Mupititi wangovera, vaYeduthuni. LIpisaromu lyaDaviti. ¹ Ame natokolire, ''I ngani kukengera vighamba vyande mposhi kapishi nganiture ndjo navighamba vyande. Ame ngani pata kanwa kande mukatji vantudona.'' ² Ame namwenine; ame napungulire nkango dande nampiri mukughambavyaviwa, ngoli tjutju yande ghayikuwederere mwamunene. ³ Mutjima wande ghaghukara ghunayenye; opo nakughayalireko kwavino vininke, vyavyo kwapire yira mundiro. Ngoli muruhulilira ghanivareke kughamba. ⁴ ''Hompa, mvhurukiteme niyiva liyuva olyo ngalishaya liparu lyande ntani naliwederero mayuva ghande. Neghedeme ashi ngapi mwaka dinanguparereko. ⁵ Kenga, ove warenka mayuva ghande ghakare yira ghufupi walighoko lyande, ame mparukito yaliparu lyande yira vinke tupu kukoye. Vyaghushiri nkehe muntu munku wendi ghumwe tupu. ⁶ Vyaghushiri nkehe muntu kuyenda yira mundundumba. Vyaghushiri nkeheghuno kukwangwira kushana maghungagho nampiri kapi ghanayiva ashi weni ngaviwana. ⁷ Paweno, Hompa, vinke tupu nakutatererame? Ove ghaghuhuru nahuguvara. ⁸ Mpopereme kundjo dande; washa ntura nigwanekere novovyaghuvaya. ⁹ Ame namwena kapinka nakuyashura kanwa kande, mukonda ove wavirughano vino. ¹⁰ Shayeka kundemayikame, ame natjira mukonda yalifudo lyalighoko lyoye. ¹¹ Opo watengekanga vantu mukonda yandjo, ove kudjonaghura vininke vahafera yira limbonde; vyaghushiri vantu navantje vadona vavovanwi honde. ¹² Yuva ndapero yande, Hompa Karunga, nka ntegherereme; tegherera kushiliro shande! Washa kufita matwi kwande, ngoli ame nakara yira munantunda virongo koye, ghuturo wakurendarenda yira momo vakalire vakurona vande. ¹³ Pirura ruguvo roye kwande mposhi name nganimenyamenye nkawaro kumeho damfa dande.''