuyando na lamba. ³⁸ Vya hano hantci kavya va vuahelele, vali tanganene mu mpambo na mumikinya namuvina_na mumyandhi ya hantci. ³⁹ Nambe voshe ava vamuene vukaleho vua ku kutcelela kuavo, ku va tambuile likumiyo. ⁴⁰ Muomu Kalunga na tupangela evi vya kutuvakana, linga keti tuvapangele vyachili.