Lipisaromu lyaDaviti. muruvede ghuye ghakukongitire ghakare ghundambo naAbimeleki, ghogho ghamutjidiromo. ¹ Ame ngani tangaghuka Hompa Karunga mushirugho nashintje, kanwa kande ngakamutanganga nkehe pano. ² Ame ngani tanganga Hompa Karunga! Mpongolishi ovo vahepo vayuve nakushamberera. ³ Tumutangange kumwe name Hompa Karunga, mpongolishi natuvantje tuyerure lidina lyendi. ⁴ Ame nkehe pano namushananga Hompa Karunga, ghuye kundimburura, ghuye ghampa rufundo kwanavintje natjilire. ⁵ Kwavo vahuguvaro mwendi vavo kumoneka shite, waronka limoneko lyavo ghalishwaghuranga. ⁶ Pakalire murwana vahepekire ghogho ghaliliro ngoli Hompa Karunga ghamuyuvu kumwe nakumupopera kumaghudito ghendi naghantjeya. ⁷ Muengeli waKarunga kutakamita ovo vatjiro Hompa kumwe nakuvamangurura. ⁸ Makera nakukenga shi Hompa Karunga muwa. Mutungiki ndjegho ghaturo Karunga shi ghuvando wendi. ⁹ Tjira Hompa Karunga, anwe vantu vendi ghapongora. Kwato vyakuhepa kwavo vatjiro Karunga. ¹⁰ Vanyimeghona maruvede ghamwe kupira ndya nakuyuva ndjara, ano ngoli vakaro mwaKarunga nakuhepashi nkehe vino vyaviwa. ¹¹ Yenu, vana vavakafumu, nteghererenu me. Ame ngani muronga weni mwakutjira Hompa Karunga. ¹² Murwana munke ghahafero liparu nakuhora mayuva ghamangi, ashi ndi kehe pano vimumonekerange vyaviwa? ¹³ Mpongolishi kuporeko kuvighamba vyavidona nakumwenikita kanwa koye mukaghambanga vipempa. ¹⁴ Tunda kughudona ngoli rughana ghuwa. Shana nkehe pano mpora nakuyikwama. ¹⁵ Mantjo ghaHompa Karunga kwakareranga pavapongoki waronka shi namatwi ghendi kwateghereranga viliro vyavo. ¹⁶ Shipara shaHompa Karunga ghunkore navovarughanango ghudona, ntani ghuye kuvavhuramita vighayara vyavo vyapantunda yalivhu. ¹⁷ Vapongoki kulira ghunene ngoli Hompa Karunga kuvayuva nakuvapopera kumaghudito ghavo naghantjeya. ¹⁸ Hompa Karunga pepi ghakarera navo vadiro lihuguvaro, ngoli ghuye kupopera ovo vakaro namonyo wamushiponga. ¹⁹ Vayingi vapongoki vakaro mumaghudito, ngoli Hompa Karunga kuvashutura mumaghudito ghavo naghantje. ²⁰ Ghuye vifupa vyendi ngavishuvara, kwato nashimweshi kashitjoko po. ²¹ Ghudona ngaghulya varughanidona. Ghovo vanyengo ovo vapongora ngavakava pangura. Hompa ²² Karunga popera maparu ghavakareli voye. Kwavo vaturo Hompa Karunga ashi ghuvandero wavo kapi ngavamona mpanguro.