¹ Tolilileni majui aye nja tambuile nja ahandekele kuli yove, njivo ya Yisaleli. ² Vana va vakentu va Yisaleli vanau; endi kaka hinduka lalo; endi vana mudhindi ha chifuti chendi; ku kuakele naumo ku muhindula yikeye. ³ Muomu evi vikevyo viye vya handekele Muene Yehova nguendi: ''Na limbo lyakama liye lya tuhukile hamo na makulukadhi lika kala chihita vaka lihona mo, keho umo uye a tuhuka hamo na chihita aka kala na likumi vaka lihona ku njivo ya Yisaleli. ⁴ Muomu muali na kuhandeka Yehova ku njivo ya Yisaleli nguendi: ''Nji theteleni keho mukovoka! ⁵ Keti muthetele Mbetele; ndi kukovela Ngilengale; keti mukale vungendhi ku Mbeleshemba. Muomu vuchili Ngilangele yikaya mu mu ku yikuata, keho Mbetele yikatca. ⁶ Theteleni Yehova keho mukovoka, ndi aka uema ngue tuhya mu njivo ya Yesefe. Keho valya, keho kuye ku ku ka kala umo muka vadhima mu Mbetele. ⁷ Eni vantu vaka kuhaka vuoloke vushungu, na vaka ku uisa vuchuli hantci!'' ⁸ Kalunga ua pangele va Peleyande na Oliyone; endi atengulula muthithi ua kama ku chimene; endi apanga litangua hamo na matciki na ku tumbula mema a kalunga ndonga; endi a muanya akeo helu lya hantci. Yehova likelyo lidhina lyendi! ⁹ Endi aneha kutca cha vuathi_vuathi chakama linga kutca chinje ha vantu. ¹⁰ Vadhinda nkala umo uye aleka vakevo mu vikolo vya membo akama, keho vadhinda nkala umo uye ahandeka vuchili. ¹¹ Muomu muka lyatangela vihutu na ku thininka ku vanyanga tiliku kuli vakevo_nambe ngocho muna tungu vinjivo vyeni vya kupanga na mavue, ku mu ka kala muli vikevyo. Muna tombekele viti vya kutangeka mu mahya, vuno ku mu kanu vinyu yacho. ¹² Muomu njina dhivuka milonga yeni yngahi na vukama vua milonga yeni_yeni vaye mua yandethele va vuchili, tambula vishaki, keho a tenguluka kyongola mu vikolo vya membo akama. ¹³ Ngocho vene nkala muntu muka kupangula yikeye na holoka ha ntcimbu oyo, muomu yili ntcimbu ya kuvihya. ¹⁴ Theteleni vya vingulu keti vya ku vihya, linga ukovoke. Ngocho Yehova, na Kalunga ua vimbunga, chili atha ku kala hamo lika nove, ngue mu una handeka endi yikeye. ¹⁵ Dhinda vya kuvihya, yongola vya vingulu, tunga vya kuovola mu chikolo vya limbo lyakama. Ngocho Yehova, Kalunga ua vimbunga, aka shangala ku njivo ya Yosefe. ¹⁶ Ngocho vene, evi vikevyo vya na handeka Yehova, Kalunga ua vimbunga, na Muene nguendi, ''Ku kala kutambakana kua kama mu membo oshe, keho va ka handeka mu vingila nguavo, 'Chikele, Chikele!' Va ka tambakana vaka kulima ku linyenga na voshe vaye vadhivuka vuthiua na ku linyenga. ¹⁷ Mu mahya oshe a vinyu kuye aka kala kutambakana, muomu ange nji ka hita mukati keni,'' muana handeka Yehova. ¹⁸ Chikele kuli yeni vaye muyongola litangua lya Yehova! Vika muyonguela litangua lya Yehova? Lika kala na muthithi mutanya ua hiko, ¹⁹ ngue muye muntu a shatuka ku ndumba na kathitu ua kulifua ngue ndumba enja kuli yikeye, ndi endi a kovela mu njivo na ku haka livoko lyendi ha chivumbe keho linoka limushuma yukeye. ²⁰ Keti litangua lya Yehova lika kala muthithi na mutanya ua hiko ndi? Muthithi keho mutangeko ua hiko ndi? ²¹ ''Ange nja dhinda, ange nja dhinda viuano vyeni, ange kunje kutambula mu mue ku kunguluka. ²² Nambe ngocho eni mue hana kulyange vikolembelo vya kutcimika na ku kombeleya mbuto, ange ku njika vitambula vikevyo, nambe kuatha ange njitale vikombelo vya vikungulukilo vya tuthitu va kuhindala. ²³ Litundithe kulyange muyoyo ua madhina eni; ange ku njika tolilila ku kuohya kua mbendo yeni. ²⁴ Ndi, linga kuhisa kuende ngue mema, na vuchili ngue kuenda kua mema a lithima. ²⁵ Mua nji nehelele vikombeleyo na milambu mu muthenge ha makumi auana a myaka, njivo ya Yisaleli ndi? ²⁶ Yeni muanduile kuilu vihanga vya Sikute, muene ueni, keho Kaiuane kalunga keni, uye yimua pangele yeni vavenya. ²⁷ Ngocho vene njika mithindiya yeni kulutue lya Ndamasiku,'' muana handeka Yehova, uye ua lidhina yikeye Kalunga vimbunga.