¹ Taleni chidhango cha ku tuvakana Tata na tu hana cho, ngechiye va tu tumbula vana va Kalunga, keho chili vene tu kakala. Muomu mu vithinga nyeka vene, vaka mavu kava tudhivuka muomu ka va mu dhivukile yikeye. ² Va ka chidhango change, mualolo tu vana va Kalunga, keho kanda chi chi yomboloke mu tu ka kala. Tuna dhivuka ngechiye Kilistu aka yomboloka tuka lifua nendi, muomu tu ka mu mona ngue muafua yikeye. ³ Nkala uoshe uye ali na ku tcelela echi muli yikeye na li yeletha ngue muana yele yendi. ⁴ Uoshe uye apanga mulonga ashaula lalo majui ali lishiko, muomu mulonga ukeuo ue ku shaula majui alishiko. ⁵ Keho muna dhivuka ngechiye yikeye ua yombolokele mu kuambata milonga, na muli yikeye komua kele mulonga. ⁶ Uoshe aka kala muli yikeye keku panga mulonga. Uoshe uye ue kupanga mulonga nolo kanda amu mona ndi ka mudhivuka yikeye. ⁷ Vanike va vandende, na umo uahi keti ami tanganethe. Uye ue kupanga vya vungulu ali mu vuvungulu, ngue Kilistu mu ka vungulu. ⁸ Uye ue ku panga mulonga yikeye muka Satana, muomu Satana yikeye ue kupanga mulonga kutunda ha kulivanga. Vikevyo vya na yombolola Muna Kalunga linga alekethe vipanga vya Satana. ⁹ Uoshe uye na themuka kuli Kalunga ke ku panga milonga muomu mbuto yendi yika kala muli yikeye. Keho katha ku panga milonga muomu na themuka kuli Kalunga. ¹⁰ Mukemo vana va Kalunga va yomboloka, na vana va Satana navo vayomboloka: uoshe ke ku panga vungulu keti ua Kalunga, nambe umo uye ke kuyongola munayina. ¹¹ Muomu lino likelyo lijui liye limu novu kutunda ha kulivanga: Ngechiye tu li yongole umo na mukuavo. ¹² Keti ngue Kayini, uye ua kele muka mulonga na ku tcihya mukuenje uendi. Vika vya tcihilile mukuenje uendi? Muomu vipanga vyendi vya kele vya ku vihya na mukuenje uendi vya kele vya vingulu. ¹³ Vamuna nana keti mukomoke nga vaka hantci va midhinda yeni. ¹⁴ Etu tuna dhivuka ngechiye tuna tundu ku kutca tuna hete ku muono, muomu tuyongola vamuna nana. Uoshe uye ka kala na chidhango aka kala mu kutca. ¹⁵ Uoshe uye adhinda munayina yikeye muka kutcihya. Neni muna dhivuka ngechiye muka kutcihya muono ka ue kuhua ka ue kukala mo. ¹⁶ Mukemo tuna dhivuka chidhango, muomu Kilistu ua lihanene muono uendi muomu yetu. Yetu lalo tuna vuahela kuhana myono yetu kuli vamuna nana. ¹⁷ Vuno uoshe ali na vufuko vua hano hantci, keho amona munayina vuhutu, na ku panga nendi vulumbi, vati chidhango cha Kalunga chika kala muli yikeye? ¹⁸ Vana vange, va vanike, keti muyongole vya majui ndi vya mu vindaka, vuno mu vipanga na mu vungulu. ¹⁹ Mukemo tu ka dhivuka ngechiye tu vaka vungulu, na ku holoketha vimbunge vyetu ku mesho endi. ²⁰ Muomu nga vimbunge vyetu yitu payetha, Kalunga ua tuvakana vi mbunge vyetu, na yikeye adhivuka vyuma vyoshe. ²¹ Vaka chidhango change, nga vimbunge vyetu kavi ka viyitha, tuli na kuyolela kuli Kalunga. ²² Keho nkala chuma chi tulomba tuka chi tambula kuli yikeye, muomu tue ku takametha majui alishiko endi na kupanga vyuma viye vimu nehela kuyolela. ²³ Eli likelyo lishiko lyendi: Liye li tu tcelela mu lidhina lya Mona Yesu Kilistu na ku yongola umo na mukuavo, ngue yikeye ua tuhanene lishiko eli. ²⁴ Uye uoshe atakametha majui a lishiko lya Kalunga endi aka kala muli yikeye, na Kalunga aka kala muli yikeye. Keho mukemuo tu na dhivuka ngechiye endi aka kala muli yetu, ha Mpundhi yiye yana hana kuli yetu.