¹ Vana vange va vandende nji mi thonena vyuma evi linga keti mu pange mulonga. Vuno nga umo apanga mulonga tu li na likumiyo kuli Tata, Yesu Kilistu, umo uye muka kuvuaha. ² Yakeye chikombeleyo muomu lya milonga yetu, vuno lalo muomu lya hantci hoshe. ³ Mukemo tu na dhivuka ngechiye tua mudhivukile, nga tutakametha majui endi alishiko. ⁴ Umo uye ahandeka nguendi, ''nji dhivuka Kalunga '' vuno ke ku takametha majui alishiko lyendi endi muka vishaki, na vungulu muli yikeye ua himo. ⁵ Vuno uoshe ue ku takametha lijui lyendi, muli yikeye vungulu vua chidhango cha Kalunga ua kele ua ku vuaha. Kuli evi tu na dhivuka ngechiye tuli muli yikeye: ⁶ nkala uoshe ahandeka nguendi, akala muli Kalunga na vuahela kuenda lalo ngue muendekele yikeye. ⁷ Vaka chidhango change, ku nja mi thonenene lijui lya lishiko lya lihya, vuno lijui lya lishiko lya laya liye lyo mua kele nalyo ha ku livanga. Lishiko lya laya likelyo lijui liye lyo muovuile. ⁸ Ange nji mithonena lishiko lya lihya, liye lya vungulu muli Kilistu na ku li yeni, muomu muthithi uli na ku hita, na mutanya ua vungulu uli na ku tuila cheke. ⁹ Uye umo akahandeka nguendi ali mu mutanya na ku dhinda muna yina ali mu muthithi na mualolo muali lalo. ¹⁰ Uye ayongola munayina akala mu mutanya na muli yikeye na chimo chahi chi munona mo chahi. ¹¹ Vuno umo uye adhinda muna yina na kuenda mu muthithi; ka dhivuka kuiko kuaya muomu muthithi una dhivaletha mesho endi. ¹² Njika thonena kuli yeni, vanike, muomu milonga yeni vana yechela muomu lya lidhina lyendi. ¹³ njina thonena kuli yeni, va yishe , muomu muna dhivuka umo uye ua kele ha kulivanga. Njika thonena kuli yeni, vakuenje, muomu uye muka mulonga muna mu tuvakana. Njina thono kuli yeni, vanike , muomu muna dhivuka Yisho. ¹⁴ Njina thono kuli yeni, va yishe , muomu muna dhivuka umo uye ua li vangele. Njina thono kuli yeni, vakuenje, muomu muli na ndhili, na lijui lya Kalunga lika kala muli yeni, keho uye muka mulonga muka mu tuvakana. ¹⁵ Keti mu yongole mavu ndi vyuma viye vili hantci. Nga umo ayongola vya hantci, chidhango cha Tata kucha kele mo muli yikeye. ¹⁶ Muomu vyoshe vili hantci - lishungu lya kutcitu, na lishungu lya mesho, na ku viyongola vya muono - keti vya kuli Tata vuno vya hantci. ¹⁷ Keho mavu ahita na lishungu lyauo. Vuno nkala uoshe ue ku panga chidhango cha Kalunga aka kala myaka yoshe. ¹⁸ Vanike, yino yikeyo ntcimbu ya ku manethela. Ngue mu mua vyuvuile ngechiye ante kilistu akenja, mualolo va na katuka va ante kilistu va vengi va nenja. Kuli evi tuna dhivuka ngechiye yikeyo ntcimbu ya ku manethela. ¹⁹ Vakevo va tuhukile muli yetu, vuno kava kele ko kuli yetu. Muomu nga va kele vetu nga vana tumamene netu. Vuno va tuhukile, va yombolokele ngechiye ko va kele ko kuli yetu. ²⁰ Keho uye ua kele umo ua Kuyela, na ku li yeni voshe mua vi dhivukile. ²¹ Kanja thonene kuli yeni muomu komua dhivukile vungulu, vuno muomu mu vu dhivuka, keho muomu vishaki na umo uahi atunda ku vungulu. ²² Muka vishaki vuno uye umo avyana ngechiye Yesu yikeye Kilistu? Muntu uye yikeye ante kilistu, uye vene avyana Yishe na Mona. ²³ Naumo uahi avyana Mona ali na Yishe. Nkala umo atava kuli Mona ali na Yishe lalo. ²⁴ Muomu yeni, chiye chimu novu ha kulivanga chi kale muli yeni. Nga chiye chu muovuile ha kulivanga chikale muli yeni, neni lalo mukala muli Mona na muli Yishe. ²⁵ Eli likelyo lyuvuathano lya na tu hana - lya muono ka ue kuhua. ²⁶ Njina thono vyuma evi kuli yeni vya kuli vaye va yongola ku mi shevuitha. ²⁷ Ngue muomu yeni, ku vuavuetha kuye ku mua tambuile kuli yikeye ku ka kala neni, keho keti uka thetele umo linga aku longethe. Vuno ngue ku vuavuetha kuendi ku milongetha yeni vyoshe na viye vya vingulu keti vishaki keho ngue muye cha milongethele, chikale muli yeni. ²⁸ Mualolo, vanike, kaleni muli yakeye linga muye mua ka yomboloka tu ka kale na kuli kehatha keti shuama kulutue lya kuinja kuendi. ²⁹ Nga mua dhivukile ngechiye endi ua vungulu, muna dhivuka ngechiye nkala umo uye apanga viye vya vingulu na themuka kuli yikeye.