¹ Shambererenu mwaHompa Karunga wetu, anwe vapongiki; mukangangenu momo vyawapera vyakuvyukilira. ² Kutapa mpandu kwaHompa Karunga navivetito; kuyimba kwakumutangaghuka navivetito vyakitara murongo. ³ Muyimbirenuko rushumo rwarupe; danenu moomo mwavikushongera ntani muyimbe okuno munahafa. ⁴ Ngoli nkango daHompa Karunga davyukilira ntani mwankehe vino gharughananga vyakuwapa tupu. ⁵ Ghuye ghahora ghupongoki naghumanguruki. Pano pantunda yaghudjuni payura likukwatakano lyaHompa Karunga mughushiri-shiri. ⁶ Munkango yaHompa Karunga mawiru mpavaghashitire, ntani nantungwedi nadintje kwadishitire mulishetero lyakanwa kendi. ⁷ Ghuye ghapongeke mema ghalifuta kumwe yira kandundughona; waronka ghatura mafuta muvishete. ⁸ Mpongolishi ghudjuni naghuntje ghutjire Hompa Karunga; Navatungimo navantje mughudjuni vakare naghoma kwendi. ⁹ Ngoli ghuye kwaghambire, ano ngoli mpovyashorokire; ghuye gharaghura, makura ghaviyimana pamavango ghavyo. ¹⁰ Hompa Karunga kutjilita likukwatakano lyadimuhoko; ghuye kupangera vighayara vyavantu. ¹¹ Vighayara vyaHompa Karunga kuyimana mwanaruntje, vighayara vyamumutjima wendi kwankehe ruvaro. ¹² Hompa Karunga ghuye kutungika shirongo osho shamukarerango, kutungika vantu ovo ghapongoramo ashi vakare vapingwa vendi. ¹³ Hompa Karunga kwatukengeranga muliwiru; ghuye kukenga vantu navantje. ¹⁴ Kulivango oko ghakarera, ghuye kukengera palivhu navantje ovo vatungo mughudjuni. ¹⁵ Ghuye kufaneka dimutjima davantu navantje kumwe nakukengera virughana vyavo navintje. ¹⁶ Kwato mukavita wakupopera hompa pangeli munkondo danaghumwendi. ¹⁷ Ndipo nkambe yihuguvare vipempa mukufunda; nampiri yirughanite nkondo dadinene, ghuye kwato kupopera. ¹⁸ Kengenu, Hompa Karunga kukengera kwavo vamutjiro, kwavo vahuguvaro mulikukwatakano lyendi lyamughushiri-shiri ¹⁹ ghuye kuvapopera maparu ghavo kwamfa nakuvapungura vaparuke muruvede rwalirumbu. ²⁰ Atwe kutaterera Hompa Karunga; ghuye ndje mupopeli nalishikukandulito shetu. ²¹ Dimutjima detu kushamberera mwaKarunga, ngoli atwe twahuguvara mulidina lyendi lyakupongoka. ²² Hompa Karunga renka ngoli likukwatokano lyoye lyaghushiri-shiri, likare natwe nkehe pano tuhuguvare moye.