Mupititi wambimbi. Lipisaromu lyaDaviti. ¹ Ame nataterera nalikudidimiko kwaHompa Karunga; ghuye ghanteghelireme nakuyuva shiliro shande. ² Ghuye kwangupiremo mulikwina lyashiponga, ghantundita mulirombo, ngoli ghuye ghatura mpadi dande paliwe kumwe nakukunga ndjira dande. ³ Ghuye ghatura rushumo rwarupe mukanwa kande, litangaghuko kwaKarunga wetu. Vayingi ngavavikenga kumwe nakumufumadeka ntani nakumuhuguvara mwaHompa Karunga. ⁴ Mutungiki muntu ghogho ghaturo Hompa Karunga ndje lihuguvaro ngoli kapi ghafumadeka vavakukunenepeka ndipo vatundo kwendi vakwame vipempa. ⁵ Vangi, Hompa Karunga Karunga wande, virughana vyaviwa warughana, ntani vighayara vyoye vyakuhamena kwetu kapi tuvivhura kuvitwenyaghura; nangeshi ame nangambipara mbyo navighamba, vyavyo kukara vyavingi kupitakana mukuvivhara. ⁶ Ove kwato ruhafo mundjambo ndipo muvishwakerera, ano ngoli wapahura mantjo ghande; ove kapi washana vishwakerera vidumba ndipo ndjambo yandjo. ⁷ Makura ghanighambame, ''Kenga, ame naya; ovyo vatjanga vyakuhamena kwande muvitjangwa vyambapira. ⁸ Ame kuvihafera kurughana ovyo washana, Karunga wande; Veta doye mpodili mumutjima wande.'' ⁹ Ame nahanita mbudi yaruhafo yaghupongoki ghoye mulipongo lyalinene; Hompa, waviyiva ashi kanwa kande kapi kashayeka mukukutanganga. ¹⁰ Ame kapi nafukilira ghupongoki ghoye mumutjima wande; ame nangambipara mughushiri-shiri ghoye naliyoghoko lyoye; ame kapi nafukilira likukwatakano lyoye lyamughushiri-shiri ndipo lihuguvaro lyoye lyalinene mulipongero lyalinene. ¹¹ Washa pungura virughana vyaghufenkenda kwande, Hompa Karunga; pulitirangoli likukwatakano lyoye lyaghumushirishiri nalihuguvaro lyoye lyalinene limpungure nkehepano. ¹² Viponga vyakudira kuvhura kuvhara vinankundurukida me; ndjo dande dinankwatere opo nakuvhura kukengashi nke nirughana; dinavuka kupitakana huki damumutwe wande, mutjima wande ghuna mvhuru. ¹³ Hompa Karunga hafere, mukumpoperame; kwangura ghumpopereme, Hompa. ¹⁴ Varenke vakare mulishwaghu kumwe nakuvashwenenena ovo vakwamakwamango liparu lyande valishimbepo. Varenke vavyuke nakuyitira lishwaghu, ovo vahaferango kundjonaghurame. ¹⁵ Renka viva teture mukonda yantjoni davo, mbovo vaghambango kwande, ''Aha, aha!'' ¹⁶ Ano ngoli kwanavantje ovo vashanango vashamberera nakuhafa mumoye; renka nkehe ghuno ghahoro liyoghoko lyoye ghaghambe nkehepano, ''Mpongolishi Hompa kumutangange.'' ¹⁷ Ame muhepwe namukaruhepo, ngoli Karunga ghuye kungayarame. Ove mbatero yande mbyo ghunaya mulipopero lyande; washakuranga, Hompa wande.