¹ Makura Boazi mpo ghayendire kuheka nakashungira nkoko. Kadidi tupu, mukaliro unya ghatantire Boazi mpo ayire. Boazi amutantere ashi, ''Muholi, yiya uyashungire pano.'' Mukafumu aya makura ayashungiri. ² Makura Boazi aghupu vakurona murongo vamudoropa kumwe nakuvatantera ashi, ''Shungirenu pano.'' Ano avashungiri. ³ Boazi atantere mukaliro unya ashi,''Naomi, ogho kakavyuko kushirongo sha Mowabu, kuna kughulita ruha rwarunene rwa livhu olyo lyakaliro lyamughunyetu Elimeleki. ⁴ Mbyo naghayara kukupukurura ko nakukutantera ashi, 'Lighure kumeho yavano vanashungiro kumeho yetu, ntani nka kumeho ya vakurona vavantu vande. Ntjene unashana kumangurura, mangurura. Ntjene kapi unashana kumangurura, makura ntantere, mposhi name niyivilite, mpo ngoli shi kwato wakumangurura akukarero pepi nove, ntani ame kuruku roye.'' Makura mukafumu ghumwe atanta shi, ''Kunimangurura.'' ⁵ Boazi atanta, muliyuva olyo ngaughura lifuva mulighoko lya Naomi, una kona kughupa Ruth mukamali wamuMowabu, mufita-vya, mundjira yakuwapera mukuyerura lidina lya mufe mughupingwa wendi.'' ⁶ Makura mukafumu akaliro pepi atanta, ''Kapi nimangurura panaumwande hana kudjonaura ghupingwa wanaumwande. Waghupa unanankondo walimanguruko lyande panaumoye, mpo ngoli shi kapi nivimangurura.'' ⁷ Weno yino ndjo mpo yakaliroko pamaruvede ghakapito muIsraeli mushinka shalimanguruko namukukupa mauwa. Mukumbangipara navintje, muntu kughupa nkaku yendi nakutapa kuvamaparambo ghendi; uno ngo ghukaro kavaneghedanga wapalikuyuvho lyapaveta muIsraeli. ⁸ Makura mukafumu akaliro pepi atanta kwa Boazi, ''Kughulire naumoye,'' ano aghupuko vicapa vyendi. ⁹ Boazi atanta kuvakurona na kuvantu navantje, ''Anwe namuntji nakumbangipara ashi naghuru navintje vyakaliro shi vyaElimaleki ntani navintje vino kwakalire vyaKiliyoni na Mahiloni vitunde mulighoko lya Naomi. ¹⁰ Waro nka Ruth mukamali wamu Mowabu, mukamali waMahiloni, namutambura akare mukamali wande, mundjira yakuwapera mukufumadeka lidina lyamukafumu ghafo mukumupinga, mposhi mukudira kughupa lidina lyendi mukatji kavakuru na vaghuni vendi na mumangeneno ghalivango lyendi. Namuntji munangambipara!'' ¹¹ Vantu navantje vakaliro palivero na vakurona avaghamba, ''Atwe vambangi. Hompa Karunga ature mukamali anakuyo mulipata lyoye yira Racheli na Leya, vaviri ovo vadikiro mundi wavaIsraeli; ndi munakona kufunda muEfurate na mfumwa yalihafero muBetelehemu. ¹² Mundi wenu ndi ghukare yira mundi waPerezi, ogho ayita Tamari kuJuda, mwavanuke navantje ngaghuyita mwamukamali uno mwanuke.'' ¹³ Makura Boazi aghupu Ruth, nakukara mukamali wendi. Gharara naye, Hompa amupulitiri akare nalira, ghayita mumati. ¹⁴ Mukamali aghamba kwa Naomi, ''Hompa ndi ghapongoke, ogho anadiro kukushuva namuntji ndi noveshi unkarere pepi, mukeke uno. Lidina lyendi ndi lifumane muIsraeli. ¹⁵ Ndi ghumuwapeke muliparu lyendi na kumuvembelita mughukondi woye, kwa ngumweyi yoye, gho ghakuhoro, gho ghakaro hasha koye kupitakana vana voye ntambiri, wamuyitira.''' ¹⁶ Naomi aghupu mwanuke, amurangeke mundjugho, nakumupakera mbili. ¹⁷ Maparambo ghendi wamukamali amuruku lidina, linakutanto shi, ''Mona wamumati anashampuruka Naomi.'' Kwamurukire Obedi. Ghakara sha wavaJesse, ogho akaliro vashe vaDavid. ¹⁸ Kwakalire ruvaro rwa Perezi: Perezi akara vashe vaHezironi, ¹⁹ Hezironi ghayakara vashe vaRami, Rami ghayakara vashe vaAminadabi, ²⁰ Aminadabi ghayakara vashe vaNashoni, Nashoni ghayakara vashe vaSalomoni, ²¹ Salomoni ghayakara vashe vaBoyazi, Boyazi ghayakara vashe vaObedi, ²² Obedi ghayakara vashe vaDavid.