¹ Evi vikevyo vya na handeka Yehova nguendi: ''Muomu milonga yitatu ya Moave, nambe yiuana, Ange kunjika tengulula kayando kavo, muomu endi ua tcimikile vitciha vya muene vya Endome ku lime. ² Ange njika tuma tuhya ha Moave, keho tukalya vaka ndhili va Keliote. Moave vakatca mu ku linyenga, hamo na ku tambakana na kuohya kua vimbinga vya yinjui. ³ Ange njikaviyitha muka kupangula muli yikeye, keho njika tcihya vimyene vya vikentu hamo lika na yikeye,'' mua na handeka Yehova. ⁴ Evi vikevyo vya na handekele Yehova nguendi: ''Muomu milonga yitatu ya Yunda, nambe yiuana, ange kunji tengulula kayando, muomu vakevo va vyanene lishiko lya Yehova keho kuva takamethele vitume vyendi. Ku kuitha kuavo kua vapanga vakevo linga vaye ku milonga, kunima yava yishe lalo mu vendele. ⁵ Njika tuma tuhya hali va Yunda, na ku valya vaka kushika va Yelusalema.'' ⁶ Evi vikevyo vya na handekele Yehova nguendi: ''Muomu milonga yitatu ya va Yisaleli, nambe yiuana, ange kunjika tengulula kayando, muomu vakevo valandetha vaka kuyeneka kuviyitha na livue lya kutoka na ku yongola vinkuaku. ⁷ Vatongamene ha mitue ya vihutu ngue vantu vali ha likungu lya hantci; vakevo thindikile kuako. Na muntu na yishe yendi vakaya kuli muna mukentu umo keho ngocho kutuhula lidhina lyange lya kuyela. ⁸ Vakotha kunchongo ya nkala mutula ha vidhala vatambuile ngue vaka kutakametha, na mu vinjivo vya Kalunga vakevo vanua vinyu ya vaye voshe va thininkile ku fuetetha fueto. ⁹ Nolo ange njika viyitha va Amolite kumesho avo, vaye va kulaha ngue kulaha kua chiti; endi ua kele na ndhili ngue kulaha senda; endi ua kele na ndhili ngue livue. Keho nja viyithile vushuka vuendi vua kuilu na midhi muintci. ¹⁰ Lalo, nja kutuhuithile yove kutunda ku chifuti cha Yingito na ku kuhaka myaka makumi auana mu limbalanda lyangocho ku kala mu chifuti cha va Amolite. ¹¹ Nja hinduile va polofeto kutunda hakati ka vana veni na Nazilite kuli vana vakuendje veni. Keti ngocho, vantu va Yisaleli ndi?- evi vikevyo vihandeka vya Yehova. ¹² Vuno ove ua thininkile va Nazilite ku nua vinyu na ku leka va polofeto keti va polofete. ¹³ Tala, njika kuthanyona ngue litemba liye lina shulu na mbuto yatha ku thanyuona umo. ¹⁴ Kuteua yika dhimangana ku kushatuka; va ndhili ku vatha ku vuedhelela ku ndhili yendi vavenya; nambe muka ndhili alyovole yendi vavenya. ¹⁵ Vaka kuloya vingamba ku va kemana; vaka ku shatuka muakama ku teua; vaka tukambe ka katha kulyovola endi vavenya. ¹⁶ Nambe vaka kuvula ndhita vaka pulula mushenga shenga mu litangua liye_ eli likelyo lijui lya Yehova.''