Lipisaromu lyaDaviti. ¹ Washa kengerera vakuyoghotere mukonda yavarughanidona; Washa vayuvira nyengo ovo varughanango vyakudira ghuhunga. ² Morwashi ntantani ngavakukute yira mushoni nakutuva yira shimenwa shashitondo. ³ Huguvara mwaHompa Karunga nka rughana vyaviwa; shungira mulivango nakulya mughushiri-shiri. ⁴ Mpongolishi ghuhafe panaghumoye mwaKarunga, morwa ghuye ngakupa ovyo wahafera mutjima ghoye. ⁵ Tapa ndjira doye kwaKarunga; huguvara mwendi, mposhi ghuye ngakurughanenepo. ⁶ Ghuye nganeyeda ghumanguruki ghoye yira ghukenu waliyuva naghunongo ghoye yira liyuva lyamutwe katji. ⁷ Yimana ndjikiti kumeho yaKarunga ntani ghutaterere nalididimiko kwendi. Washa garapa nangeshi ghunyoye vyatompoka muvirughana vyendi, ndipo gharughane ntegho dadidona. ⁸ Washa garaga nakutukuka. Washa kudivikira. Vino mbyo vyayititango ghudito. ⁹ Varughanighudona ngavahupako, ano ngoli ovo vataterero Hompa Karunga ngava pinga shirongo. ¹⁰ Pashirugho shashifupi murwana wamudona ngadongonoka; ngaghukenga palivango lyendi, ano ngoli ghuye ngalishuva. ¹¹ Ano ngoli ovo vaghomoko ngava pinga shirongo ngavahafa muviwana vyavinene. ¹² Murwana wamudona kuteya ghunkore kwamupongoki nka ghuye kukushumashuma mughugara ghunkore naye. ¹³ Karunga ghuye kushepa shikendjo, morwa ghuye kukengashi liyuva lyendi linatiki. ¹⁴ Vadona vashimba-shimba marufuro ghavo ntani vadera kare maghuta ghankandja vaponye vahepeki nahepwe, vadipaghe ovo vahungamo. ¹⁵ Marufuro ghavo ngaghatwa dimutjima danaghumwavo, ntani maghuta ghavo ngaghatjoka. ¹⁶ Vyakara hasha kuweka vyakushetekera kuvapongoki kapishi yira viweka vyavingi vyavantu dona. ¹⁷ Ghukavita wavantudona ngaghu djonaghukapo, ano ngoli Hompa Karunga ngavatera vantu vakupongoka. ¹⁸ Hompa Karunga kukengera vahungami mwankehe liyuva, ntani ghupingwa wavo ngaghukara wakukarererapo. ¹⁹ Vavo kapi ngava shwaghuka muruvede rwarudona. Lirumbu ngaliye weni, vavo shimpe ngavakara novyakulya. ²⁰ Ano ngoli vakafumudona ngava fererera. Vanankore vaHompa Karunga ngavakara yira ghuwa ghamalyero ghamushoni; vavo ngavava djonaghura kumwe nakudongonokapo mumuti. ²¹ Murwana wamudona kuromba ngoli kwato kufuta, ano ngoli muntu wakupongoka kapi ghahangura nka kutapa. ²² Ovo ghatungika Hompa Karunga ngavapinga shirongo; ovo ghafinga Hompa ngavahupako. ²³ MwaKarunga ndjira damurwana ghakarererangapo, ovo mbo varwana ghashana kukenga mumantjo ghendi. ²⁴ Nampiri ghuye ghapunduke, ghuye kapi ngakuganda kagali, morwa Karunga kumukwaterera nalighoko lyendi. ²⁵ Nakalire mwanuke ngoli panamuntji name nakuru; kapi nakenga shimpe muntu wakupongoka vamukomberere ndipo vanavendi vakushenge kumboroto. ²⁶ Pashirugho nashintje ghuye mufenkenda nka kutapa vanavendi vakara vatungiki. ²⁷ Tundenuko kughudona nakurughana vyakuwapera; mposhi ngavamupopere nanaruntje. ²⁸ Ngoli Hompa Karunga ghahora ghumanguruki ghuye nka kapi ghakengereranga ovo vamukarerango mughushiri. Ghuye kwavapunguranga naruntje, ngoli ruvharo vantudona ngavavhuramako. ²⁹ Vakupongoka ngavapinga shirongo nakutungamo kukarererapo. ³⁰ Kanwa kamuntu wakupongoka kughamba vyaghunongo ntani ghumanguruki kukuwederera. ³¹ Muragho waKarunga mumutjima wendi wakara; mpadi dendi kapi ngadisheremeta. ³² Muntu wamudona kukeverera muntu wakupongoka nakushana kumudipaghapo. ³³ Ngoli Karunga kapi ngamushuvilira mumaghoko ghamuntudona. ³⁴ Kutaterera Karunga nakukwama ndjira yendi, mposhi ghuye ngakuyerura ghupinge shirongo. Ngamuvikenga opo ngavavashuvako varughanidona. ³⁵ Ame nakenga vadona navantu vakutukuka vakuhananga yira shitondo shamahako mulivhu lyasho. ³⁶ Ano ngoli pakapitapo nka, ghuye pato. Ame ghanimukamushana-shana, kapi navhulire kamuwanapo. ³⁷ Keverera murwana wandunge, ntani mereka waghuhungami; mpoyili meho yayiwa kwamurwana wampora. ³⁸ Vatulindjo ngavava djonaghurapo; meho yavantudona ngayidongonokapo. ³⁹ Liyoghoko lyamupongoki kwatundiliranga kwaHompa; ghuye kuvakunga mumaruvede rwamaghudito. ⁴⁰ Hompa Karunga kuvavatera nakuvayoghoramo. Ghuye kuvayoghora kuvakafumu vaghudona nakuvapopera mukonda vavo vatura ghuvando wavo mwendi.