Lipisarumu lyaDaviti, kuyita livhurukito. ¹ Hompa Karunga washantjenenena mughugara ghoye; washa ntengekame murunyeghenyo roye. ² Ngoli lishevo lyoye kuntjovaghurame, nampiri lighoko lyoye kunkandwira palivhu. ³ Rutu rwande naruntje mughuvera mukonda yaghugara ghoye; mwato ghukanguki muvifupa vyande mukonda yandjo yande. ⁴ Ngoli ndjodande dampitakaname; dado dakara ghudito kwandeme. ⁵ Vironda vyande vinakaghura nkavyavyo kunuka mukonda yandjo dande daghuvaya. ⁶ Vyavyo kuntjuntjupita nikunyongamene nkavyavyo kuntwaghukita nkehe liyuva; Ame kuguvarara nkehe pano ghure waliyuva nalintje. ⁷ Ngoli likuyuvo lyande, ame napatakana kunakupya munda; kwato ghukanguki kunyama darutu rwande. ⁸ Ame naguvarara nakutjokaghuka; kulilira munda mukonda yatjutju yamutjima wande. ⁹ Hompa, ove kuyuva mutjima wande likunungaghuro wagho mughunenenene. ¹⁰ Mutjima wande kunakutukaghuka, nkondo dande nakuntjuvapo, namantjo ghande nakudivira. ¹¹ Vaholivande navovankwamango vantjuvame mukonda yaghukaro wande; vamaparambo vande vanankarere ghure. ¹² Ovo vakwamakwamango liparu lyande vavokuntegha viraha. Ovo vashanango kudjonaghura liparu lyande kughamba nkango dadidona navighamba vyarushongo liyuva nalintje. ¹³ Ano ngoli me, yira muntu wakufa matwi kwato kuviyuva; Ame yira shipurupuru wakudira kughamba. ¹⁴ Ame yira muntu ghogho ghadirango kuyuva nakulimburura. ¹⁵ Mughushiri ame kutatererave, Hompa Karunga; ove ngaghu limburura, Hompa Karunga wande. ¹⁶ Ame nakuvighamba vino mposhi vankore vande vahafere kwande. Nangeshi mpadi yande ngayisheremete, vavo ngava rughana vininke vyakudira kuwapera kwande. ¹⁷ Ngoli ame ntantani nipunduke, nka ame mutjutju yakudira kushaya. ¹⁸ Ame nakutongonona ghundjoni wande; Ame nakara nashinka kundjo yande. ¹⁹ Ano ngoli vankore vande vanavuka; ovo vanyengo mulipuko vanakara vavangi. ²⁰ Vavo kuntondora ghudona kuvinke vyaviwa; Vavo kundjitira marundiro kwande mpindi ngoli ame ovyo nakwama vyaviwa. ²¹ Washa ntjuvilirame , Hompa; Karunga wande, washa karera ghure name. ²² Kwangurako ghumvhatereme, Hompa, liyoghoro lyande.