¹ Evi vikevyo vya na njileketha Muene Yehova kuli yange nguendi. Tala, na lilonga vushuka vua ha ntcimbu ya nyondhi! ² Eni ua handekele nguendi, ''Vika vyuli na kumona, Amose?'' Ange nja handekele nguange, ''Lilonga lya vushuka vua ha ntcimbu yanyondhi.'' Kulenga kua hantci kunenja ku vantu vange va Yisaleli; ku njika va tundithila ho lalo. ³ Na madhina a mutembele aka linyenga mu litangua liye_echi chikecho chihandeka cha Muene Yehova_mivila ya yingi ya vaka kutca vana yumbila nkala kuoshe! Kuholoka kulu!'' ⁴ Tolillileni kuli evi, yeni vaye thindiya vaka kuyeneka na ku tambula vihutu mu chifuti. ⁵ Va handekele nguavo, ''Litangua lika ngonde yayiha yikahua, ngocho linga etu tuka landethe mbuto yetu? Litangua lika lya Sambata lika hua, linga tuka landethe tiliku? Tuka panga chimetetho cha chindende na ku vuedhelela ndando, ngue etu tukuitha hamo na chivihitho cha vishaki. ⁶ Evi vikevyo ngocho tuka landerha tiliku ya ku vihya, kulanda vihutu hamo na mavue akutoka, na vaka kuyongola vimo vinkuaku.'' ⁷ Yehova na lithingi ku lihahametha kua Yakomba, ''Chili ange kunji kevala vimo vya vipanga vyavo.'' ⁸ Keti chifuti chingangama kulyevi, keho nkala umo uye ua kala mo aka linyenga ndi? Vyoshe vika katuka ngue Ndonga ya Nile, keho yika lova na ku dhivilila lalo, ngue Ndonga ya Yingito. ⁹ ''Vika kala mu litangua liye_evi vikevyo vi handeka vya Muene Yehova_viye amge njika panga litangua likovele ku chinguedhi, keho njika dhivaletha hantci litangua lya ngonde. ¹⁰ Ange njikantengulula chiuano mu ku linyenga na madhina eni mu ka lila. Ange nji haka vidhala vya vishaku ha mivila yoshe na ku tevula vinkambu ha nkala mitue. Ange njika panga ngue alinyenga muomu mona ua lyala, na litangua lya ku vavaletha ku ku manethela. ¹¹ Taleni, matangua akenja_evi vikevyo vi handeka vya Muene Yehova_muye njika tuma njala hantci, keti njala ya mbolo, ndi vya lihuila lya mema, vuno muomu lya majui a Yehova. ¹² vaka komoka kutunda ku kalunga ndonga ku kalunga; vaka shatuka kutunda ku vuye tangua na kuya kuvutunde tangua ku thetela majui a Yehova, vuno ku vaka viuana. ¹³ Mu litangua liye vana vakentu na vana vakuenje vakaua ku lihuila. ¹⁴ Vaye voshe va lithinga ku milonga ya Samaliya na ku handeka nguavo, 'Ngue kalunga keni ali namuono, Ndani,' keho, 'Ngue na ngila ku Mbeleshemba yakala ko, ' vaka ua keho ku vaka hinduka.''