¹ Naomi, ngumweyi yendi, mpo amutantilire shi, ''Monande, kuni kushanena livango ghupwiyumuke ko, mposhi vininke navintje ngavikuyende po nawa. ² Makura Boazi, mukafumu ogho anakaro ashi varughani vendi vavakadona mbo wakaraghuranga navo twakutundakana naye. Kenga shi, ghuye kaghayerwita mahangu namuntji matiku palivango lyakupumina. ³ Mpo ngoli shi, kuyoghe naumoye, ghukuwaveke naumoye, dwata nawa makura ghuyende palivango lyakupumina. Ngoli washa kamupulitira ghakakudimburure dogoro akamane kulya nakunwa. ⁴ Ene ngoli opo ghakagomba, kadimburure livango olyo anakagombera, mposhi kunyima yaruvede ove umuyendere, ghukafikure mpadi dendi, makura ghukarare mpopo. ⁵ Ano ghuye kwakakutantera ovyo ghukaruwana.'' Ruth mpo atantilire ngumweyi yendi Naomi ashi, ''Kunikarughana navintje ovyo una ghamba.'' ⁶ Ano mpo aghurumukire ayende kulivango lyakupumina, ghuye nka ghakwamine marondoro ogho ghamupire ngumweyi yendi. ⁷ Boazi opo amanine kulya nakunwa namutjima wendi unankondopa, mpo ghayendire ghakagombe kuuhura wambuto oyo vapongayikire. Mukadona mpo ghayire kadidi-kadidi, kufikura mpadi dendi kumwe nakurara mpopo. ⁸ Vyashorokire hambara pakatji kamatiku opo mukafumu ghayakumukire, ghapiruka, makura mpopo kumona mukamali anarara kumpadi dendi. ⁹ Aghamba, ''Ove re?'' mo apulire Boazi. ''Ame Ruth mukareli ghoye wamukamali. Fika mukareli ghoye wakamali, mbyevishi ve ne muntu ogho twakutundakana naye.'' ¹⁰ Boazi mpo ghalimbulire ashi, ''Monande Hompa ghakutungike. Una negheda unongo pakuyahulilira kupitakana pakuhoverera, mukonda kapi wayenda kwakehe mumatighona, ghakare ashi mungagho ndi muhepwe. ¹¹ Weno, monande, washakara na ghoma! Kunikurughanena kehe vino ghughamba, mukonda vantu navantje vamudoropa vanayiva ashi ove ne mukamali wamungagho. ¹² Vyaushiri ashi nakutundakana nove, ene ngoli mpwali ogho ghakutundakano nove unene kumpitakana me. ¹³ Matiku ghanamuntji ne kara nkokuno, makura ngurangura nangeshi ngatikitemo shirughana shaukaliro, uwa, avitikitemo. Ene ngoli ntjeneshi kapi ghavitikitamo, kunivirughana tupu naumwande muliparu lya Hompa. Rara nange ngurangura. ¹⁴ Makura ghuye mpo gharalire kumpadi dendi dogoro ngurangura. Ene ngoli ghuye mpo arambukire ngurangura yayinene. Kumeho yakurenka ashi muntu ghavhure kudimburura muntu ghunyendi. Mbyevishi Boazi aghambire, ''Vyashayuvika kuvantu ashi mukamali nko anaya kulivango lyakupumina mbuto. ¹⁵ Makura Boazi atanta ashi, ''Yita likeshe lyoye ghulikwate nawa.'' Opo ghaviruwanine ngoweyo, mpo ghametire fendera ntayimwe dadinene da mbuto, kumwe nakumutwika pamutwe wendi. Makura mpo ghayendire mudoropa. ¹⁶ Ruth opo ayire kwangumweyi yendi ghamupura ngumweyi yendi ashi, ''Weni mo vinakakuyenda po monande?'' Makura Ruth mpo atantilire navintje ovyo gharuwanine mukafumu ghunya kwendi. ¹⁷ Mpo amutantilire nka ashi, ''Odo fendera ntayimwe ndo anakampa, mukonda anantantere ashi, 'Washayenda muporongwa kwangumweyi yoye.''' ¹⁸ Makura Naomi aghamba, ''Kara tanko kuno monande dogoro ngauyuve ashi weni omo ngavikara vitundwamo, mbyevishi mukafumu unya kapi apwiyumuka nange ghamane kuvirughana namuntji.''