¹ Makura Naomi ghakalire nashilyo shalikoro lyavyendi, mukafumu waugara wamumbunga yaElimeleki, walidina Boazi. ² Ruth, mukamali wamu Moabu, aghamba kwa Naomi, ''Weno tanko niyende nikagugurure mbuto mulifuva, kunikakwama kehe uno mufe nkenda. Naomi mpo amutantilire ashi ''Yenda monande.'' ³ Ruth mpo ayendire akagugurure ovyo vyahupaliro mulifuva opo vamanitire kuyangura. Ghuye mpo ghayire kuruha rwalifuva olyo lyakaliro lyaBoazi, ogho akaliro shilyo shambunga yaElimeleki. ⁴ Kadidi tupu Boazi mpo ayire atunde kuBetelehemu makura mpo ghatantilire vayanguli ashi, ''Hompa ghakare nanwe.'' Vavo mpo vamulimbulire ashi, ''Hompa ghakare nove.'' ⁵ Makura Boazi mpo ghatantilire mukareli wendi ogho akengeliro vayanguli ashi, ''Kwamukafumu munke anahamene uno mukamali.'' ⁶ Ano mukareli gho akengeliro vayanguli mpo ghalimbulire ashi, ''Mukadona wa muMoabu ogho katundiliri kushirongo sha Moabu na Naomi. ⁷ Ghuye kunantantere ashi, ''Nakanderere, kuvhura nigugurure ovyo vihuparo mo mulifuva opo vamana kuyangura vayanguli mbuto.' Ghuye mpo anaya kuno mbyo anatwikiri kutundilira ngurangura dogoro weno, kughupako vyo anapwiyumuka kadidi mundjugho.'' ⁸ Makura Boazi atantere Ruth ashi, ''Kuna kundjuva monande? Washa kagugurura mulifuva nalyo peke, washa tundamo mulifuva lyande. Ngoli kara momuno ghurughane naviruwani vande vavakadona. ⁹ Kengera tupu mulifuva omo vanakurughana vakafumu ghukwame vakamali vamweya. Kapi narondora vakafumu vapire kukuguma ndi? Kehe pano ghuyuvira linota, ove kuvhura tupu ghuyende kumapata ghamema ghukanwe mema gho vanavete vakafumu.'' ¹⁰ Makura mpo atongamine kumeho yaBoazi, ghagumite shipara shendi palivhu. Makura ghamutantere ashi, ''Mukonda munke nawanene ufenkenda wakufana ngoli mumantjo ghoye, wakakurenkita ghukakupakere shinka name, muyeni?'' ¹¹ Boazi mpo ghalimbulire nakumutantera ashi, ''Kavintantere navintje vyo kaghuruwana kutunda po kadohoroka nturaumbo yoye. Ove unashuvu vasho, vanyoko na shirongo shamvharerwa yoye ghukwame ngumweyi yoye ghuye kuvantu ovo wapira kuyiva. ¹² Hompa ghakupe muyangu waviruwana vyoye. Ghuwane mfuto nayintje kwa Hompa Karunga waIsraeli omo mumavava ghendi unayawana ghuturo. ¹³ Makura mpo gharenkire ashi, ''Mpulitirenu niwane ufenkenda mumantjo ghoye, ntilyande, ntani nka una ghamba naunongo kukwande nampindi momu nakara ashi ame kapishi ghumwe wavakareli voye wamukamali.'' ¹⁴ Pamutwe katji Boazi mpo atantilire Ruth ashi, ''Yiya kuno uyalye mboroto uyayidivide muvhinyu.'' Ghuye kwashungilire kumwe na vayanguli, ghuye amupa mbuto yakuyota. Alire nange ghakutire mpo ghashuvire po vimwe. ¹⁵ Opo ashapukire ghakongaweda mbuto, Boazi arawiri vakafumu ghona vendi, nakughamba, ''Mushuvenu ghakongawede mbuto, mwasha mutantera ghapire kuvirughana. ¹⁶ Ntani nka mumushuvire ghakongawede, anwe mwasha mugarapera.'' ¹⁷ Ghuye mpo agugulire mulifuva nange matiku. Makura ghamupa mbuto oyo ghagugulire, mbuto yo ayikara yayingi. ¹⁸ Mpo ghayidamwine kumwe nakuyenda mudoropa. Makura ngumweyi yendi ghamono ovyo ghakongawedire. Ruth mpo ghaupire nka mbuto yakuyota eyi ghashuvirepo pamuyusha wendi kumwe nakuyipa kwa ngumweyi yendi. ¹⁹ Ngumweyi yendi mpo amupulire ashi, ''Kuni unakagugurulira namuntji? Kuni unakaruwanena? Mukafumu gho anakuvatero namuntji ne vamutungike.'' Makura Ruth ghatantereko ngumweyi yendi kuhamena mukafumu ogho ghawekiro lifuva munya ghakaruwanine. Lidina lyogho mukafumu ghaweko olyo lifuva nakarughanena namuntji, ndje Boazi.'' ²⁰ Naomi aghamba kwa swara yendi ashi, ''Hompa ghamutungike, ogho ghapiro kushuva lifumadeko kuvayumi na vafe.'' ²¹ Ruth mukamali wa muMoabu mpo aghambire ashi, ''Muushiri, ghuye kunantantere ashi unahepa kukara pepi navamati ghona vande nange vamane namuyangu wande.'' ²² Naomi mpo ghatantilire nka Ruth ngumweyi yendi ashi, ''Vinawapa monande omo unakuyenda navarughani vendi vavakadona mposhi ghupire karemanena mulifuva nalyo peke.'' ²³ Makura ghuye ghakara pepi navarughani vaBoazi vavakamali mposhi ghavure kugugurura nange kuuhura wamuyangu wambuto nadintje. Ghuye ghatungire nangumweyi yendi.