LIpisaromu lyaDaviti. ¹ Hompa Karunga, kurughana ghunkore kovo varughanango ghunkore name; ghuye kurwana ghunkore novo varwanango ghunkore name. ² Shimba shikukandulito shoye shashididi ntani nashikukandulito shashinene; shapuka nakumpopera me. ³ Rughanita lighonga lyoye nalikuva lyoye lyakurwanita kwavo vanakunkwamome; tantera monyo wande, '' Ame liyoghoro lyoye.'' ⁴ Mpo ngolishi Kwavo vakwama-kwamango liparu lyande vashwaghuke. Kwavo vangayarerango kundjonaghure ndi vivavyuke vavene nakuvamyonaghura. ⁵ Ndi ngavakare yira mungu kwalikundungu, namuengeli waHompa Karunga ngavatjidemo vakayende. ⁶ Ndi ndjira davo ngadi kare damundema naghushenete, opo ngavatjidja-tjidja muengeli waKarunga. ⁷ Kwato vyo navadjona ngoli vavo vanteye likweme; kwato vyonavadjona ngoli vantimina likwina muliparu lyande. ⁸ Ano ngoli lidjonaghuko ngalivana mwakudira kuyivira. Likwe lyavo olyo vanteya ngavafe mo vavene. ngavaweremo naghumwavo, ngalivadjonaghure naghumwavo. ⁹ Ano ngoli me ngani hafa ghunene mwaKarunga nakumushamberera muliyoghoro lyendi. ¹⁰ Navifupa vyande navyo ngavighamba, '' Hompa Karunga, are ghakaro yira ve, ghare wakupopera vahepwe kwavo vankondo ghunene navovaruhepo navovapumbo vintu kwavo vashanango kuvavaka?'' ¹¹ Ghungambi wavadiri kupura Karunga ghuna shakara; vavo kundundira vipempa. ¹² Kumfutita ghudona kuvirughana vyaviwa. Ame ruguvo shiri rwarunene. ¹³ Ano ngoli, mumaghuvera ghavo, ame navavedire; Navadililirepo mukunyongeka mutwe wande ghuyeyamene munturo. ¹⁴ Ame nakalire muruguvo rwavo yira mbovoshi vakuru vande; Ame nakunyongamine mukuteda yira vanane. ¹⁵ Ano ngoli opo vyangwanineme, vavo kwakushambelire nakuponga pamwe; kwapongire kumwe ghunkore name, ngoli vinome vyantetukitire shiri. Lishadaghuro lyavo kwande lyakudira kushaya. ¹⁶ Kwato mfumwa kwanavantje vahepikire; vakushelire mayegho vavo kwande mughugara. ¹⁷ Hompa, mushirugho shakutika kuni ngaghuvikengerera? Popera monyo wande mulighomono lyalidjanaghuro lyavo, liparu lyande kwavanyime. ¹⁸ Ngoli ame ngani kupandura mulipongo lyaninene; ngani kutangaghuka mukatji kavaghunyande. ¹⁹ Washa kengerera vanankore vamapempa vakushamberere kwande; washa vakengerera vatwikire kurughana ndjira davo dadidona. ²⁰ Vavo kapi vaghambanga vyampora, ano ngoli vikuyonga vyavo nkango damapempa daghunkore navatungi ovo vakarerengo vyampora. ²¹ Vavo vighamba vyavo vyavinene vyaghunkore name; vavo ghavaghamba, ''Ahe, Aha, mantjo ghetu ghavikenga.'' ²² Ove wavikenga, Hompa Karunga, washa mwena; Hompa, washa karera ghure name. ²³ Kunyunge nakurambuka mukumpopera; Hompa wande Karunga wande mpopere vikarapo vyande. ²⁴ Mvhatere me, Hompa Karunga wande, mukonda yaghupongoki ghoye; washa vakengerera vakushamberere kwande. ²⁵ Washa vakengerere vaghambe mudimtjima davo, '' Aha, tuna wana ngoli ghotwashana-shananga.'' Washa vakengerera vaghambe, '' Atwe tunamulipo ngoli.'' ²⁶ Ngoli ndighuva shwaghukite nakuvamyona ovo vashambererango ruguvo rwande. Kwavo vakukunenepita naghumwavo kwande ndi livafukilire mushuma shalishwaghu. ²⁷ Ngoli kwavo vahafero liyoghoko lyande vayiyire murumwemwe naruhafo; ngoli ndi vatwikirange kughambashi, '' Hompa Karunga tumutangange, ghuye kuhafa mumparukito yavakareli vendi.'' ²⁸ Makura ame ngani tanta ghumanguruki ghoye nakukutanganga mwankehe liyuva.