¹ Vuno vamuna nana, tumi kandelela omo kuinja kua Muene uetu Yesu Kilistu na kuli kungulula kuetu kuli yikeye, ² linga keti muhilu muke vuathi mu vithinganyeka vyeni, ambe kungangama, hamo ku mathona ngue aku tunda kuli yetu, nguavo litangua lya Muene lili muhyehi na kuinja. ³ Naumo uahi ami kutha na hamo hahi. Muomu kenja ku vanga chitanguitho chinenja , na muntu muka mulonga aka yomboloka, yikeye muna ngehena. ⁴ Uye avyana na ku hitakana kuvyuma vyoshe vi ve kutumbula Kalunga nambe evi vive kulemetha, ngechiye yikeye vavenya a tumama mu chikungulukilo cha Kalunga na ku litumbula vavenya nguendi yikeye Kalunga. ⁵ Ko muvuluka ngechiye omuye njakele neni nja milekele vyuma evi? ⁶ Keho mualolo muna dhivuka echi chivindika ngechiye yikeye aka yomboloka ku ntcimbu yendi. ⁷ Muomu lihungu lya shaula vidhilika na kupanga laya, vuno kuli umo avindika noho vaka tunditha ko. ⁸ Keho aka yomboloka uye muka kushaula vidhilika, Muene Yesu aka mutcihya na muku vua kanua kendi, na ku minongetha mu ku yomboloka ha kuinja kuendi. ⁹ Uye ndi ku kala kuendi chi tunda ku vipanga vya Satana na vyoshe vya ndhili na vidhivukitho na vikomoketho vya vishaki. ¹⁰ Na ku kuitha kuoshe cha vuhenge kuli ava vali na kutca, muomu va vyanene chidhango cha vuchili na kuovoka. ¹¹ Muomu echi vene Kalunga na va tumina chipanga cha ku shevuitha linga vatcelele vishaki. ¹² Linga vavihithe voshe vaye kava tcelelele mu vu chili nambe kumashungu aku yeneka kuyela. ¹³ Vuno tu shangala kuli Kalunga ntcimbu yoshe, omo yeni vamuna nana vayongola Muene kuthetela Kalunga ua shovuele kuovoka ha ku lemetha kua Mpundhi yakuyela na mu ku tcelela kua vuchili. ¹⁴ Vikevyo vya nami thanenene ha mudhimbu ua chili linga mutambule vungulu vua Muene uetu Yesu Kilistu. ¹⁵ Ngocho vene vamuna nana, kaleni na ndhili kakateyeni viye viva milongethele, nambe lijui nambe mathona. ¹⁶ Mualolo Muene uetu Yesu Kilistu vavenya, na Kalunga Tata uetu, uye uatu yongola na ku lembedheka kua myaka yoshe ya yaye na ku kandelela kua chili ha kavumbi keni. ¹⁷ Yikeye aka milembedheka mbunge yeni na kuyi koletha muvi panga vyoshe vya vuaha na mu lijui lyoshe.