¹ Njamuene Muene nemana muyehi na mutula, na ku handeka nguendi, ''Ndhili ya kuilu ya ngundhi linga yingangame hantci. Yipokole yikeyo mu vimbalavala ha mitue yavo voshe, keho ange njika tciha ua ku manethela uavo hamo na mukuale. Keti umo uavo aka tundaho; keti umo uavo aka theunuka ho. ² Nambe ngocho vaka hinda mu Sheole, kuye livoko lyange lika tambula vakevo. Nambe ngocho vaka londa kuilu, kuye ange njika va sheleletha vakevo. ³ Nambe vaka lishueka helu lya Kalemele, kuye ange njika thetela na ku vatambula vakevo. Nambe vali shueka kumesho ange kuintci lya kalunga ndonga, kuye njika shika shika linoka, keho lika vashuma. ⁴ Nambe vaya mu ku vakuata, va vashinga ku vaka chidhindo chavo kumesho avo, kuye njika hana shika ku mukuale, keho uka vatciha vakevo. Ange njika haka mesho hali vakevo mu ku vavaletha keho keti mua chili. ⁵ Na Muene Yehova ua vimbunga akuata chifuti keho chika thongonoka; vaye voshe vali namuono mu ku linyenga; vyoshe vika hinduka ngue Ndonga, na ku dhivilila lalo ngue ndonga ya Yingito. ⁶ Yikeye uye atunga vilondelo muilu, keho endi apanga njivo yendi hano hantci. Endi a thana mema amu kalunga ndonga, na ku amuanya akeo helu lya hantci, Yehova likelyo lidhina lyendi. ⁷ ''Keti yeni ngue vantu vaku Kushe kuli yange, vantu va Yisaleli_eli likelyo lijui lya Yehova_keti yange nja tuhuithile va Yisaleli kutunda ku chifuti cha Yingito, na Filistine kutunda ku Kulete, na Alameyanse ku Kile ndi? ⁸ Taleni, meshoa Muene Yehova ali ha vumuene vua kuvihya, keho njika njika viyitha kutunda kumesho a hantci, kuvanga viye ange kunjika viytha njivo ya Yakomba_eli likelyo lijui lya Yehova. ⁹ Taleni, ange njika shika, keho ange njika ngangametha njivo ya Yisalelihakati ka mishovo yoshe, ngue umo a nenenga mbuto ha muthalo, linga mavue amandende aka uile hantci. ¹⁰ Voshe vaka milonga va vantu vange vaka tca ku mukuale, vaye va handeka nguavo, 'Kayando ku ka tutuvakana ndi ka liuane netu.' ¹¹ Mu litangua liye ange nji ka hindula mbalaka ya Ndaviti yiye ya uile, na ku shoka vikolo vyacho. Ange njika hindula ku viyitha kuacho, na ku yitungulula ngue mu matangua a laya, ¹² viye vyatha kufuka chilyo cha Endome, na mishovo yoshe yiye yithana mju lidhina lyange_eli likelyo lijui lya Yehova_endi apanga evi. ¹³ Taleni, matangua akenja_eli likelyo lijui lya Yehova_muye mbuto yendendelela kuhya, na manjembele endelela yikeye uye a tapeka mbuto. Mikinya yika hititha vinyu ya kutovala, na mikinya yoshe yika pupa hamo lika. ¹⁴ Ange njika hiluitha kutunda vantu vange va Yisaleli vovakuata. Vaka tunga membo akama uva viyitha na ku kala mukemuo, vaka kuna mahya a vinyu na ku nua vinyu yavo, keho vaka panga vikunino na ku lya vushuka vuavo. ¹⁵ Ange njika kuna vakevo ha chifuti chavo, keho vakevo lalo kuva kuva shituka midhi kutunda ku chifuti chiye nja va hanene vakevo,'' muana handeka Yehova Kalunga keni.