¹ Kwamupititiri yimbiti; paMuti Labeni ngovera. Lipisarome lyaDaviti. Ame ngani tapa mpandu kwaKarunga namutjima wande naghuntjeya; Ame ngani tanta kumbinga yaviruwana vyoye vya kutetukita. ² Ame ngani hafa nakupembura momoye; Ame ngani yimba kutanga lidina lyoye Shankondo Nkondo! ³ Opo vakankore vande vana vyuka, vana kuganda nakudjonaghuka kumeho yoye. ⁴ Ove kokwaghamena ghuhungiki wande; ove kushungira mulipuna lyoye, mpanguro hungami! ⁵ Ove kwapangura dimuhoko; mbyo wadjonaghura vavadona, ove kwadimangana madina ghavo naruntje nakunaruntjeya. ⁶ Mukankore kwayungurukapo nunu opo wavhukumineko mbara davo. Livhuruko lyavo nalintje lyapwako. ⁷ Ngoli Karunga kwakarako nakunaruntjeya; ghuye kwatamunwina lipuna lyendi kughuhungami. ⁸ Ghuye ngapangura ghudjuni pakuhungama, ntani ghuye ngakarerapo mpanguro kudimuhoko naghushiri. ⁹ Karunga ndje ghunankondo wavo vadininina, ghunankondo muvirugho vya maghudito. ¹⁰ Ovo vayivo lidina lyoye vahuguvara moye, ove, Karunga, washa vashuvilira ovo vakushana-shanango. ¹¹ Kuyimba kutanga Karunga, ogho ana kupangero muSiyoni; tantera dimuhoko ovyo arughana. ¹² Hompa ogho avhurukango honde yavanyandi; ghuye nakuvhuramashi nkugho yavanyandi mo. ¹³ Mfere nkenda, Karunga, kenga omo vandi ghirunapo ovo vanyengo, ove tupu aghuhuru wakuvhura kuntampuramo mulivero lya mfa. ¹⁴ Hawe, ame tupu kutongonona ghuwa ghoye naghuntjeya. Mudimuvero damukadona waSiyoni, Ame ngani pambura muliyovoko lyoye! ¹⁵ Dimuhoko dawira mulikwina eli vakutimina vene; Mpandi davo kwafa mulikwe lya kutegha vene. ¹⁶ Karunga akuyivita kare mwene; ghuye kukarerapo mpanguro; mudona kufa muviruwana vyamwene. Shera. ¹⁷ Mudona kuvyuka mulidamenena lya mfa, dimuhoko nadintje odo davhuramo Hompa. ¹⁸ Ano vahepwe narumweshi ngavavavhurama, lihuguvaro lyava vahepeka ndjo kukarerepo nange kunaruntjeya. ¹⁹ Shapuka, Karunga; washa renkita vantu vakushapukire; renka dimuhoko direngwe kushipara shoye. ²⁰ Vatororokite, Karunga; mposhi dimuhoko diyive ashi vavo vantu vakudjonaghuka. Shera.