¹ Tolilila majui aa aye Yehova ana handekele kushuama kuli yeni, vantu va Yisaleli, kushuama vushoko vuoshe vuye nja tuuithile mu chifuti cha Yingito: ² ''Nja shovuele yove lika kutunda ku vushoko vuoshe vua hantci. Ngocho vene njika yandetha yove muomu lya milonga yove yoshe.'' ³ Kuatha voshe kuenda kumo kuvamba vakevo vana pangele ndi? ⁴ Kuatha ndumba ohya mu muthenge muye endi kakele na kathitu ndi? Kuatha muna ndumba ana kutunda ku mulivu uendi nga endi ka ka kuatele na chimio chahi ndi? ⁵ Kadhila kuatha kiuula munganjo ya hantci muye na yimo nganjo vana muhakela yikeye ndi? Kuatha nganjo yi yomboke kutunda hantci muye ku cha kuatele na chimo chahi ndi? ⁶ Nga vimbinga vya yinjui vyohya muimbo lyakama, keti vantu vaka jaja ndi? Nga kayando kaka tuvakana limbo lyakama, keti Yehova na vitumu ndi? ⁷ Vuchili na Muene Yehova katha kupanga navimo kuvanga endi na yombolola vithinganyeka vyendi kuli vandungo va va polofeto. ⁸ Na ndumba ana; uye katha ku kala na lyova ndi? Na Muene Yehova na handekele ; uye katha ku polofeta ndi? ⁹ Vuovoke ovu kuli vakandhita va Ashendonde, na ku li vakandhita mu chifuti cha Yingito; va handeka nguavo, ''likunguiyeni yeni vavenya ha mukinya ua Samaliya na ku tala muyoyo uakama uli muli yikeye, keho vika liyango lili muli yikeye. ¹⁰ Muomu vakevo kuva dhivukile vati vapanga vya vingulu_vakevo va punguile muyoyo na vukalu muli vakandhita vavo.'' ¹¹ Ngocho vene, evi vikevyo vya na handeka Muene Yehova nguendi: ''Vaka chidhindo vaka dhengeleka chifuti, na ku koka ndhili yove na ku shandangana vakandhita vove.'' ¹² Evi vikevyo vya na handeka Yehova nguendi: ''Ngue muka kutakametha akovola hanja lya kanua ka ndumba myanja yivali lika, ndi chimbalavala cha lituitui; ngocho vantu va Yisaleli vaye vakele mu Samaliya va vovole; vakevo vaka vethela hamo lika na mbango ya chipundi ndi mbalavala ya muhela,'' ¹³ Tolilila na ku hana vumbangi vua njivo ya Yakomba_ou ukeo vukaleho vua Muene Yehova, Kalunga ua vimbunga: ¹⁴ ''Muomu mu litangua liye njika yandetha milonga ya Yisaleli, njika yandetha lalo mutula ua Mbetele: Na vimbinga vya ku mutula vaka viteta ko na ku wila hantci. ¹⁵ Njika viyitha njivo hamathika hamo lika na njivo ya nyondhi. Na vinjivo vya vikanda vika dhimangana, na vinjivo vya kama vika dhimbala_evi vikevyo vihandeka vya Yehova.''