¹ Vaka chidhango change, keti mu tcelele ku nkala mpundhi vyoshe. Nambe kuetheka mpundhi ku tala nga ya kutunda kuli Kalunga, muomu vapolofeto vavengi va vishaki vana lishandanganena hantci hoshe. ² Mukemuo mu muka dhivuka Mpundhi ya Kalunga - mpundhi yoshe yi tava ngue Yesu Kilistu nenja na muvila ua ntcitu ukeuo ua Kalunga, ³ Na mpundhi yoshe ka yi tava kuli Yesu keti ya kuli Kalunga. Yikeyo mpundhi ya antekilistu, uye yu muovuile akenja, na mualolo laya yili hantci. ⁴ Vana vange va vanike, muli Kalunga, na ku tuvakana vakevo, muomu umo uye ali muli yeni na tuvakana uye ali hano hantci. ⁵ Vakevo vaka hantci; mukemuo veku handekela vya hantci, keho vaka hantci vaka tolilila vakevo. ⁶ Etu tu vaka Kalunga. Nkala uoshe adhivuka Kalunga a tolilila yetu. Uye keti ua kuli Kalunga keku tu tolilila. Kulyevi tuna dhivuka mpundhi ya vungulu na mpundhi ya ku shevuitha. ⁷ Vaka chidhango change, tu liyongoleni umo na mukuavo, muomu chidhango chikecho cha Kalunga, na uoshe uye ali na chidhango vana mutheme kuli Kalunga na ku dhivuka Kalunga. ⁸ Muntu uye ka kele na chidhango ka dhivuka Kalunga, muomu Kalunga yikeye chidhango. ⁹ Muomu lya chidhango echi cha Kalunga va chi yombolole muli yetu, viye Kalunga na tumu Munendi umo lika hano hantci linga tuka mone muono muomu lya yikeye. ¹⁰ Mukemuo muli chidhango, keti ngechiye tuyongola Kalunga, vuno ngechiye yikeye ua tu yongola, keho ua tumine Munendi akale chikombeleyo muomu lya milonga yetu. ¹¹ Vaka chidhango change, nga Kalunga na tu yonguele ngechiye, netu lalo tuna vuahela kuli yoingola umo na mukuavo. ¹² Na umo uahi ua mona Kalunga. Nga tuli yongola umo na mukuavo, Kalunga aka kala muli yetu, na liyango lyendi lika tumama muli yetu. ¹³ Mukemuo mu tu na dhivuka ngechiye tu li muli yikeye, nendi muli yetu, muomu yikeye ua tu hana yetu vimo vya ku Mpundhi yendi. ¹⁴ Netu lalo tuna vi mono na kuambulula vumbangi ngechiye Yishe ua tumine Mona mu ku kala muovole ua hantci. ¹⁵ Uoshe uye atava ngechiye Yesu yikeye Muna Kalunga, Kalunga aka kala muli yikeye na yikeye aka kala muli Kalunga. ¹⁶ Keho tua dhivukile na ku tcelela chidhango chiye Kalunga ali nacho kuli yetu. Kalunga yikeye chidhango, na uoshe uye akala mu chidhango cha Kalunga na Kalunga aka kala muli yikeye. ¹⁷ Muomu lya chi dhango echi chipanga mua vungulu hakati ketu, linga tukale na kuononoka hali tangua lya kupangula, muomu ngue yikeye, linga tuva voshe tuli hano hantci. ¹⁸ Mu chidhango komua kele lyova. Vuno chidhango cha ku yanguluka chikombila lyova kuti, muomu lyova lye kuneha kayando. Vuno na umo uye ali na lyova kova mupangele kuvuaha mu chidhango. ¹⁹ Etu tu yongola muomu Kalunga ua tu yonguele yetu ha kulivanga. ²⁰ Nga ahandeka nguendi, ''Njiyongola Kalunga'' vuno adhinda munayina, yikeye nakala muka vishaki. Muomu uoshe uye kayonguele munayina, uye ya mona, ka kayongola Kalunga, uye kanda amu mone. ²¹ Eli likelyo lishiko lalo lina tundu kuli yikeye: Nkala uoshe ayongola Kalunga na pande lalo kuyongola munayina uendi.