¹ Viye vya kele ha kulivanga ha ku livanga- viye tu novu, viye tuna mono na mesho etu, vi tu na tale, na mavoko etu ana kuata ko - ku lijui lya muono. ² Lalo, muono ua yombolokele, netu tuna u mono, keho tuli na kuambulula vumbangi, na ku myambuila muono uye ka ue kuhua, uye ua kele kuli Tata keho ua yombolokele kuli yetu. ³ Viye vi tu na mono na kuvua, vikevyo vi tu myambuluila, linga yeni lalo muli kuate netu. Chili kuli kuata kuetu kuli hamo na Tata na Munendi Yesu Kilistu. ⁴ Lalo nevi vi tuna thono, linga liyango lika shule. ⁵ Ano akeuo majui aye otuo vuile kuli yakeye na kuambulula kuli yeni: Kalunga yakeye mutanya keho muli yakeye ko mua kele muthithi. ⁶ Nga tuhandeka nguetu, tuli kuateni nendi na kuenda muthithi, tu ka handeka vishaki ka tu panga vungulu. ⁷ Vuno nga tuenda mu mutanya ngue yakeye ali mu mutanya, tu li na kuli kuata umo na mukuavo na maninga a Yesu Mona aka tukusha ku milonga yetu yoshe. ⁸ Nga tu handeka nguetu, ko tua kele na mulonga, tu ka likuitha yetu vavenya, na vungulu vua himo muli yetu. ⁹ Vuno nga tuli tavela milonga yetu yakeye muka kutcelela na kuechela milonga yetu, na ku tu toketha yetu ku ku vihya kuoshe. ¹⁰ Nga tu handeka nguetu ka tua pangele mulonga, tu na muhaka muka vishaki na lijui lyendi lyahi mo muli yetu.