Kwamupititiri yimbiti, pangovera yashighumba. Lipisaromu lyaDaviti. ¹ Ndimburure nangeshi ame kuna kukuyita, Hompa wavahungami vande; mpe nkondandjugho pashirugho shakumenga. Mfere nkenda ntani tegherera ndapero yande. ² Vantu anwe, shirugho shakuhura kuni ngamupirura mfumwa yande kuntjoni? Shirugho shakuhura kuni ngamuhora vininke vyahanadumba nakukwamakwama mampempa? Shera. ³ Ngoli yivenu ashi Karunga akutulira ghukarunga wamwene. Karunga ngandjuvha pakumukugha. ⁴ Mengenu kughoma, kuno mwashadjona! Vhunguta mumutjima ghoye paghuro ghoye nakukumwenenena. ⁵ Djamba ndjambo yaghuhungami nakutura lihuguvaro lyoye mwaKarunga. ⁶ Vavayingi kughamba, ''Are ghumwe ogho ngatuneyedo atwe ghuwa?'' Karunga, pumitira shite shashipara shoye papetu. ⁷ Ove kuvahafita mutjima wande naruhafo rwakupitakana rwavamwe apa mbuto yavo namandjembere vyayimanga. ⁸ Weno mumpora mposhi ame nganisheghumuka nakurara pokosho, aghuhuru, Karunga, mupopeli namukungi.