¹ Mukonda munke, Karunga, una yimanene kughure? Mukonda munke ghuna kuhorekere muvirugho vya maghudito? ² Mukonda yamakutumbo ghavo, vantu vavahepwe kuna kuvarenkereramo; nakanderere vahepwe kuna kuvakwata namaghano ghavadona ogho vatulitapo. ³ Mudini karunga kukukangangera madovo lyamumutjima wendi; ghuye kutungika vamalyererera nakushwaghura Karunga. ⁴ Mudinikarunga kwandjanga; ghuye kapi ahepa Hompa. Ghuye narumweshi kughayara Hompa mukondashi kwendi ghuye kwato hepero yavyo. ⁵ Ghuye virugho navintje kukara mulipopero, ngoli lipanguro hungamo lyoye kuvapitapo papendi; ghuye kwadina vakankore vendi. ⁶ Ghuye kughamba mumutjima wendi, ''Ame narumweshi kapi nganiwa; nakumaruvharoshi ghakughuto ame kapi ngani gwanekera nashimpagwa,'' ⁷ Kanwa kendi kwayura matuka navimpempa, nankango dalishwaghu; ruraka rwendi kuremeka nakudjonaghura. ⁸ Ghuye kutaterera mumakombombo pepi nadimukunda; mumavango ghamaporeya nakudipaya vahanandjo; mantjo ghendi kwanwika kuvarupira nkondo. ⁹ Ghuye kuvandera mughuvando shikanyime mushishwa; ghuye kughombomana mulitaterero akwate vanyandi. Ghuye kukwata varupirankondo mukuvakokera mulikwe lyendi. ¹⁰ Ghukaro wendi kushondavera nakuku kurambanda; vavo makura kufa mumakwe ghendi gha nkondo. ¹¹ Ghuye kughamba mumutjima wendi; ''Hompa akuvhurama; afuka shipara shendi; kapi nka ngakenge nakunaku.'' ¹² Shapuka, Karunga! Yerura livoko lyoye, Hompa! Washavhurama vanyandi. ¹³ Mukonda munke vadona vashwenena Hompa nakughamba mumutjima wendi ashi, '' ove narumweshi kapi ngaghuntondora?'' ¹⁴ Ove wavididilika kare, ove kehe pana kukenga vanya varumbwangero naliguvo. Varupirankondo kakuhuguvalita vavene kukoye; ove kupopera vafita vasha. ¹⁵ Tjoraghura maghuru ghavadinikarunga navantu vavadona. Vavarwire virughanadona vyavo ovyo varuwana, ovo vaghayarangoshi ove kapi ngaghuvhura. ¹⁶ Karunga ne Hompa wakunaruntjeya; dimuhoko ngadi tjida mushirongo shendi. ¹⁷ Karunga, ove wayuvha mpumbwe davo varenkereramo; ove kupameka dimutjima davo, ove kuteyerera kundapero davo. ¹⁸ Ove kupopera vafita vasha navanyandi mposhi pashakara ghumwe pano palivhu ogho ngavarwito nkawaro.