Mupititi wavambimbi. Lipisaromu lyaDaviti mukareli waHompa ¹ Karunga. Murwana wavirughanidona kughamba vyandjo yaveta mutundilira munda yamutjima wendi, ghuye kwato kutjira Hompa Karunga mumantjo ghendi. ² Ghuye kukushengawida naghumwendi, kughayarashi ndjo yendi kapi ngavayimuwanenena nakuyimunyengera. ³ Nkango dendi dandjo nakupukita; ghuye kapi ghashana ghunongo nakurughana ghuwa. ⁴ Ghuye ndaghakarera paghuro, ghuye kughayara ndjira dandjo; ghuye kufanayika ndjira daghudona mpatjako; kapi ghashwenenanga ghudona. ⁵ Likukwatakano lyoye lyamughushiri-shiri, Hompa Karunga, lyatika kumawiru; lididimiko lyoye lyatika kumaremo. ⁶ Ghupongoki ghoye wakara yira ndundu daKarunga; Mpanguro doye yira ghudami waghunene. Hompa Karunga, ove wapungura navintje vimuna navantu. ⁷ Likukwatakano lyoye lyamughushiri-shiri liwaghunene, Karunga! Vantu vavo kukara naghuvando munda yamundunduma yamavava ghoye. ⁸ Vavo kukushamberera viwana vyavingi vyamundjugho yoye; Ove kuvapulidira vanwe mudimukuro odo wavashanena. ⁹ Moyeve ndjo mbarekero yaliparu; mukenu ghoye atwe ngatukenga ghukenu. ¹⁰ Wedererako likukwatakano lyoye lyakuyulilira lyamughushiri-shiri kwavo vakuyivo, ghutakamine kwavo vahungamo dimutjima. ¹¹ Washa kengerera mpandi yavantu vakukunenepeka yitike kwande. Washa kengerera lighoko lyavadona lintjingaghure. ¹² Kughure kunya varughanidona vakugandera; vavo vavatompamita ntani kapi vana kuvhura kushapuka nka.